Lang, tanoh on lang na laho hancur, lang na laho itutung, janah lang na laho igantih pakon planet na legan. Bibel mangkatahon itompa Naibata pe tanoh on ase boi do iananni jolma sadokah ni dokahni.

•   “Teanon ni halak parpintor do tanoh in, anjaha tongtong do sidea marianan ijin.”​—Psalmen 37:29.

•   “Domma ipajonam [Naibata] tanoh on bani palasni, seng anjai dugur be sadokah nidokahni.”​—Psalmen 104:5.

•   “Tanoh on lalab do totap.”​—Parambilan 1:4.

•   “Sitompa langit in, ai ma Naibata na manompa tanoh on ampa na manjadihonsi, ai ma na pajonamkonsi, sedo ase tarulang ase itompa, bahen ianan do ase ijadihon ai.”​—Jesaya 45:18.

 Hassi pe adong porang, polusi, pakon na legan halani ulahni jolma, lang ipaturut Naibata hancur tanoh on. Ipatugah Bibel do na laho iripaskon Naibata do halak ‘na mansedai tanoh on’. (Pangungkabon 11:18) Aha do na laho bahenon ni Naibata?

 Halani lang sanggup pamarentahan ni jolma on laho padearhon situasini dunia on, laho igantih Naibata ma pamarentahan ai. Harajaon ni Naibata ma na mamarentah. (Daniel 2:44; Mateus 6:9, 10) Na gabe rajani ai ma Jesus Kristus Anak ni Naibata. (Jesaya 9:5, 6) Sanggah itanoh on ope Jesus ibahen ia do mukjizat laho mengendalihon alam. (Markus 4:35-41) Halani ia do rajani boi do ikendalihon ia tanoh on pakon unsur-unsur alam. Ipadear ia ma situasini tanoh on ase boi sarupa songon Taman Eden na hinan.​—Mateus 19:28; Lukas 23:43.

 Bahat do halak salah mangarusi aha na ihatahon bani 2 Petrus 3:7. Ijai ihatahon, ‘Anjaha langit pakon tanoh sisonari, iramotkon do bahen panganon ni apuy.’ Pardiateihon hita ma dua hatorangan na ponting on laho mangarusi artini ayat ai:

1.   Hata “langit”, “tanoh”, ampa “apuy” bani Bibel boi do legan artini. Umpamani, na isurat bani 1 Musa 11:1 mangkatahon, “Samasam hinan do hata i sab tanoh on.” Hata “tanoh” bani ayat on mangartihon ganup jolma.

2.   Anggo ibasa hita 2 Petrus 3:5, 6 gabe ibotoh hita ma artini hata langit, tanoh, pakon apuy. Bani ayat ai isarupahon do aha na laho masa bani ari na laho roh pakon Bah na Sumbang bani panorang ni si Noak. Iripaskon do “tanoh” bani panorang ai. Tapi sasintongni na iripaskon, ai ma pitah halak na jahat sedo tanoh on. (1 Musa 6:11) Janah iripaskon do homa “langit” ai ma ganup pamarentahan na jahat na adong itanoh on. Jadi na iripaskon ai ma ganupan halak na jahat sedo tanoh on. Si Noak pakon kaluargani selamat do humbani Bah na Sumbang ai janah boi ope sidea manggoluh i tanoh on.​—1 Musa 8:​15-​18.

 Bah bani panorang ni si Noak manripaskon halak parjahat. Sonai homa “apuy” na isobut bani 2 Petrus 3:7 laho manripaskon halak parjahat, sedo tanoh on. Naibata manjanjihon laho mambahen “langit na baru pakon tanoh na baru” bahen iananni halak na tong-tong mangkorjahon na pintor. (2 Petrus 3:​13) “Tanoh na baru” ai ma halak na laho manggoluh sadokah ni dokahni i tanoh on. Janah “langit na baru” artini pamarentahan na baru ai ma Harajaon ni Naibata. Harajaon ai ma na laho mambahen tanoh on gabe Paradeiso na gok hadameion.​—Pangungkabon 21:​1-4.