PARLAJARAN 4
Anak Boru na Pasonangkon Bapani pakon Jahowa
Aha do janji ni si Jepta hubani Jahowa?
Age borat pangahapni, tapi ipasaud boru ni si Jepta do janji ni bapani
Ididah ho do dakdanak bani gambar in?— Boru ni si Jepta do ia. Lang ipatugah Bibel ise goranni, tapi ibotoh hita anggo ia pasonangkon bapani pakon Jahowa. Eta, parlajari hita ma pasal ia pakon si Jepta bapani ai.
Bapa na bujur do si Jepta, janah ibere do panorang mangajari boruni pasal Jahowa. Gogoh anjaha komandan na bujur do ia. Jadi ipangindo halak Israel do ia mambobai sidea laho mamorangi munsuh.
Si Jepta martonggo bani Naibata ase iurupi ia monang. Ia marjanji, holi anggo monang, ise pe na parlobei mangalo-alo ia sanggah mulak marporang, iondoskon ma hubani Jahowa ase mangidangi i tabernakel sadokah goluhni. Tabernakel ai ma ianan ni halak Israel manombah Jahowa. Hape tongon, monang do si Jepta! Ibotoh ho do ise na parlobei mangalo-alo ia sanggah mulak marporang?—
Tongon, boru ni si Jepta! Boru sasada do ia, tapi maningon pos uhur ni si Jepta mangondoskonsi. Pusok tumang ma uhurni si Jepta. Tapi dingat, domma marjanji ia bani Jahowa. Nini boruni ma, ’Bapa, anggo domma marjanji ham bani Jahowa, maningon bahenonmu do ai.’
Sahali satahun roh do hasoman boru ni si Jepta manjumpahi ia
Pusok do homa uhur ni anak boru ai. Halani i tabernakel lang boi ia marhajabuan janah marniombah. Tapi sihol do ia pasaudkon janji ni bapani janah pasonangkon Jahowa. Ai do siporlunan marimbang marhajabuan ampa marniombah. Jadi laho ma ia hu tabernakel janah ijai ma ia sadokah goluhni.
Anggo iahap ho sonang do ibahenni bapani pakon Jahowa?— Alo, tongon! Ho pe boi mangusihi boru ni si Jepta. Anggo itangihon janah ihaholongi ho Jahowa, sonang ma ibahen ho bapa, inang, pakon Jahowa.
