PARLAJARAN 03
Mase Porsaya Ham bani Bibel?
Bibel marisi bahat janji pakon podah. Ra, sihol do ham mambotoh aha na iajarhonni. Tapi, ra do sungkun-sungkun uhurmu, ‘Ai marguna ope podah ni Bibel sonari on? Ai tongon do boi saud janji pasal ari simagira?’ Bahat do halak na dob porsaya sintong do isi ni Bibel ai. Ulas hita ma piga-piga bukti ase porsaya homa ham.
1. Tongon do ongga masa sarita na tarsurat ibagas Bibel ai?
Bibel mangkatahon “topat do isuratkon hata hasintongan” na dong ibagasni. (Parambilan 12:10) Memang ongga do masa ganup sarita na ipatugah ijai. (Basa Lukas 1:3; 3:1, 2.) Topat do homa goran-goran na isobut ijai. Sonai homa pasal ianan ampa panorangni. Anjaha ganupan ai domma ibuktihon sejarawan pakon arkeolog.
2. Age pe domma marribu tahun na salpu isurat, mase marguna ope Bibel ai ronsi sonari?
Gati do Bibel patugahkon aha na lape ibotoh halak ondi ai. Umpamani, na markaitan hubani ilmu pengetahuan. Sanggah isurat ai, bahat do halak na lang setuju pakon aha na isurat ibagas Bibel. Tapi sonari on, domma ibuktihon ilmu pengetahuan tongon do isi ni Bibel. Halani ai, sosok ma ihatahon anggo Bibel ai “boi ihaporsayai . . . ronsi sadokah ni dokahni”.—Psalmen 111:7, 8.
3. Mase pos uhurta saud do holi panjahaion bani Bibel?
Bani Bibel bahat do panjahaion * na patugahkon pasal aha “na so masa ope”. (Jesaya 46:10) Jadi, paima masa ai, domma dokah tumang ipatugah. Tarmasuk ma homa ganup na masa sonari on. Bani parlajaran on ulas hita ma piga-piga panjahaion ni Bibel na dob saud.
PARLAJARI ROH BAHATNI
Ulas hita ma sonaha ilmu pengetahuan sonari on sosok pakon isi ni Bibel. Anjaha parlajari ma piga-piga panjahaion na dob ipatugah hinan.
4. Sosok do ilmu pengetahuan pakon Bibel
Na basaia, bahat halak na porsaya anggo tanoh on inahkon i atas ni sada binatang. Tonton ma VIDEO.
Pardiateihon ma aha na isurat bani buku Job hira-hira 3.500 tahun na salpu. Basa ma Job 26:7, anjaha ulas ma sungkun-sungkun on:
-
Bani ayat ai ihatahon anggo tanoh on gantung “i atas ni na lang”. Mase ai boi mambahen longang uhurta?
Hira-hira 200 tahun parpudi on pe ibotoh halak hunja do roh ni udan. Hape domma marribu tahun na salpu ipatugah Bibel pasal ai. Basa ma Job 36:27, 28, anjaha ulas ma sungkun-sungkun on:
-
Mase hatorangan ni Bibel pasal hunja roh ni udan luar biasa?
-
Ai lambin toguh do haporsayaonmu bani Bibel dob mambasa ayat nongkan ai?
5. Bibel patugahkon panjahaion pasal peristiwa na ponting
Basa ma Jesaya 44:27–45:2, janah ulas ma sungkun-sungkun on:
-
Hira-hira 200 tahun paima italuhon kota Babel, panjahaion aha do na domma ipatugah bani Bibel?
Bukti sejarah patuduhkon bani tahun 539 Sebelum Masehi, italuhon si Kores, raja Persia ma kota Babel. Ipadalan ia ma bah ni sungai na manginggoti kota ai hu ianan na legan. Gabe korah ma sungai ai. Dob ai, masuk ma si Kores pakon tentarani hu kota ai anjaha tarbuha do horbanganni. Gabe urah ma italuhon sidea kota Babel. Jadi dob salpu 2.500 tahun, gabe timbunan batu do Babel ronsi sonari. Pardiateihon ma aha na dob ihatahon Bibel pasal ai.
Basa ma Jesaya 13:19, 20, janah ulas ma sungkun-sungkun on:
-
Sonaha panjahaion na isurat ijon gabe saud?
Kota Babel na dob gabe timbunan batu i Irak
6. Aha na masa sonari domma ipatugah hinan bani Bibel
Bibel mangkatahon sonari hita manggoluh bani “panorang parpudi”. (2 Timoteus 3:1) Pardiateihon ma aha na ihatahon Bibel pasal ai.
Basa ma Mateus 24:6, 7, janah ulas ma sungkun-sungkun on:
-
Songon na ipatugah bani Bibel, aha do na masa bani panorang parpudi?
Basa ma 2 Timoteus 3:1-5, janah ulas ma sungkun-sungkun on:
-
Songon na ihatahon bani ayat on, sonaha do parlahou ni jolma bani panorang parpudi?
-
Parlahou na ija do na isobut bani ayat on na domma ididah ham?
ANGGO DONG NA MANGKATAHON: “Jolma do na manuratkon Bibel ai.”
-
Aha do na mambahen ham porsaya tongon do ganup isi ni Bibel?
RIMPUNAN
Boi do hita porsaya bani Bibel halani isini sosok pakon ilmu pengetahuan, sejarah, ampa panjahaion na dob saud.
Na Dob Iparlajari
-
Ai tongon do na isurat ibagas Bibel ai, atap pitah hata-hata dassa?
-
Contoh aha ma na patuduhkon anggo Bibel ai sosok pakon ilmu pengetahuan?
-
Anggo iahap ham, boi do Bibel patugahkon pasal ari simagira? Mase sonai balosmu?
TONGGOR HOMA
Ai ongga do lepak isi ni Bibel sanggah patugahkon pasal ilmu pengetahuan?
“Ai Sosok do Ilmu Pengetahuan pakon Bibel?” (Artikel web) (dong bani bahasa Indonesia)
Aha do na masa bani “panorang parpudi”?
“6 Panjahaion ni Bibel na Dob Saud” (Ambilan na Madear 1 Mei 2011)
Sonaha panjahaion ni Bibel pasal Gorik atap Junani gabe saud?
Basa ma sonaha panjahaion ni Bibel mambahen mubah goluhni sada dalahi.
“Huahap Lang Adong Naibata” (Menara Pengawal No. 5 2017) (dong bani bahasa Indonesia)
^ Panjahaion artini barita humbani Naibata na patugahkon pasal aha na laho masa.
