1. Bani Bibel, piga do masam ni ugama?

 ”MASUKI hanima ma horbangan na sompit in, ai [bolag] do horbangan anjaha bolag do dalan hu hamagouan, anjaha buei do halak na masuk hujai. Tapi sompit do horbangan anjaha etek do dalan na dompak hagoluhan, anjaha otik do halak na jumpahan ai.” (Mateus 7:13, 14) Hatorangan ni Bibel, pitah dua do masam ni ugama: na sintong pakon na ladung; na bonar pakon na lepak; ugama na sada manogu-nogu hu hagoluhan, na legan manogu-nogu hu hamagouan.

2. Sonaha do Bibel patuduhkon lang ganupan ugama pasonangkon Naibata?

² Iagan piga-piga halak ganupan ugama pasonangkon Naibata. Ayat-ayat na mangihut pataridahkon ai lang tongon:

•   ”Dob ai iulaki halak Israel ma mambahen sogam ni uhur ni Jahowa; marsombah ma sidea hubani Baal pakon Astarot, hubani naibata ni halak Aram, naibata ni halak Sidon, naibata ni halak Moab, naibata ni halak Amon, pakon naibata ni halak Palistim, tapi itadingkon sidea do Jahowa anjaha seng ibalosi sidea Ia. Jadi gajag ma ringis ni Jahowa mangidah Israel.” (Panguhum 10:6, 7) Anggo isombah hita gana-gana atap ompung ni ompung atap naibata-naibata na legan janah lang manombah Naibata na sintong, seng marosuh Jahowa bani ugamanta.

•   ”Ipasangap bangsa on do Ahu [Naibata] marhitei bibirni, tapi uhurni daoh do hun Bangku! Soya do pambahenan ni sidea pasangapkon Ahu, ai titah-titah ni jolma do ipodahkon sidea.” (Markus 7:6, 7) Anggo halak manghatahon dirini manombah Naibata, tapi mangajarhon ajaran ni jolma sedo humbani Bibel, soya-soya do ugama ni sidea. Seng ijalo Naibata ai.

•   ”Tonduy do Naibata, ase sagala na martonggo hu Bani, maningon do martonggo ibagas Tonduy ampa Hasintongan.” (Johannes 4:24) Ugamanta maningon maronjolan bani Bibel.

3. Sonaha do hita boi mananda ugama na sintong pakon ugama na ladung?

³ Sonaha do boi ibotoh hita sada ugama pasonangkon Naibata atap lang? Jesus manghatahon, ”Marbuahkon na madear do sagala hayu na madear, tapi sambor do buah ni hayu na masambor . . . Ase humbani buahni do tandaonnima sidea.” Pondokni, anggo sada ugama humbani Naibata, ai parohkon na madear; tapi anggo sada ugama humbani Sibolis, ugama ai parohkon na masambor.​—Mateus 7:15-20.

4. Biak na sonaha do maningon dong bani panombah ni Naibata Jahowa?

⁴ Ugama na sintong, halakni marsihaholongan. Mase? Halani Jahowa aima Naibata parholong. Jesus manghatahon, ”Hunjon ma botohon ni ganup halak susian-Ku hanima, anggo marsihaholongan hanima.” Pasal ugama na sintong, dong do tanda ai bani ganup ugama?​—Johannes 13:35; Lukas 10:27; 1 Johannes 4:8.

5. Pasal martiga-tiga jabolon i Aprika, aha do na ipatugah sada buku ensiklopedia?

⁵ Pardiateihon ma sada sontoh pasal martiga-tiga jabolon i Aprika. The New Encyclopædia Britannica patugahkon, ”Bani tahun 650 ronsi tahun 1905, dong hira-hira 18.000.000 halak Aprika na itongos marhitei Islāmic trans-Saharan pakon Samudra Hindia laho itiga-tigahon gabe jabolon. Bani partongahan ronsi ujung ni abad 15, halak Eropa martiga-tiga jabolon i topi ni laut hasundutan ni Aprika, anjaha bani tahun 1867 dong hira-hira 7.000.000 ronsi  10.000.000 halak Aprika itongos marhitei kapal, ibahen gabe jabolon hu Dunia Baru [Amerika].”

6. Sonaha do ugama dihut ibagas na martiga-tiga jabolon?

⁶ Sadokah panorang hasosakan i Aprika, dalahi, naboru, pakon dakdanak irampok humbani rumahni. Anjaha irantei, ibahen tandani bani angkula marhitei bosi na panas janah itiga-tigahon songon pinahan. Sonaha do ugama mangidah ai? Isurat Bethwell Ogot bani Daily Nation Nairobi, Kenya, ”Iajarhon ugama Kristen pakon ugama Muslim do ase ganup jolma marsada tapi sidea do homa mambahen ase halak na mabuei marjabolonkon bangsa na legan. . . . Tongon do anggo ugama Islam pakon Kristen, nagori-nagori i hasundutan ampa i hapoltakan, janah halak na so parholong na mambahen sitaronon bani halak Aprika.”

7. Sonaha do pangahap ni sipambobai ugama pasal parporangan?

⁷ Adong hasamboran na legan na ibahen ugama na ladung. Sontohni, age pe Bibel mangajarhon maningon ”haholonganmu do hasomanmu”, tapi hinsah do pambobai ugama mangojur parporangan.​—Mateus 22:39.

8. (a) Sonaha do pambobai ni ugama dihut bani pamunuhan ibagas partinggilan i Aprika? (b) Aha do nini sada pastor pasal pambobai ni ugama sanggah porang i Nigeria?

⁸ Domma talar bani tahun 1994 dong piga-piga biarawati pakon pastor na dihut bani pamunuhan halak na mabuei i Rwanda. Dihut do homa ugama bani partinggilan na legan i Aprika. Sontohni, sanggah halak na mabuei marsibunuhan ibagas porang i Nigeria, iojur ugama ni sidea do ase rayatni marporang. Sanggah marnunut porang in, ihatahon sada pastor ma, anggo pambobai ni gareja domma ”manlembang humbani horja  na dob binere ni Naibata bani sidea”. Nini homa, ”hita na manghatahon diri siparhorja Naibata domma gabe siparhoja ni Sibolis.”

9. Aha do na ihatahon ni Bibel pasal siparhorja ni Sibolis?

⁹ Domu bani sahap pastor ai, Bibel manghatahon, ”Ai age sibolis ipausih-usih do dirini bani malekat haliharon. Seng pala ganjil ai, anggo juakjuakni pausih-usihkon dirini bani juakjuakni hapintoron.” (2 Korint 11:14, 15) Jadi, usih songon halak na taridah bujur hapeni jahat, Sibolis pakahouhon halak marhitei siparhorja ni ugama, taridah songon na daulat tapi manghorjahon na masambor.

10. Sonaha do iparnalang pambobai ni ugama Naibata?

¹⁰ I sab dunia on, ganup pambobai ni ugama marambilan pasal holong, hadameion, pakon habujuron, tapi sidea do na lang paridop ni uhur, dihut ibagas porang, janah marparlahou na masambor. Tongon do Bibel manghatahon pasal sidea, ”Ihatahon sidea, domma itanda Naibata, tapi iparnalang do Ia marhitei horja ni sidea.”​—Titus 1:16.

11. Aha do na ihatahon Bibel pasal ugama na ladung?

¹¹ Marhitei mambasa buku pangungkabon ibagas Bibel, boi ibotoh hita sonaha pangahap ni Jahowa bani ugama na ladung. Ijai, ugama na ladung ipausih songon naboru, ”Babel na Banggal”. (Pangungkabon 17:5) Pardiateihon ma hata ni Naibata pasal naboru in,

•   ”Boru jalang na banggal . . . Hasomanni marbangkis do raja-raja ni tanoh in.” (Pangungkabon 17:1, 2) Manlembang do ugama na ladung humbani Naibata. Sidea dihut ibagas politik janah mangatur ibagas pamarentahan ni dunia on.

•   ”Ibagas huta ai do jumpah daroh ni nabi-nabi pakon halak na mapansing, sonai homa daroh ni haganup na dob binunuh i atas tanoh in.” (Pangungkabon 18:24) Ugama na ladung mangarsik-arsik anjaha mamunuh juakjuak ni Naibata na bujur janah halani sidea do marjuta halak matei ibagas porang.

•   ”Buei ni hamuliaon ampa hamantinonni.” (Pangungkabon 18:7) Bayak tumang do ugama na ladung anjaha pambobaini marlobih-lobih do goluhni.

•   ”Sagala bangsa kahou do ibahen uti-utian[-ni].” (Pangungkabon 18:23) Marhitei ajaran na ladung pasal tonduy na lang boi matei, ugama na ladung seng manlanglangi ganup horja hadatuon pakon partondungon. Janah, mambahen halak mabiar bani halak na matei anjaha manombah ompung ni ompung.

12. Sipasingat aha do na ipatugah Bibel pasal ugama na ladung?

¹² Torang do ipasingat Bibel ase halak kaluar humbani ugama na ladung, ”Kaluar ma nasiam, ale bangsang-Ku, hun tongah-tongahni, ase ulang saor nasiam bani dousani, anjaha ulang dihut nasiam ihonai sitarononni.”​—Pangungkabon 18:4, 5.

13. Aha do na laho masa bani ugama na ladung pakon halakni?

¹³ Bani ari magira, Babel na banggal aima ganup ugama na ladung i dunia on laho iripaskon. Bibel manghatahon, ”Ibagas sadari do roh bani sitarononni: Hamatean, pusok ni uhur ampa lohei, dob ai tutungon ma ia bani apuy, ai na gogoh do Tuhan Naibata, na manguhumsi.” (Pangungkabon 18:8) Ase hita ulang hona bani sitarononni janah totap manggoluh, maningon podas do hita kaluar humbani ugama na ladung! Seng dihut bani hasomalan, ari raya, pakon haporsayaonni na lang pasonangkon Naibata.​—2 Korint 6:14-18.