PARLAJARAN 13
Aha do na Laho Masa hubani Ugama-Ugama?
1. Dear do haganup ugama-ugama?
Sai adong do halak na pintor ni uhur bani haganup ugama. Ipardiateihon Naibata do halak si sonai anjaha isarihon do sidea. Tontu, sada barita na madear do ai. Tapi sayang, buei do halak marparlahou na jahat mamboan goran ni ugama. (2 Korint 4:3, 4; 11:13-15) Marhitei barita humbani na masa sonari on, piga-piga ugama dihut ibagas terorisme, pamunuhan bahat ni jolma, porang, pakon hajahaton hubani dakdanak. Mambogei barita on mambahen pusok ni uhur bani halak na marpintor ni uhur!—Basa Mateus 24:3-5, 11, 12.
Ugama na sintong pasangapkon Naibata. Tapi, ugama na ladung mambahen pusok uhur ni Naibata, sontoni ajaran na lang tongon pasal Naibata ampa pasal jolma na matei. Tapi, Jahowa sihol ase jolma mambotoh hasintongan pasal diriNi.—Basa Hesekiel 18:4; 1 Timoteus 2:3-5.
2. Aha do na laho masa hubani ugama-ugama?
Malas do uhur halani Naibata mambotoh ija do ugama-ugama na tongon manghaholongiSi, anjaha lang manghaholongi dunia ni Sibolis. (Jakobus 4:4) Bibel manghatahon haganup ugama na ladung isobut ”Babel na Banggal”. Babel aima sada huta na adong i masa na basaia, ijai ma mulani ugama na ladung dob salpu Bah na Sumbang i masa ni si Noak. Lang piga dokah nari, Naibata laho manripaskon ugama na mangkahoui pakon na mangarsik-arsik manisia.—Basa Pangungkabon 17:1, 2, 5, 16, 17; 18:8.
Adong ope barita na madear. Lang ilupahon Jahowa halak na marpintor ni uhur na adong ibagas ugama-ugama na ladung i sab dunia on. Ipaluah do sidea humbani ugama na ladung marhitei pangajaran na sintong humbani Bibel.—Basa Mika 4:2, 5.
3. Aha do na porlu ihorjahon sidea na marpintor ni uhur?
Ugama na sintong pasadahon haganup manisia
Jahowa mansarihon jolma na manghaholongi aha na dear pakon aha na bonar. Naibata mamarentahkon sidea ase kaluar humbani ugama na ladung. Jolma na manghaholongi Naibata sonang mangubah aha pe na boi pasonangkon Ia.—Basa Pangungkabon 18:4.
Lobih hurang 2.000 taun na salpu, sanggah sidea na marpintor ni uhur mambogei barita na madear humbani susian ni Jesus, sidea marmalas ni uhur. Sidea marlajar dalan hagoluhan naimbaru humbani Jahowa. On ma dalan na mambahen hasonangan anjaha mambere tujuan pakon pangarapan i ari magira. Sidea gabe sitiruan halani manjalo barita na madear anjaha na parlobei ibagas goluh ni sidea aima manghorjahon harosuhNi.—Basa 1 Tessalonika 1:8, 9; 2:13.
Jahowa mangalo-alo na manadingkon ugama na ladung, anjaha mangontang sidea ase marsada pakon kaluarga ni panombah Naibata. Anggo Nasiam manjalo ontangan ni Jahowa boi do Nasiam gabe hasomanNi, panombahNi, janah mandapot hagoluhan sadokah ni dokahni.—Basa Markus 10:29, 30; 2 Korint 6:17, 18.
4. Mase haganup jolma gabe marmalas ni uhur?
Panguhuman na laho roh hubani ugama na ladung, tontu sada barita na madear do ai hubanta. Ugama na ladung lang boi be mangkahoui anjaha manggeori haganup manisia. Holi, haganup jolma marsada manombah Naibata na sintong.—Basa Pangungkabon 18:20, 21; 21:3, 4.
