1. Sonaha ase boi dear parhasomananta pakon Naibata?

 ASE dear parhasomananta pakon Naibata, hita seng boi dihut age otik pe bani ugama na ladung. Hita maningon mandalankon ugama na sintong. Dong marjuta halak na manghorjahon ai sonari i sab tanoh on.

2. I piga nagori do adong Saksi-Saksi Jahowa, janah aha do na ihorjahon sidea?

² Domu bani panjahaion ni Bibel, sidea na mandalankon ugama na sintong gabe sada ”humpulan na banggal” na roh ”humbani ganup bangsa, suku, marga, ampa hata”. (Pangungkabon 7:9) Marjuta Saksi-Saksi Jahowa lobih humbani 235 nagori, mangurupi halak na mabuei marlajar pasal harosuh ni Jahowa pakon aturanNi na lang borat.

3. Ise do na isombah Saksi-Saksi Jahowa, janah aha do na lang ihorjahon sidea?

³ Saksi-Saksi Jahowa marhatongonkon pitah Jahowa do na patut isombah. Seng ra sidea manombah gana-gana atap aha pe na lepak. (1 Johannes 5:21) Sidea lang dihut bani hasomalan manjagai na matei atap adat aha pe na domu bani ugama na ladung ampa ”podah-podah ni sibolis”. (1 Timoteus 4:1) Tapi, sidea mangapoh halak na marpusok ni uhur patugahkon bagah-bagah ni Naibata, ai mulak manggoluh do na matei i paradeiso i tanoh on.​—Johannes 5:28, 29; Lahoan 24:15.

4. Sonaha do haporsayaon ni Saksi-Saksi Jahowa pasal hadatuon?

⁴ Saksi-Saksi Jahowa otik pe lang dihut bani hadatuon, halani ibotoh sidea do ganupan ai roh humbani Sibolis. Sidea marpangunsandeian bani Jahowa seng bani hadatuon.​—Podah 18:10.

5. Aha tandani Saksi-Saksi Jahowa ”seng hun dunia on”?

⁵ Pasal susianni ihatahon Jesus do sidea ”seng hun dunia on”. (Johannes 17:16) Sanggah i tanoh on, Jesus pe seng ra dihut bani politik. (Johannes 6:15) Sonai homa do Saksi-Saksi Jahowa seng dihut bani politik, holong tumang bani nagorini, ampa porang ni kalompok-kalompok i tanoh on. Tapi igalar sidea do balasting (pajak) janah unduk bani pamarentah ija sidea marianan.​—Johannes 15:19; Rom 13:1, 7.

6. Podah ni ise do na ibalosi Saksi-Saksi Jahowa pasal parhajabuan ampa parsirangan?

⁶ Bani parhajabuan ni sidea, Saksi-Saksi Jahowa mambahen satatan sipil halani unduk bani pamarentah. (Titus 3:1) Romban bani podah ni Naibata, pitah sada paramangon atap parinangonni. (1 Timoteus 3:2) Halani maronjolan bani Bibel, jarang do marsirang parhajabuan ni sidea.

7. Sonaha do Saksi-Saksi marsihaholongan?

⁷ Marsihaholongan do Saksi-Saksi. Holong bani Naibata pakon holong bani hasoman mambahen sidea marsada ibagas parsaninaon na sintong, age pe sidea roh humbani buei ni suku ampa bangsa. Marsiurupan do Saksi-Saksi sanggah dong hasunsahan. Taridah do holong ni sidea ibagas goluh siganup ari.​—Johannes 13:35.

8. Horja na masambor aha do na seng ihorjahon Saksi-Saksi ni Jahowa?

⁸ Ia panumbah ni Jahowa marusaha do sidea marparlahou na pintor. Seng ra sidea manangko, marladung, marparlahou na butak, tenggen, janah seng ra sidea mangoto-otoi ibagas usaha. Ibagas parhajabuan, paramangon seng ra mambogbogi. Sangah lape gabe Saksi Jahowa, piga-piga humbani sidea dong manghorjahon ai, tapi halani pangurupion ni Jahowa, seng be ihorjahon ai. I lobei ni Naibata, sidea ”domma iburihi”.​—1 Korint 6:9-11.

9. Aha do na ihatahon sada buku pasal gareja-gareja spiritual i Aprika?

⁹ Buei ugama manghatahon sidea do na sintong. Sidea manghatahon ai, ra do halani horja halongangan na dob binahenni. Sontohni, songon na isurat bani buku na patorangkon pasal gareja-gareja spiritual i  Aprika na manghatahon, ”Horja hadatuon domma ibuat sidea [kalompok Kristen na baru] . . . Iakui sidea do anggo sidea boi mambahen tanda halongangan pakon manjahai. Nabi na i tongah-tongah sidea mambere panonggoran ampa patorangkon nipi. Ipakei sidea do bah, minak na pansing, abuan, lilin, ampa dahupa laho pamalumkon pakon manulak naborit.”

10, 11. Mase ugama na boi mambahen tanda halongangan sonari on, lape tontu ai roh humbani Naibata?

¹⁰ Jadi sidea na ibagas kalompok ai, manghatahon halongangan na dob binahen sidea aima tanda anggo ugama ni sidea iharosuhkon Naibata. Tapi, sedo tanda halongangan na mambahen sada ugama iharosuhkon Jahowa. Sibolis pe boi mambere kuasa bani piga-piga siparugama na ladung laho manghorjahon ”haganup bagei ni hagogohon”. (2 Tessalonika 2:9) Ai pe, ganup tanda halongangan, songon panjahaion, marhata na legan, ampa habotohon ”maronti do” nini Bibel.​—1 Korint 13:8.

¹¹ Ipasingat Jesus do, ”Seng haganup halak na mangkatahon Bangku, ’Tuhan, Tuhan!’ masuk hu Harajaon nagori atas ai, pitah na mandalankon harosuh ni Bapang-Ku na i nagori atas ai do. Bani ari ai buei do halak na mangkatahon Bangku, ’Ham Tuhan, Tuhan, ai lang manjahai do hanami marhitei goran-Mu? Ai lang iusir hanami do setan-setan marhitei goran-Mu? Ai lang ibahen hanami do buei tanda halongangan marhitei goran-Mu?’ Jadi hatahonon-Ku ma bani sidea, seng ongga Hutandai hanima, misir ma hanima hun lambung-Ku, hanima sihorjahon na ulang.”​—Mateus 7:21-23.

12. Ise do na masuk hu Harajaon na i Surga?

¹² Jadi, ise do na masuk hu Harajaon na i Surga? Sidea na manghorjahon harosuh ni Jahowa.

13. Horja aha do na binere ni Naibata bani juakjuakNi, anjaha ise do na manghorjahon ai?

¹³ Aha do na iharosuhkon Naibata sihorjahononta sonari on? Jesus manghatahon, ”Ambilankononkon do Ambilan Na Madear on pasal Harajaon in i sab dunia on, laho manaksihon bani haganup bangsa.” (Mateus 24:14) Saksi-Saksi Jahowa marhinsah ni uhur manghorjahon in.

14. Aha do Harajaon ni Naibata, janah ise do na laho manggomgomi ibagas Harajaon ai?

¹⁴ I ”sab dunia on”, Saksi-Saksi Jahowa mambaritahon Harajaon ni Naibata, sada pamarentahan na i surga laho manggomgomi tanoh on ibagas hapintoron. Sidea pe mangajarhon, Jesus domma iminaki gabe Raja bani Harajaon ai rap pakon 144.000 halak na pinilih hun tongah-tongah ni manisia.​—Daniel 7:14, 18; Pangungkabon 14:1, 4.

15. Aha na laho ripaskonon ni Harajaon ai?

¹⁵ Saksi-Saksi Jahowa patugahkon humbani Bibel, ripaskonon ni Harajaon Naibata do Sibolis pakon ganup na ibagas kuasani. Haganup ugama na ladung pakon ajaranni na lang pasangapkon Naibata Jahowa ripaskononni do homa! (Pangungkabon 18:8) Anjaha ropukanni Harajaon ai do sagala pamarentahan manisia na manlawan Naibata!​—Daniel 2:44.

16. Ise do na laho gabe rayat ni pamarentahan ni Jesus Kristus, janah ija do sidea laho marianan?

¹⁶ Dob ai, Saksi-Saksi Jahowa patugahkon Jesus laho mambere pasu-pasu na dear tumang bani ise na ra mandalankon titah ni Naibata. Gabe rayatni ma sidea i tanoh on. Marhitei Bibel ibagahkon, ”Sai paluahonni do halak na masombuh, na mangindo pangurupion ni halak na madoyuk ampa halak na so dong pangurupi bani. Maidop do uhur ni bani halak na malumat pakon na musil, anjaha paluahonni do tonduy ni halak na masombuh.”​—Psalmen 72:12, 13.

17. Pitah ise do na mambaritahon Harajaon ni Naibata?

¹⁷ Seng dong kalompok na legan na manghorjahon harosuh ni Naibata laho mambaritahon ambilan na madear pasal Harajaon. I sab tanoh on, pitah Saksi-Saksi Jahowa do na patugahkon pasal Harajaon ni Naibata bani halak na mabuei.