PARLAJARAN 2
Si Rebekka Sihol Pasonangkon Jahowa
Si Rebekka ai ma sada anak boru na mangkaholongi Jahowa. Paramangonni ai ma si Isak. Ia pe mangkaholongi Jahowa. Mase boi sidea marhajabuan? Sonaha ia patuduhkon na sihol do ia pasonangkon Jahowa? Eta, torih hita saritani.
Si Isak ai ma niombah ni si Abraham pakon si Sarah. Sidea tading i tanoh Kanaan. Halak ijai lang manombah Jahowa. Jadi si Abraham sihol ase si Isak marhajabuan bani anak boru na manombah Jahowa. Halani ai isuruh ma jabolonni na margoran si Elieser hu Haran, huta ni hade-hade ni si Abraham, manorihi anak boru na laho gabe parinangon ni si Isak.
Ringgas tumang si Rebekka manahui bah bani ganup unta in
Jadi misir ma si Elieser pakon jabolon na legan. Daoh tumang do pardalanan ni sidea. Iboan ma sapuluh unta, bohal ampa buei siluah. Hunja do ibotoh si Elieser anak boru na sosok bani si Isak? Daskonsi i Haran, marsaran ma sidea dohorhon sada sumur, halani ibotoh si Elieser do bahat halak hu sumur laho manahui bah. Martonggo ma ia bani Jahowa, nini ma, ’Anggo hupangindo bah inumon bani anak boru, janah ibere do bah ai bangku ampa untaku, ai ma anak boru na itontuhon Ham ale Jahowa.’
Dob ai hu sumur ma si Rebekka. Bibel mangkatahon jenges tumang do si Rebekka. Ipangindo si Elieser ma bah ai hu bani. Nini si Rebekka ma, ’On ma inum ham, anjaha hutahui pe bah bani ganup untamu.’ Pingkirhon ma! Bahat do minum anggo unta na horahan. Jadi, marulak-ulak ma si Rebekka hu sumur laho manahui bah. Ididah ho do bani gambar in sonaha ringgasni si Rebekka marhorja?— Longang ma si Elieser halani mintor ibalosi Jahowa do tonggoni.
Ibere si Elieser ma hubani si Rebekka buei siluah. Anjaha si Rebekka mangarahkon si Elieser pakon na mangkasomanisi hu rumah bapani. Si Elieser patorangkon, mase isuruh si Abraham sidea hujai janah sonaha Jahowa mambalosi tonggoni. Malas tumang do uhur ni kaluarga si Rebekka anggo ia marhajabuan pakon si Isak.
Misir ma si Rebekka pakon si Elieser hu Kanaan janah marhajabuan pakon si Isak
Pandapotmu, ra do si Rebekka marhajabuan pakon si Isak?— Ibotoh si Rebekka, Jahowa do na mangurupi si Elieser. Jadi sanggah isungkun kaluargani ia, ra do marhajabuan pakon si Isak, nini si Rebekka ma, ’Eak, ra do au.’ Misir ma si Rebekka rapkon si Elieser. Daskonsi sidea i Kanaan marhajabuan ma si Rebekka pakon si Isak.
Halani si Rebekka ra manangihon Jahowa, ipasu-pasu ma ia. Humbani ginomparni do Jesus tubuh. Anggo iusihi ho si Rebekka janah pasonangkon Jahowa, ho pe boi dapotan pasu-pasu.
