Sanina-Botou na Ihaholongi Hanami:

Bani abad papituhon SM, Nabi Hesekiel, mandapot panonggoran. Ia mangidah gareta porang na banggal, anjaha na mambobahon gareta ai ampa gogohni humbani Pargogoh Na Tang Situmbulan. Marhujai-hujon do gareta ai, janah marhusor songon hilab!​—Hes. 1:4, 9, 12, 14, 16-27.

Humbani panonggoran on, gabe taringat ma hita anggo bagian organisasi ni Jahowa i surga totap hujai-hujon. Sonaha bagian na i tanoh on? Humbani laporan dinas tahun na salpu pataridahkon, podas tumang do Jahowa mambobahon juakjuak-Ni!

Kaluarga Betel i Amerika Serikat, sidea pe sibuk do pindah hun Brooklyn hu kantor pusat na baru i Warwick, New York. Anjaha, dong homa na mandapot tugas na baru hu lapangan. Sonai homa kaluarga Betel i sab tanoh on, sidea pe sibuk do halani bahat bagunan haporluan cabang na ipajojong, ipajenges, ipasada, atap pe pindah ianan.

Malas do uhur ni Pangurus Pusat janah tarojur mangidah juakjuak ni Naibata, sibuk do homa sidea mangirikkon organisasi ni Jahowa. Umpamani dong na pindah bani ianan na mamorluhon, manggunahon cara na baru sanggah marbarita atap pe pindah bani ianan na manggunahon bahasa na legan. Haganup halak Kristen na setia, lang sual dong na boritni, atap pe na matua, haganup sidea marlintun laho mandapot hagoluhan!​—1 Kor. 9:24.

Pos ma uhur ni nasiam, ibotoh Jahowa do pambahenan ni nasiam. (Heb. 6:10) Anjaha pambahenan ni nasiam, mambahen hanami mardingat si Abraham pakon si Sarai. Sanggah marumur hira-hira 70 tahun, pindah ma si Abraham pakon kaluargani hun Ur, na i tanoh Kasdim, misir hu nagori na daoh hu tanoh Kanaan. Ijai ma sidea marianan, janah tading i tenda-tenda marratus tahun. Longan do uhur mangidah pambahenan ni sidea ai!​—1 Mus. 11:31; Lah. 7:2, 3

Ai ra do nasiam mangusihi sidea? Nasiam haganup na martahan, hassi pe bahat tantangan, sasintongni nasiam mandalakon hata ni Jesus. Ihatahon, “Laho ma hanima, podahi hanima ma sagala bangsa, ase gabe susian-Ku sidea, anjaha didi hanima ma sidea hubagas goran ni Bapa, Anak ampa Tonduy Na Pansing.”​—Mat. 28:19.

 Pardiateihon ma hata “laho” na ihatahon Jesus ai, patuduhkon anggo hita maningon do sibuk. Sadokah satahun na parpudi, domma bahat na ihorjahon susian ni Jesus, na ringgas. Tontu malas uhurta mangidah ai. On pataridahkon ipasu-pasu Jahowa do  horja marbarita, na ipadas bani ganup bangsa.​—Mrk. 13:10.

Bahat do homa na manjalo barita ai. Bilangan parbarita tahun na dob salpu, ai ma 8.340.847 halak, ampa rata-rata bilangan parlajar Bibel tiap bulan, ai ma 10.115.264 halak. Jadi tongon ma, gareta surga podas tumang do marhusor, sonai age nasiam! Sonari, otik mando panorang ase maluah, halani na laho itutup Jahowa ma dalan haluahon. Jadi, ringgas ma marbarita.

Sintong ma na ihatahon ayat tahunan 2017, ‘Martenger ni Uhur ma bani Jahowa anjaha Horjahon na Madear’. (Ps. 37:3) Mangkorjahon na madear ai ma mangidangi Jahowa, pataridahkon anggo nasiam porsaya hu Bani. Anjaha dingat ma homa ibagas na mangidangi lang pitah nasiam sandiri. Jesus mangkatahon, “Tonggor ma, sai na hasomanan-Ku do hanima ganup ari, ronsi roh ujung ni dunia on.”​—Mat. 28:20.

Porsaya ma, sai pasu-pasu ni Jahowa do pangidangion ni nasiam. Lang soal sadiha na boi ibahen nasiam, na porlu nasiam mambere sidearan humbani gok ni uhur. Anjaha ai do na pamalas uhur-Ni. (2 Kor. 9:6, 7) Halani ai, tongtong ma padohor diri hubani bapanta na parholong, tongtong martonggo, marlajar Bibel, martumpu, anjaha ringgas marbarita.

Ai ‘pondok mando panorang ni’ Setan. Halani ai marusaha do ia, sonaha ase nasiam lang setia bani Jahowa. (Pangk. 12:12) Tapi, anggo totap do nasiam dohor bani Jahowa, seng boi Setan marhasil. (Ps. 16:8) Pos ma uhur ni nasiam, arga do bannami pangurupion ni nasiam ai ma mangambilankon horja Harajaon bani panorang parpudi on.

Sai horas horas ma nasiam Hasomanmu,

Pangurus Pusat Saksi-Saksi Jahowa