PARLAJARAN 5
Si Samuel Totap Mangkorjahon na Sintong
Sanggah dakdanak, si Samuel tading i tabernakel janah mangidangi ijai. Tabernakel ai ma ianan panumbahan bani Jahowa. Ibotoh ho do mase si Samuel tading ijai? Parlobei, eta, parlajari hita pasal si Hanna, inang ni si Samuel.
Domma dokah si Hanna sihol marniombah age sada pe, tapi lalab lang boi. Halani ai martonggo ma ia bani Jahowa mangindo pangurupion. Ia marjanji anggo ibere Jahowa sada niombah bani, ibere ma niombah ai hubani Jahowa ase mangidangi i tabernakel. Ibalosi Jahowa ma tonggoni. Ujungni marniombah ma ia. Igoran ma anakni ai si Samuel. Songon na dob ijanjihon, iboan si Hanna ma si Samuel sanggah marumur tolu atap ompat tahun hu tabernakel, laho mangidangi Jahowa ijai.
Si Eli ai ma sintua ni malim i tabernakel. Dua anakni pe mangidangi gabe malim ijai. Dingat ma, tabernakel ai ma rumah panumbahan hubani Jahowa. Jadi maningon marparlahou na dear ma halak ijai. Tapi, anak ni si Eli mangkorjahon na sambor tumang. Ididah si Samuel do ai. Ai dihut do si Samuel mangkorjahon na sambor songon sidea?— Lang, si Samuel totap mangkorjahon na sintong songon na iajarhon inangni bani.
Pandapotmu, aha do na maningon bahenonni si Eli hubani dua anakni ai?— Maningon iuhum do sidea, janah seng boi ipaturut be mangidangi ijai. Tapi lang sonai ibahen si Eli. Manringis ma Jahowa hubani si Eli pakon dua anakni ai, janah uhuman ni Jahowa ma sidea.
Si Samuel na poso ope marsahap pakon si Eli, Sintua ni Malim
Bani sada borngin itangar si Samuel do sora na mardilo sanggah modom ia, ’Samuel!’ Marlintun ma ia hubani si Eli. Tapi nini si Eli ma, ’Lang dong hudilo ho.’ Tolu hali ma sora ai mardilo. Bani patoluhon, ipatugah si Eli ma hubani si Samuel anggo itangarni use sora ai, balosni, ’Ale Jahowa, marsahap ma Ham, ijon do ahu manangihon’. Sonai ma ibahen si Samuel. Dob ai nini Jahowa ma, ’Patugah ma bani si Eli, laho uhuman-Ku do kaluargani halani sidea mangkorjahon na sambor.’ Pandapotmu, urah do si Samuel patugahkon ai bani si Eli?— Lang. Tapi age pe mabiar ia, totap do ipadas hata ni Jahowa ai bani si Eli. Ujungni tongon do na ihatahon Jahowa, ibunuh ma dua anak ni ai janah si Eli pe matei.
Si Samuel gabe siusihan na dear hubanta. Totap do ia mangkorjahon na sintong age pe ididahni bahat halak mangkorjahon na sambor. Anggo ho sonaha? Sihol do ho mangusihi si Samuel janah totap mangkorjahon na sintong? Anggo ibahen ho sonai, ipasonang ho ma Jahowa pakon hanami namatorasmu.
