PARLAJARAN 12
Panogolan si Paulus na Pangkar
Eta, parlajari hita pasal sada garama na paluahkon tulangni. Goran garama ai lang ibotoh hita. Tulangni ai ma apostel Paulus. Tapi na ibotoh hita halak na pangkar do ia. Ra do ho manangar saritani?—
Si Paulus ipenjarahon i Jerusalem halani mambaritahon pasal Jesus. Piga-piga parjahat sogam bani si Paulus, jadi ibahen sidea ma rencana na jahat. Nini sidea, ’Pindo hita ma bani komandan ase isuruh tentara-tentara mamboban si Paulus hu pangadilan. Dob ai marbuni ma hita. Sanggah si Paulus i tongah pardalanan, bunuh hita ma ia!’
Ipatugah panogolan si Paulus do bani si Paulus pakon komandan pasal rencana jahat ai
Tapi itangar panogolan si Paulus do rencana jahat ai. Aha do maningon ibahenni? Laho ma ia hu penjara patugahkon ai bani si Paulus. Mintor isuruh si Paulus ma ia patugahkon rencana ai bani komandan. Pandapotmu, urah do ai bani panogolan si Paulus?— Lang, halani halak na marpangkat do komandan ai. Age pe sonai, pag do ia patugahkon ai.
Jadi mintor ipasirsir komandan ai ma hira-hira 500 tentara laho manjaga si Paulus. Dob ai isuruh ma sidea mamboban si Paulus hu Kesarea bani borngin ai. Ai maluah do si Paulus?— Tongon, parjahat ai lang boi mamunuhsi. Lang saud rencana ni sidea.
Aha do na iparlajari ho humbani sarita on?— Ho pe boi do pangkar songon panogolan ni si Paulus. Maningon pag do hita mambaritahon pasal Jahowa. Ra do ho gabe dakdanak na pangkar janah tongtong mambaritahon pasal Jahowa?— Anggo pag do ho, ra do boi ipaluah ho halak na legan.
