PARLAJARAN 13
Si Timoteus Sihol Mangurupi Buei Halak
Si Timoteus na poso ope marosuh mangurupi buei halak. Laho do ia hu piga-piga ianan mangurupi na legan. Halani ai, sonang tumang hagoluhanni. Ai ra do ho manangar saritani?—
Iajari inang pakon ompungni naboru do si Timoteus pasal Jahowa
Si Timoteus magodang i huta Listra. Si Lois ompungni naboru pakon si Oinike inangni, mangajari ia pasal Jahowa humbani na etek. Dob magodang si Timoteus, sihol do ia mangurupi na legan marlajar pasal Jahowa.
Sanggah poso ope si Timoteus, iarahkon si Paulus ma ia marbarita hu huta-huta na legan. Balosni, ’Eak, ra do ahu!’ Si Timoteus ra do dihut mangurupi na legan.
Laho ma si Timoteus pakon si Paulus hu sada huta i Makedonia ai ma Tessalonika. Maningon daoh do sidea mardalan, dob ai markapal. Dobkonsi das ijai, iurupi sidea ma buei halak marlajar pasal Jahowa. Tapi dong piga-piga halak na manggila janah sihol mambogbogi sidea. Jadi itadingkon si Paulus pakon si Timoteus ma huta ai janah marbarita hu huta-huta na legan.
Sonang do hagoluhan ni si Timoteus
Dobkonsi piga-piga bulan, isuruh si Paulus ma si Timoteus mulak hu Tessalonika laho manorih ganup sanina ijai. Ijai dong ope na lang marosuh bani. Tapi laho do si Timoteus halani mamingkirhon ganup sanina na ijai. Dob ai mulak ma use ia hubani si Paulus patugahkon na dear-dear do ganup sanina i Tessalonika!
Dokah do si Timoteus pakon si Paulus rap marhorja. Bani si Paulus, si Timoteus do na sosok mangurupi kuria-kuria, halani holong do uhur ni bani Jahowa pakon halak na mabuei.
Holong do uhurmu bani na legan janah sihol do ho mangurupi sidea marlajar pasal Jahowa?— Anggo sonai, sonang tumang do hagoluhanmu songon si Timoteus!
