PASAL 1
Ai Haganup Ugama do Mangajarhon Hasintongan?
1. Ugama aha do deba na ibotoh nasiam?
BUEI tumang do halak satuju porlu do martumpu laho manombah Naibata. Tapi, seng bahat na sapanriah sonaha do manombah Naibata. Muslim martumpu i masjid, halak Kristen i gareja, halak Buddha pakon Hindu i kuil. Ugama ompung ni ompungta martumpu bani ianan-ianan na keramat. Janah sedo pitah ai, bani Muslim, dong do piga-piga sekte. Bani halak na manghatahon dirini Kristen pe buei do sekte-sekte. Leganni gareja-gareja utama, bahat ope gareja na lang ibagas sinode. Mangidah iananni, bahat homa do masam ni ugama ompung ni ompungta.
Ugamanta Maningon Maronjolan bani Hasintongan
2. (a) Sonaha do sasada halak mamilih ugama? (b) Ai tongtong do sintong ugama na itoruskon humbani namatoras atap na ipaksahon bangsa na legan?
2 Sonaha do sasada halak mamilih ugama? Somalni, halak manjalo ugama humbani namatorasni. Tapi, dong do homa pilihan ugamani halani na masa hinan. Sontohni, i Aprika, buku The Africans—A Triple Heritage patugahkon, ”Islam manrarat hampit utara ni Sahara marhitei na manaluhon, . . . Sonai homa Hakristenon manrarat hampit dangsina ni Sahara. Anggo hampit utara, panrarat ni Islam ai halani podang. Hampit dangsina ni Sahara, panrarat ni Hakristenon halani bodil.” Age pe sonai, somalni hita porsaya ugamanta pamalaskon uhur ni Naibata. Tapi, sada ugama lape tontu sintong age pe ai na itoruskon humbani namatoras, atap pe halani na ipaksa bangsa na legan bani ompung ni ompungta.
3-5. Limbaga aha do na boi mangurupi hita laho mambotoh seng haganup ugama mangajarhon hasintongan?
3 Age pe haganup ugama manghatahon domma mambere panogu-noguon na sintong laho manombah Naibata, tapi seng sarupa pandapot ni sidea. Buei ajaran sidea pasal Naibata pakon aha na ipindoNi banta, lang sarupa. Rimangi ma: Porini nasiam ijalo marhorja bani sada usaha na banggal. Bani ari na parlobei, nasiam manungkun bani tolu hasoman sahorja pasal aha na maningon ihorjahon halani seng roh tokeh nasiam. Hasoman sahorja na parlobei patugahkon harosuh ni tokeh ase nasiam manapu. Na paduahon manghatahon nasiam maningon manset dingding. Na patoluhon mansuruh nasiam mangirim surat.
4 Dob ai, nasiam manungkun pasal tokeh nasiam ai. Na parlobei mambalosi anggo tokeh nasiam ai halakni ganjang, poso, janah kasar. Na paduahon manghatahon pondok, matua, janah bujur. Na patoluhon manghatahon anggo tokeh ai sedo dalahi, tapi naboru. Anggo sonai, ra do nasiam marpingkir anggo tolusi hasoman ai, lang ganup manghatahon na sintong. Anggo nasiam sihol totap horja ijai, nasiam ra do mangindahi ise do sasintongni tokeh ai, janah aha do harosuhni.
5 Sonai homa do ugama. Halani buei pandapot pasal ise do Naibata ai pakon aha do na iharosuhkonNi bani manisia, maningon do ibotoh hita sonaha manombah Naibata domu bani hasintongan. Tapi, boi do hita botoh hasintongan pasal Naibata?
