Naibata mangontang haganup jolma martonggo hu Bani. (Psalmen 65:3) Tapi lang haganup tonggo ibogei pakon ijalo Naibata. Sontoni, anggo sada dalahi na marpalahou na jahat hubani parinangonni, tonggoni lang ijalo Naibata. (1 Petrus 3:7) Sonai homa do sanggah halak Israel marpalahou na jahat, tonggo ni sidea lang ibogei Naibata. Jadi tonggo ai sada sibere-bere ni Naibata. Age pe sahalak jolma marparlahou na jahat tapi anggo mubah do ia, ibogei Naibata do tonggoni.​—Basa Jesaya 1:15; 55:7.

Tonton ma video Ai Itangar Naibata do Haganup Tonggo?

Tonggo aima bagian panombahan bani Naibata. Jadi, sanggah hita martonggo pitah hubani Naibata Jahowa. (Mateus 4:10; 6:9) Ambah ni ai, halani hita lang gokan dear, hita martonggo ibagas goran ni Jesus na domma matei manobus dousanta. (Johannes 14:6) Jahowa lang marosuh tonggo na marganjang-ganjang, na ihapal pakon na isuratkon. Tapi Ia sihol ase hita martongo humbagas uhur.​—Basa Mateus 6:7; Pilipi 4:6, 7.

Naibata boi do mambogei tonggo age pe ibagas uhur. (1 Samuel 1:12, 13) Ia mangontang hita ase martonggo bani marmasam panorang, sontoni bani sogot ari atap borngin, sanggah lape mangan atap pe sanggah hita ibagas parsualan.​—Basa Psalmen 55:23; Mateus 15:36.

Marhasoman pakon Naibata lang urah, halani hita tading itongah-tongah ni halak na lang porsaya hu Bani pakon na manrinsai janjiNi na laho pasaudkon hadameion itanoh on.  (2 Timoteus 3:1, 4; 2 Petrus 3:3, 13) Halani ai hita mamorluhon ojuran humbani hasoman sahaporsayaon, janah sonai homa do sidea.​—Basa Heber 10:24, 25.

Anggo hita marhasoman bani halak na manghaholongi Naibata, holongta pe lambin orot hu Bani. Ipartumpuan Saksi-Saksi Jahowa, hita mandapot ojuran sanggah mangidah hasomanta totap martenger ni uhur age pe ibagas hasunsahan.​—Basa Rom 1:11, 12.

Nasiam boi gabe hasoman ni Naibata anggo mamikirhon aha na dob iparlajari bani Bibel. Pongkut ma pikkirhon pambahenanNi, podahNi, pakon bagah-bagahNi. Anggo hita mamikirhon hataNi anjaha pongkut martonggo, hita lambin manghargai holongNi pakon hapentaranNi.​—Basa Josua 1:8; Psalmen 1:1-3.

Parhasomanan ni Nasiam pakon Naibata lambin orot anggo hita porsaya hu Bani janah martenger ni uhur. Haporsayaon boi do isarupahon songon suan-suanan, porlu i arbahi. Sonai homa do Nasiam, porlu mangarbahi haporsayaon ni Nasiam marhitei mamikirhon hasintongan ni Bibel na gabe bona haporsayaon ni Nasiam.​—Basa Mateus 4:4; Heber 11:1, 6.

Isarihon Naibata Jahowa do na manghaholongiSi. Boi do Ia malinggomi sidea humbani aha pe ase haporsayaon ni sidea lang bumbang anjaha totap marpangarapan bani hagoluhan na sadokah ni dokahni. (Psalmen 91:1, 2, 7-10) Ia pasingatkon hita ase daoh humbani aha pe na boi mambahen hita sunsah pakon lang martuah. Jahowa mangajari hita dalan sidearan bani goluhta.​—Basa Psalmen 73:27, 28; Jakobus 4:4, 8.