PARLAJARAN 3
Tongon do Barita na Madear On Roh humbani Naibata?
1. Ise do Pangarang ni Bibel?
Barita na madear na manghatahon, ”buei do jolma holi dapotan hagoluhan sadokah ni dokahni i tanoh on”, ipatugah ibagas Bibel. (Psalmen 37:29) Bibel marisi 66 buku. Naibata mamakei hira-hira 40 dalahi laho manuratkonsi. Lima buku na parlobei, isuratkon si Musa hira-hira 3.500 taun na salpu. Buku na parpudi isuratkon bani apostel Johannes lobih 1.900 taun na salpu. Pikiranni ise do na isuratkon haganup panurat ni Bibel? Naibata marsahap hubani ganup panurat ni Bibel marhitei tonduyNi. (2 Samuel 23:2) Panurat ai manuratkon pikiran ni Naibata, lang pikiran ni sidea sandiri. Jadi, Jahowa do Pangarang ni Bibel.—Basa 2 Timoteus 3:16; 2 Petrus 1:20, 21.
Tonton ma video Ise do Pengarang ni Bibel?
2. Mase boi hita porsaya Bibel ai sintong?
Hita porsaya Bibel roh humbani Naibata halani mambahen panjahaion na topat anjaha tarparinsi. Lang adong manisia na boi mambahen si sonai. (Josua 23:14) Pitah Naibata Pargogoh Na So Tarimbang do na boi mangidah sonaha pargoluhan ni manisia i ari magira, topat anjaha sintong.—Basa Jesaya 42:9; 46:10.
Buku humbani Naibata legan do marimbangkon buku-buku aha pe, anjaha maningon sonai do buku na humbani Naibata. Miliaran Bibel domma isetak bani ratusan sahap anjaha domma adong i sab dunia on. Hassi pe domma dokah, sarasi do Bibel on humbani sains atap pe parbinotohan ni jolma. Ambah ni ai, aha na isuratkon bani 40 halak panurat ai, sarasi do haganup isini. * Aha na ihatahon ni Bibel lang ongga lepak, aima tandani Naibata do pangarangni, anjaha boi do mambahen hagoluhan ni jolma lambin dear. Haganupan on mambahen buei jolma porsaya, Bibel ai Hata ni Naibata.—Basa Jesaya 40:8; 1 Tessalonika 2:13.
Tonton ma video Mase Hita Boi Porsaya Sintong do Isi ni Bibel?
3. Aha do isini Bibel?
Bibel marisi barita na madear, aima Naibata laho mambahen hagoluhan na sonang hubani manisia i ari magira. Bibel manghatahon, panorang ni manisia na laho manggoluh i paradeiso sadokah ni dokahni domma magou halani dousa. Tapi, holi paradeiso ipadear Naibata use.—Basa Pangungkabon 21:4, 5.
Hata ni Naibata marisi titah, onjolan-onjolan ni Bibel, pakon podah. Bibel patugahkon sonaha do Naibata marparlahou dompak manisia, anjaha patuduhkon sonaha paruhuran ni Naibata. Halani ai, Bibel boi do mangurupi Nasiam laho mananda Naibata. Buku on patugahkon sonaha gabe hasoman ni Naibata.—Basa Psalmen 19:7, 11; Jakobus 2:23; 4:8.
4. Sonaha do Nasiam boi mangarusi isini Bibel?
Buku on mamakei sonaha sarani Jesus mangajar, ase Nasiam boi mangarusi Bibel. Ia mangutip marmasam-masam ayat ni Bibel ampa patorangkon ”sagala na tarsurat”.—Basa Lukas 24:27, 45.
Lang adong barita na legan na lobih dear humbani barita Naibata. Tapi bahat do na lang marosuh, adong homa do na manggila manangar barita ai. Ulang ma Nasiam haru halani ai, adong do pangarapan hubani Nasiam laho manggoluh sadokah ni dokahni, anggo Nasiam mananda Naibata.—Basa Johannes 17:3.
^ par. 3 Torih Buku bagi Semua Orang.
