PARLAJARAN 3
Si Rahap Porsaya bani Jahowa
Eta, ahapkon ma hita i huta Jeriko. I tanoh Kanaan do huta ai. Parhuta ai lang porsaya bani Jahowa. Ijai tading sada naboru na margoran si Rahap.
Sanggah dakdanak ope ia, itangarni do sarita pasal si Musa na pangkorahkon Laut Sigerger janah mambobai halak Israel luar hun Masir. Itangarni do homa iurupi Jahowa sidea bani parporangan ase boi monang. Sonari itangarni halak Israel marsaran dohorhon Jeriko!
Si Rahap mangondingi mata-mata ai halani porsaya ia bani Jahowa
Bani sada borngin, roh ma dua halak Israel hu huta Jeriko laho mamata-matai huta ai. Masuk ma sidea hu rumah ni si Rahap. Iontang si Rahap ma sidea marborngin i rumahni. Hape ibotoh raja ni halak Jeriko ma dong dua mata-mata hu huta ni sidea marborngin i rumah ni si Rahap. Jadi, isuruh raja ma halak laho manangkap mata-mata ai. Tapi ipabuni si Rahap do dua mata-mata ai bani tayub rumahni. Nini si Rahap ma bani suruhan ni raja ai, ’Tongon, ijon do nongkan sidea, tapi baru pe laho sidea. Ayaki nasiam ma ase boi itangkap nasiam sidea.’ Ibotoh ho do mase iondingi si Rahap mata-mata ai?— Halani si Rahap porsaya bani Jahowa, janah ibotoh do tanoh Kanaan domma ibere bani halak Israel.
Jadi paima mata-mata ai laho hun rumah ni si Rahap, marjanji do sidea, ganup kaluarga ni si Rahap ipaluah sanggah huta Jeriko irumbakkon. Ibotoh ho do aha na isuruh mata-mata ai bani si Rahap?— Nini sidea ma, ’Buat ma tali sigerger on, sangkutkon ma bai jandelamu ase ganup na i rumahmu boi maluah.’ Sonai ma ibahen si Rahap. Dobkonsi ai ibotoh ho do aha na tarjadi?—
Jahowa paluahkon si Rahap pakon ganup kaluargani
Dobkonsi piga-piga ari, iinggoti halak Israel ma huta ai sipsip. Bani onom ari iinggoti sidea ma huta ai sahali sadari. Tapi bani ari papituhon iinggoti sidea ma huta ai pitu hali. Dob ai ipagogoh sidea ma marsurak-surak. Anjaha irumbakkon Jahowa ma haganup tembok ni huta ai. Tapi lang marumbak rumah na adong sangkut tali sigerger bai jandelani! Ai iidah ho do bani gambar?— Maluah do si Rahap pakon ganup kaluargani!
Aha do na boi iparlajari ho humbani si Rahap?— Si Rahap gabe porsaya bani Jahowa, halani itangarni do halongangan na binahen ni Jahowa. Sonari ho pe marlajar pasal halongangan na binahen ni Jahowa. Ai porsaya do ho bani Jahowa songon si Rahap?— Ibotoh hanami porsaya do ho!
