1. Ise do deba na porsaya pasal partondungon pakon hadatuon?

 HUMBANI buku African Traditional Religion patorangkon: ”I Aprika, lang adong gunani manungkun dong do datu. Humbani marmasam hagoluhan i Aprika ponting tumang do datu”. Humbani na so marsikolah ronsi na marsikolah na ginjang, atap ulama pakon siparhorja i gareja, porsaya do bani partondungon pakon hadatuon.

2. Na ihaporsayai halak na mabuei, hunja do asal ni hagogohon na lang taridah?

² Buei ni halak porsaya dong do hagogohon na lang taridah. Naibata do na manrajai ganupan ai. Boi do ipakei begu-begu pakon ompung ni ompung hagogohon in. Piga-piga halak mambotoh sonaha mandarami ai, janah ipakei laho mambahen na dear (ilmu putih) atap mambahen na masambor (ilmu hitam).

3. Aha do ilmu hitam ai, janah na ihaporsayai halak na mabuei aha do na boi binahenni?

³ Ilmu hitam on ipakei laho manunsahi munsuh. Dong do na manghatahon sidea na marilmu hitam boi manongos arip-arip, manuk-manuk, lanog, pakon binatang na legan laho manunsahi halak. Halak na mabuei porsaya ilmu hitam do na mambahen halak maringori, lang tubuhan anak, boritan janah matei.

4. Nini halak na mabuei aha do na boi ibahen datu, janah aha do na ihatahon piga-piga na ongga gabe datu?

⁴ Marhait kait tumang do ilmu hitam pakon datu. Domu bai turi-turian ni halak, boi do datu habang laho manadingkon angkulani manjumpahi datu na legan atap mangindahi sisorohan. Jadi on pitah turi-turian humbani sidea na ongga gabe datu, halani angkulani datu ai dong ope bani podoman. On ma piga-piga na ihatahon sidea na ongga gabe datu (bueinan na marlajar anak boru) na ibuat humbani majallah Aprika, ”150 halak hubunuh marhitei parmaraan ni kareta.” ”Lima dakdanak hubunuh marhitei manirup darohni.” ”Tolu halletku hubunuh halani itadingkon ahu.”

5. Aha do ilmu putih ai, janah sonaha do halak mamakei ai?

⁵ Nini halak, ilmu putih boi do manjaga humbani na jahat. Sidea mamakei tintin atap golang na ”marisi”. Dong do homa na  manginum atap manlapui bani angkulani pangir na dob itabasi. Sidea mamonopkon barang na margogoh i rumah atap i tanoh na ihaporsayai boi manjagaisi. Dong do homa na manghaporsayai panjaga na marisi ayat-ayat humbani Quran atap Bibel.

6. Na hinan, aha do na ibahen Sibolis pakon begu-beguni, janah sonaha do dearni pangahapta bani hagogohon ni sidea?

⁶ Tongon, munsuh na majangin bani manisia aima Sibolis pakon begu-beguni. Boi do sidea pakahouhon pingkiran ampa hagoluhan, anjaha hinan boi sidea soluk bani manisia ampa pinahan. (Mateus 12:43-45) Seng boi hita mapas bani hagogohon ni sidea, sonai homa pabanggal-banggalhon gogoh ni sidea pe seng boi.

7. Aha do na hinarosuhkon Sibolis banta, janah bahen ma sada limbaga?

⁷ Sipangoto-otoi na majangin tumang do Sibolis. Boi do ibahenni halak marpingkir na gogoh tumang do ia, tapi sasintongni lang tongon ai. Songon sada limbaga: Bani parporangan dong do tentara na mamakei rokaman sora laho pabiarhon munsuh. Jadi, paima marporang, rokaman sora ni bodil pakon bom mariam ipabogeihon gogoh. Tentara ai marosuh ase munsuh marpingkir domma idorab sada bala na marsinjata na jago sidea. Sonai homa do harosuh ni Sibolis ase hita marpingkir hagogohonni lang tarsibar. Sihol do ia ase manisia mabiar anjaha ra mandalankon harosuhni sedo harosuh ni Naibata Jahowa. Pardiateihon ma tolu ladung ni Sibolis na hinarosuhkonni ihaporsayai hita.

8. Ladung aha do na ipararat Sibolis?

⁸ Sada ladung na ipararat Sibolis ai ma: Haganup parmaraan domma itontuhon. On domma binahen ni sada halak atap marhitei hagogohon na lang taridah. Sada sontoh, dong sada dakdanak na matei halani naborit malaria. Ra do iarusi inangni naborit ai halani rongit. Tapi ra homa do ia porsaya dong na manongos rongit ai marhitei datu.

9. Sonaha do Bibel patidakkon sedo ganup parsualan halani Sibolis?

⁹ Hassi pe Sibolis boi mambahen piga-piga parsualan, tapi seng boi ia mambahen haganup parsualan. Bibel patugahkon, ”Seng bani halak na lingkat hape hamonangan maradu, seng puanglima monang bani parporangan, seng halak na pentar na marnah ruti, seng halak na maruhur gabe bayak, anjaha seng halak na pandei gabe harosuh; tapi haganupan sidea tunduk do bani panorang ampa na masa.” (Parambilan 9:11) Ra do lingkatan sada siparlintun humbani imbangni, tapi boi homa do ia talu. Dong do ”panorang ampa na masa” na mambahen ia talu. Boi halani tartolsu ia ampa madabuh atap maborit pangahapni atap tarsidir. Ise pe boi do hona sisonai. Na masa on sedo humbani Sibolis atap pe datu, tapi ai ma na tarjadi.

10. Turi-turian aha do na ipararat pasal datu, janah hunja ibotoh hita ladung do ai?

¹⁰ Ladung na paduahon na ipararat Sibolis: Sanggah borngin datu manadingkon angkulani laho manjumpahi datu na legan atap laho manirup daroh atap mangankon sisorohonni. Sonari, rimangi ma, ’Porini datu ai boi sonai, aha do na mandarat humbani angkulani?’ Ibotoh hita tonduy aima hosah hagoluhan na lang taridah na mambahen  hita manggoluh janah boi manghorjahon aha pe marhitei angkula.

11. Mase lang boi datu manadingkon angkulani?

¹¹ Seng boi mandarat tonduy atap hosah hagoluhan humbani angkula laho manghorjahon na dear ampa na jahat. Halani ai, seng boi datu manadingkon angkulani. Seng tongon sidea manghorjahon aha na dob ipatugah atap na niahapkon sidea domma ihorjahon.

12. Aha do na binahen ni Sibolis ase buei halak porsaya domma mangahapkon horja na sasintongni lang ongga tarjadi?

¹² Aha do na mambahen datu-datu ai manghatahon sidea domma mangahapkon sisonai? Boi do ibahen Sibolis halak mangahapkon domma manghorjahon ai tapi sasintongni lang. Marhitei panonggoran, boi do ibahen Sibolis sada halak songon na dob mangidah, mambogei, janah manghorjahon horja na lang ongga tarjadi. Marhitei akal-akal on, harosuh ni Sibolis aima ase halak daoh humbani Jahowa janah ase nini uhur ni sidea, na lepak do Bibel ai.

13. (a) Dear do ilmu putih ai? (b) Aha na iajarhon ni Bibel pasal hadatuon?

¹³ Ladung na patoluhon: Dear do anggo Ilmu putih; laho mangimbangi ilmu hitam. Bani Bibel haduasi ai sarupa do. Haganup ai iburai Jahowa. Pardiateihon ma titah na dob binere ni Jahowa bani halak Israel pasal hadatuon pakon sidea na mangkorjahonsi:

•   ”Seng bulih horjahononnima partondungon.”​—3 Musa 19:26.

•   ”Sada dalahi atap sada naboru, na gabe paniaran atap sipartondung, maningon bunuhon do sidea.”​—3 Musa 20:27.

•   ”Seng bulih jumpah i tongah-tongah nasiam . . . halak partondung, barang sijujur ari, barang sipartabas, barang parsibalik mata, barang sibahen uti-utian, barang sibahen pangidahan.”​—5 Musa 18:10-14.

14. Mase ibahen Naibata Jahowa titah seng bulih manghorjahon hadatuon?

¹⁴ Humbani titah-titah ai pataridahkon  harosuh Naibata ase ganup panumbahNi ulang manghorjahon hadatuon. Halani holong ni uhurNi bani juakjuakNi, ibere do titah ai ase boi sidea maluah humbani biar, turi-turian na lang tongon, ampa begu-begu.

15. Sonaha Bibel pataridahkon gogohan do Jahowa marimbangkon Sibolis?

¹⁵ Age pe lang ipatugah ganup aha na boi pakon na lang boi ibahen begu-begu, humbani Bibel boi ibotoh hita gogohan do Jahowa marimbangkon Sibolis pakon begu-beguni. Sontohni, Sibolis domma iusir Naibata hun nagori atas. (Pangungkabon 12:9) Na legan, sanggah Setan laho manlajou si Job, marsungkun lobei ia bani Jahowa, janah unduk do ia bani sipasingat Naibata ase ulang ikahua hosah si Job.​—Job 2:4-6.

16. Hubani ise do hita marpangunsandeian?

¹⁶ Podah 18:10 manghatahon, ”Benteng na toguh do goran ni Jahowa, haporusan do ai bani halak parpintor, gabe seng mahua be.” Halani ai, hita maningon marpangunsandeian bani Jahowa. Juakjuak ni Naibata seng marpangunsandeian bani pangir na dob itabasi atap bani ugas-ugas na marhagogohon laho manjagai sidea humbani tahi-tahi ni Sibolis pakon begu-beguni; sidea pe lang mabiar bani uti-utian ni datu. Juakjuak Naibata porsaya bani na ihatahon Bibel, ”Ai manatap manonggor do mata ni Jahowa hu sab tanoh on, laho mambere gogoh hubani halak paruhur na marsijoloman hu Bani.”​—2 Kronika 16:9.

17. Humbani Jakobus 4:7 aha do na boi ihaporsayai hita? Anjaha, aha do na maningon horjahononta?

¹⁷ Boi do hita manghaporsayai ai anggo hita mangidangi Jahowa. Jakobus 4:7 manghatahon, ”Ondoskon nasiam ma diri nasiam bani Naibata; lawan nasiam ma sibolis in, jadi maporus ma ia humbani nasiam.” Anggo nasiam marondos bani Naibata, boi do nasiam porsaya ijagai Jahowa do nasiam.