Sipata, buei do halak na mangejek atap pe manggila banta halani marsahap pasal Jahowa. Boi do on mambahen soh hita laho patugahkon pasal Jahowa. Ongga do ho sonai?— Bibel patugahkon banta, dong sada garama na mangkaholongi Jahowa. Tapi hampir soh ia marsahap pasal Jahowa. Goran ni garama ai si Jeremia. Eta, parlajari hita saritani.

Sanggah poso ope si Jeremia, isuruh Jahowa ma ia pasingatkon halak Israel ase ulang manghorjahon na sambor. Borat tumang do on bani si Jeremia, anjaha mabiar homa ia. Nini ma bani Jahowa, ’Lang hubotoh naha marsahap.  Poso ope ahu.’ Tapi nini Jahowa, ’Ulang pala mabiar ho. Huurupi pe ho.’

Mintor laho ma si Jeremia pasingatkon halak ai, iuhum do sidea anggo lang ra mubah. Pandapotmu, ra do halak ai manghorjahon na ihatahon si Jeremia?— Lang. Iejek janah igilai sidea do ia! Piga-piga halak pe sihol mamunuhsi. Pandapotmu, sonaha pangahap si Jeremia?— Mabiar do ia, nini ma, ’Lang ra be ahu marsahap pasal Jahowa.’ Tapi, tongon do ia soh marsahap pasal Jahowa?— Lang marnasoh ia. Holong tumang do uhurni bani Jahowa. Jadi, lang ra ia soh marsahap pasal Jahowa. Halani ai, ipaluah Jahowa ma si Jeremia.

Sontohni, ongga do piga-piga halak na jahat pamasukkon si Jeremia hubagas sumur na marhubang. Lang ibere mangan atap pe minum. Sidea manadingkon si Jeremia ijai ase matei. Tapi, iurupi Jahowa do ia ase maluah!

Aha do na boi iusihi ho humbani si Jeremia?— Age pe sipata mabiar si Jeremia, tapi lang marnasoh ia marsahap pasal Jahowa. Ho pe, sanggah marsahap pasal Jahowa, ra do iejek atap pe igilai halak. Ra do ho maila janah mabiar. Tapi, ulang marnasoh ho marsahap pasal Jahowa. Tongtong do ho iurupi Jahowa, songon pangurupionNi bani si Jeremia.