1. Ise pe halakni, pilihan sisonaha do na maningon ibuat pasal haporsayaon?

 JESUS marsahap, ”Na so mangkasomani Ahu, imbang-Ku do in.” (Mateus 12:30) Hita mamilih Jahowa atap Setan. Pangahap halak na mabuei, sidea domma mangidangi Naibata na sintong domu bani harosuh-Ni, tapi Bibel patugahkon Sibolis ”pakahouhon haganup dunia on”. (Pangungkabon 12:9) Marjuta halak porsaya sidea domma mangidangi Naibata na sintong, tapi sasintongni sidea mangidangi Sibolis! Pondokni, ise pe maningon do mamilih: mangidangi Jahowa, ”Naibata hatengeran ni uhur”, atap Sibolis, ”bapa ni ladung”.​—Psalmen 31:6; Johannes 8:44.

2. Aha do na binahen ni Sibolis ase ulang halak mangidangi Jahowa?

² Maruhur do anggo mangidangi Naibata Jahowa. Pilihan ai iharosuhkon Naibata. Tapi, ihasogamkon Sibolis do atap ise pe na mangidangi Naibata; ilanglangi ia do halak laho mangidangi Naibata mamakei halak na legan, hasoman, sindohor laho manrisai atap gabe munsuhta. Jesus pasingathon pasal ai, ”Anjaha hasomanni sarumah do gabe munsuh bani Jolma in.”​—Mateus 10:36.

3. Aha do na sihol bahenonmu anggo hasoman atap sindohormu mamunsuhi halani ugama?

³ Sonaha do pangahapmu anggo sonai ma na masa bani nasiam? Buei do halak mabiar atap pe sangsi manadingkon ugama ni sidea age pe ibotoh sidea domma manlembang. Bani sidea, manadingkon ugama ai boi mambahen borit uhur ni kaluarga. Tapi  rimangi ma, anggo dong sindohor ni ham mamakei narkoba, ai lang mintor ipasingat nasiam do ia pasal bahayani? Tontu nasiam pe lang ra dihut mamakei narkoba, lang sonai?

4. Bani masa ni si Josua, aha do na ihatahonni bani halak Israel pasal ugama?

⁴ Ipasingat si Josua do halak Israel ase manadingkon hasomalan pakon adat ni ugama na kahou humbani ompung na i lobei ni sidea. Nini si Josua, ”On pe sai habiari nasiam ma Jahowa, anjaha totap ma uhur nasiam mambalosi-Si ibagas putih ni uhur pakon hasintongan; paholang nasiam ma naibata na legan, na binalosan ni ompung nasiam i dipar ni Eprat pakon i Masir, anjaha balosi nasiam ma Jahowa.” (Josua 24:14) Si Josua lang manlembang humbani Jahowa, janah ipasu-pasu Jahowa do ia. Anggo hita bujur bani Jahowa, Ia pe mamasu-masu hita.​—2 Samuel 22:26.

5. Mase hita maningon mangambukkon haganup na marhait-kait pasal hadatuon?

⁵ Maningon iambukkon hita do haganup na marhait-kait pasal hadatuon sontohni panjaga ni angkula, tintin atap golang ”na marisi”, atap aha pe na domu hujai laho manadingkon ugama na ladung. Ponting tumang do manghorjahon in, halani ai pataridahkon anggo hita manghaporsayai Naibata Jahowa.

6. I abad na parlobei, aha do na ibahen halak Kristen bani pustaha-pustaha pasal hadatuon?

⁶ Pardiateihon ma aha do na ibahen halak Kristen i abad na parlobei sanggah sidea sihol mandalankon ugama na sintong. Bibel manghatahon, ”Buei do sihorjahon hadatuon hinan, mamboan pustaha-pustahani, lanjar itutung ma ai i lobei ni halak na mabuei.”​—Lahoan 19:19.

7. Porini hita isunsahi begu-begu, aha do na boi bahenonta?

⁷ Piga-piga na ongga dihut bani hadatuon, mangidangi Naibata Jahowa, sipata isunsahi begu-begu. Porini isunsahi nasiam, marsurak ma mangindo pangurupion bani Jahowa ibagas tonggo anjaha dilo ma goran-Ni. IurupiNi do holi nasiam.​—Podah 18:10; Jakobus 4:7.

8. Sonaha do paruhuran ni halak Kristen bani ganup na ipakei ibagas ugama na ladung?

⁸ Sidea na sihol mangidangi Naibata Jahowa, seng bulih mamonopkon atap mamakei patung, tiruan, atap gambar na ipakei ibagas ugama na ladung. Halak Kristen na sintong ibagas haporsayaon do sidea mardalan, lang ibagas na mangidah. (2 Korint 5:7) Unduk do sidea bani titah ni Naibata pasal gana-gana na lang boi ipakei bani partumpuan Kristen.​—2 Musa 20:4, 5.

9. Ase pentar, aha do podah ni Bibel hubanta?

⁹ Bibel patugahkon, ”Marsaor pakon halak na pentar, parohkon hapentaran.” (Podah 13:20) Ase boi pentar, hita porlu mardalan atap pe marsaor pakon Saksi-Saksi Jahowa. Sidea do na mardalan bani dalan hagoluhan.​—Mateus 7:14.

10. Sonaha do Saksi-Saksi Jahowa mangurupi nasiam mangidangi Jahowa?

¹⁰ Isarihon Saksi-Saksi Jahowa do halak na mabuei. Sidea mangurupi halak parpintor ase mangarusi hasintongan ni Bibel na parohkon hagoluhan sisadokah ni dokahni. Megah do uhur ni sidea mangurupi nasiam marlajar janah nasiam seng pala manggalar. Ibalosi sidea do holi sungkun-sungkun nasiam anjaha ipatidak do sonaha mandalankon ajaran ni Bibel.​—Johannes 17:3.

11. Sonaha do partumpuan Kristen boi mangurupi nasiam?

¹¹ Somalni sidea martumpu i Balei Harajaon. Ijai, nasiam boi marlajar roh bahatni pasal harosuh ni Jahowa. Lambin rosuh ma nasiam manghorjahon ugama na sintong. Anjaha, nasiam iajari sonaha mangurupi halak na legan mangarusi hasintongan ni Bibel.​—Heber 10:24, 25.

12. Sonaha do tonggo boi mangurupi nasiam laho mangidangi Naibata?

¹² Lambin buei pangarusion nasiam pasal harosuh ni Jahowa, lambin maharga do dalanNi na parholong bani nasiam. Lambin ihaholongi nasiam ma namin Naibata laho pasonangkon uhurNi, anjaha lang mambahen pusok uhurNi. Dingat ma, boi do nasiam  dohor bani Jahowa ibagas tonggo anjaha mangindo pangurupionNi laho manghorjahon na dear, anjaha padaohkon diri humbani na lepak.​—1 Korint 6:9, 10; Pilippi 4:6.

13. Sonaha do nasiam boi pamalaskon uhur ni Naibata Jahowa?

¹³ Anggo nasiam totap marlajar, lambin ihaporluhon nasiam ma mangondoskon diri hubani Jahowa, dob ai ididi gabe Saksi Jahowa. Malas do uhur ni Jahowa anggo nasiam marsaor pakon bangsaNi. (Podah 27:11) Nasiam dong i tongah-tongah ni bangsaNi na martuah, na ihatahon ni Naibata pasal sidea, ”Sihol marianan do Ahu i tongah-tongah ni sidea anjaha mardalani, gabe Naibata ni sidea ma Ahu, anjaha sidea gabe bangsang-Ku.”​—2 Korint 6:16.