Boi. Ipardiateihon Naibata do juakjuak-Ni na boritan. Bibel mangkatahon, “Jahowa do na [mampargogohi ia] bani podomanni sanggah boritan.” (Psalmen 41:4) Sanggah parah naborit ni nasiam, dong tolu cara na boi mangurupi nasiam:

1.   Martonggo ma ase ipargogohi. Gabe iahapkon nasiam ma “damei ni Naibata, na mangatasi haganup paruhuron”. Gabe moru ma holsoh ni uhurmu anjaha ipargogohi nasiam.​—Pilippi 4:6, 7.

2.   Ulang Mandolei. Bibel mangkatahon, “Songon tambar na dear do uhur na megah, tapi hurang do gogoh sanggah maretek ni uhur.” (Podah 17:22, Terjemahan Dunia Baru, NW) Marlawak ma nasiam halani boi do ai mambahen lambin minar bohi janah marguna do ai bani angkula.

3.   Porsaya ma bani janji ni Naibata pasal ari simagira. Anggo tongtong idingat nasiam janji ni Naibata hassi pe parah naboritmu, boi do ai mambahen nasiam marmalas ni uhur. (Rom 12:12) Pasal ari magira ihatahon do bani Bibel, “Sada pe lang pangisini mangkatahon, ‘Boritan do ahu!’” (Jesaya 33:24) Sanggah ai, ipamalum Naibata do ganup naborit na lang boi itambari dokter sonari on. Umpamani, Bibel mangkatahon, “Sai lambin sehat ma angkulani lobih humbani haposoonni hinan. Sai mulak ma gogohni songon sanggah poso ope ia.”​—Job 33:25, NW.

 Catatan: Memang, porsaya do Saksi-Saksi Jahowa bani pangurupion ni Naibata. Tapi laho do hanami hu dokter sanggah boritan. (Markus 2:17) Age pe sonai, lang ra hanami manontuhon partambaran na ija do na maningon ipilih halak. Maningon mambahen haputusanni bei do ganup hita.