PARLAJARAN 10
Na Ija do Dalan hubani Naibata?
1. Pitah sada do dalan na iharosuhkon ni Naibata?
”Jaga ma hanima dompak nabi parladung.”—MATEUS 7:15.
Hubani jolma na manghaholongi Naibata, Jesus mangajarhon sada dalan atap pe sada ugama na sintong. Ia malimbagahon ai songon sada dalan hu hagoluhan sadokah ni dokahni. Jesus manghatahon ”otik do halak na jumpahan ai”. (Mateus 7:14) Naibata mangharosuhkon ase haporsayaonta maronjolan bani Bibel. Haganupan panombah Naibata na sintong mardalan ibagas harosuhNi.—Basa Johannes 4:23, 24; 14:6; Epesus 4:4, 5.
Tonton ma video Ai Ijalo Naibata do Ganup Panombahan?
2. Aha do na ihatahon Jesus pasal halak Kristen na ladung?
”Ihatahon sidea, domma itanda Naibata, tapi iparnalang do Ia marhitei horja ni sidea.”—TITUS 1:16.
Jesus pasingatkon adong do nabi-nabi na parladung na mambutaki hakristenon. Hun darat, sidea songon panombah na sintong. Gareja-gareja manobut dirini Kristen. Tapi tongon do ai? Hunja ta botoh? Halak Kristen na sintong patuduhkon paruhuran anjaha parlahou na dear na boi itiru halak na legan.—Basa Mateus 7:13-23.
3. Sonaha do Nasiam manandai panombah na sintong?
Adong lima tanda pasal ai:
-
Panombah na sintong manghargai Bibel halani ai Hata ni Naibata. Sidea manggoluh humbani podah-podah na adong ibagas Bibel. Ugama na sintong lang songon ugama na mangihutkon pikkiran ni manisia. (Mateus 15:7-9) Panombah na sintong manghorjahon aha na dos pakon na iajarhon ni Bibel.—Basa Johannes 17:17; 2 Timoteus 3:16, 17.
-
Panombah na sintong pasangapkon goran Naibata, Jahowa. Haganup nabi songon si Musa, si Daud pakon na legan mananda ampa mamakei goran ai. (2 Musa 3:15; Psalmen 8:1) Jesus pasangapkon goran ni Naibata marhitei pangajarionni hubani halak na legan. Ia mangurupi jolma laho mananda Naibata ampa sonaha do martonggo ase goran Naibata ipapansing. (Mateus 6:9) Bani ianan ni Nasiam, ise do na patugahkon goran Naibata?—Basa Johannes 17:26; Rom 10:13, 14.
-
Pangihut ni Jesus na sintong mambaritahon Harajaon ni Naibata. Naibata manuruh Jesus laho mambaritahon barita na madear pasal Harajaon ai. Pitah Harajaon ni Naibata do harapan hubani manisia. Pongkut do Jesus marbarita das hubani hamateianni. (Lukas 4:43; 8:1; 23:42, 43) Ia manghatahon hubani pangihutni ase laho mambaritahon pasal ai. Anggo adong na roh hubani Nasiam, anjaha mansaritahon pasal Harajaon Naibata, aha do ugama ni?—Basa Mateus 24:14.
-
Pangihut ni Jesus lang dihut ibagas hajahaton ni dunia on. Urah do Nasiam mananda sidea, halani sidea lang dihut ibagas paringoran ni politik atap pe paringoran i buei ni jolma sonari on. (Johannes 17:16; 18:36) Janah sidea lang mangusih parlahou na masambor humbani dunia on.—Basa Jakobus 4:4.
-
Pangihut ni Jesus marsihaholongan. Hata ni Naibata mangajar sidea laho manghormati haganup suku. Ugama na ladung manokong parporangan, tapi ugama na sintong lang sonai. (Mika 4:1-3) Pangihut ni Jesus lang mangarapkon upah bani panorang na ibere sidea laho mangurupi pakon mangapoh halak na legan.—Basa Johannes 13:34, 35; 1 Johannes 4:20.
4. Boi do Nasiam manandai ugama na sintong?
Anggo pandapot ni Nasiam, ugama na ija do haganup ajaran ni humbani Bibel na pasangapkon goran Naibata, anjaha mambaritahon HarajaonNi na gabe pangarapan ni manisia? Hulanan na ija do na patuduhkon holong ampa na lang manokong parporangan?—Basa 1 Johannes 3:10-12.
