PARLAJARAN 11
Aha do Gunani Onjolan-Onjolan ni Bibel Hubanta?
1. Mase manisia mamorluhon panondang?
Sonaha do onjolan-onjolan ni Bibel mangojurhon hita laho maruhur ase lang hona mara?—PSALMEN 36:9
Maruhuran do Panompanta marimbangkon hita. Na songon Bapa na parholong, isarihon do hita. Ambah ni ai, hita lang ibahen ase maluah humbani panondangNi. (Jeremia 10:23) Songon niombah mamorluhon pangajarion humbani na matorasni, sonai homa do hita mamorluhon panondang humbani Naibata. (Jesaya 48:17, 18) Onjolan-onjolan ni Bibel aima sibere-bere ni Naibata na gabe panondang hubanta.—Basa 2 Timoteus 3:16.
Anggo hita mandalankon titah pakon onjolan-onjolan ni Bibel, boi do hita mangahapkon goluh na sonang sonari on anjaha mandapot pasu-pasu i ari magira. Halani Naibata do Panompanta, topat ma anggo hita unduk bani panondangNi ibagas malas ni uhur.—Basa Psalmen 19:8, 11; Pangungkabon 4:11.
2. Aha do artini onjolan-onjolan ni Bibel?
Onjolan-onjolan ni Bibel aima bona ni habonaran-habonaran. Tapi anggo Titah, ai ibahen bani sada-sada panorang. (5 Musa 22:8) Maningon do hita mamakei panimbangion laho mangarusi anjaha manghorjahon onjolan-onjolan ni Bibel bani sada-sada panorang. (Podah 2:10-12) Sontoni, Bibel mangajarhon hagoluhan aima sibere-bere humbani Naibata. Onjolan-onjolan ni Bibel on gabe panondangta i parhorjaan, i rumah, atap pe i pardalanan. Anggo idingat hita onjolan-onjolan ni Bibel ai, maruhur ma hita ase ulang hona mara.—Basa Lahoan ni Apostel 17:28.
3. Humbani dua onjolan ni Bibel, na ija do siporlunan?
Jesus patugahkon hubanta dua onjolan ni Bibel na porlu. Onjolan na parlobei mardomu hubani aha do na porlu ipindahi manisia, aima mananda Naibata, manghaholongi anjaha manombah Naibata ibagas hatengeran. Onjolan na parlobei in tongtong ma ipikkirhon sanggah hita mambahen sada-sada pilihan. (Podah 3:6) Sidea na manghorjahon onjolan-onjolan ai boi do gabe hasoman ni Naibata, mangahapkon hasonangan na sintong pakon hagoluhan sadokah ni dokahni.—Basa Mateus 22:36-38.
Onjolan ni Bibel na paduahon manondangi hita ase boi hita marhasoman pakon na legan ibagas damei. (1 Korint 13:4-7) Ase boi manghorjahon onjolan-onjolan ai, porlu do hita mangusih Naibata, sonaha Ia marparlahou hubani manisia.—Basa Mateus 7:12; 22:39, 40.
4. Aha do gunani onjolan-onjolan ni Bibel hubanta?
Anggo manghorjahon onjolan-onjolan ni Bibel, kaluarga-kaluarga marsada ibagas holong. (Kolosse 3:12-14) Hata ni Naibata pe malinggomi kaluarga marhitei onjolan ni Bibel na legan. Bibel manghatahon sidea na marhajabuan lang boi sirang tapi maningon totap do marsada.—Basa 1 Musa 2:24.
Anggo hita mandalankon onjolan-onjolan ni Bibel, boi do hita mangahapkon hadameion ampa lang hahurangan sipanganon. Sontoni, rosuhan do tokeh hubani parhorja na bujur, ringgas, halani mandalankon onjolan-onjolan ni Bibel. (Podah 10:4, 26; Heber 13:18) Hata ni Naibata pe mangajari hita ase sonang bani aha na adong banta, anjaha parhasomanan pakon Naibata aima na parlobei ibagas goluhta marimbang aha pe.—Basa Mateus 6:24, 25, 33; 1 Timoteus 6:8-10.
Mandalankon onjolan-onjolan ni Bibel marguna homa do hubani hasehaton. (Podah 14:30; 22:24, 25) Sontoni, anggo hita mambalosi parentah Naibata, aima ase hita ulang mabuk, boi do hita maluah humbani naborit anjaha parmaraan. (Podah 23:20) Bani Jahowa, lang salah anggo hita minum tapi na salah aima sisibur anggur atap bahat minum. (Psalmen 104:15; 1 Korint 6:10) Onjolan-onjolan ni Bibel na ibere Naibata marguna do hubanta. Marhitei ai iajari do hita manjaga parlahou pakon paruhuran. (Psalmen 119:97-100) Tapi, halak Kristen na sintong manghargai onjolan-onjolan ni Bibel, lang pitah hubani dirini sandiri tapi laho pasangapkon Naibata.—Basa Mateus 5:14-16.
