1. Aha do gunani anggo hita ’dohor bani Naibata’?

 IHAHOLONGI Jahowa do sidea na manghaholongi-Si. Anggo nasiam mangidangi Naibata Jahowa, sonari pe pakon i ari simagira ipasu-pasuNi do nasiam. Bibel patugahkon, ”Padohor nasiam ma bani Naibata, jadi padohoron-Ni ma bani nasiam.”​—Jakobus 4:8.

2. Aha do na maningon bahenonta ase boi dohor bani Naibata, mardingat ai sonaha do namin tonggonta?

² Ase dohor bani Naibata, nasiam maningon marlajar anjaha mandalankon hataNi. Anggo nasiam martonggo domu bani harosuh ni Jahowa, itangihon do hita. Apostel Johannes manurat, ”On do hinsah ni uhurta na dong banta i lobei [Naibata], ‘Anggo ipindo hita atap aha domu hubani rosuh ni uhur-Ni itangihon do hita.”​—1 Johannes 5:14, 15.

3-7. Sonaha do hita boi mandapot hauhuron humbani Naibata, janah aha do gunani ai banta?

³ Na legan, anggo nasiam dohor bani Naibata, bereonNi do bani nasiam hauhuron laho mangurupi nasiam ibagas parsualan. Bibel manghatahon, ”Anggo adong i tongah-tongah nasiam na hurangan bani hauhuron, ipindo ma ai hubani Naibata.”​—Jakobus 1:5.

⁴ Sonaha do hauhuron humbani Naibata boi mangurupi nasiam? Sontohni, nasiam boi mangarusi aha na lang iharosuhkon Naibata Jahowa. Nasiam mambotoh mase ai lepak janah sonaha nasiam boi padaohkon diri. Habotohon ai boi mangurupi nasiam ase ulang hona humbai parsualan-parsualan na somal iahapkon halak. Sontohni, halani marparlahou na borsih, juakjuak ni Naibata daoh humbani boratan rumah na lape marhajabuan, naborit halani marsaor bani na so paramangon atap pe parinangonni, pakon partongahjabuan na lang martuah.

⁵ Aha ope gunani hauhuron humbani Naibata? Ai boi mangurupi nasiam mangahapkon hagoluhan sidearan. Mambahen haputusan na maruhur, sontohni mambagi duit. Nasiam boi mangindahi sura-sura na madear, anjaha manulak sura-sura na pondok hansa gunani.

⁶ Hauhuron humbani Naibata boi do use mangurupi ase boi dear pakon halak na legan. Nasiam pe boi martuah ibagas kaluarga. Nasiam pe boi mambahen parhasomanan na manongtong, anjaha ihargai age sidea na lang marlajar Bibel.

⁷ Leganni ai, anggo dong hauhuron humbani Naibata, lambin ihargai nasiam ma hagoluhan on. Hauhuron ai boi mangurupi nasiam ibagas parsualan. Nasiam lambin maruhur, janah pangarapan pasal ari simagira lambin torang. Halani ai nasiam lambin jorgit ampa marmalas ni uhur.​—Podah 14:30; Jesaya 48:17.

8. Anggo nasiam mangidangi Naibata, nasiam boi maluah humbani biar pasal aha?

⁸ Anggo nasiam mangidangi Naibata, nasiam boi maluah humbani biar na somal iahapkon halak na mabuei. Halani ibotoh nasiam anggo halak na matei aha pe lang ibotoh, seng mabiar nasiam bani na matei. Halani nasiam porsaya pasal bagah-bagah ni Naibata dong do parpuhoon bani na matei, seng mabiar nasiam bani hamateian. Halani ibotoh nasiam Naibata pargogoh na so  tarimbang, seng mabiar nasiam bani hadatuon.​—Johannes 8:32.

9-11. Ise do holi na manggoluh i Paradeiso, janah ise do na lang?

⁹ Anggo nasiam dohor bani Naibata, nasiam seng mabiar bani ari simagira. Pasal parsualan na sonari on domma girah ipatugah bani Bibel, janah hasunsahan on pitah parsatongkinan; Harajaon ni Naibata laho padearhon tanoh on gabe paradeiso.​—Lukas 21:10, 11, 31; 23:43.

¹⁰ Pitah na dohor janah na mangidangi Naibata do na boi manggoluh i Paradeiso. Bibel manghatahon, ”Tongkin nari gelah seng dong be parjahat in, anggo ipardiatei ho iananni, seng jumpah be ia; tapi na lamlam maruhur do sitean tanoh in, anjaha hamalaskonon ni uhur ni sidea do hadameion na gok.”​—Psalmen 37:10, 11.

¹¹ Hu hamagouan sisadokah ni dokahni ma sidea na hengkeng uhurni, pakon na so ra manangihon titah ni Naibata. (2 Tessalonika 1:8, 9) Iripaskon mando sidea, Setan, rapkon begu-beguni. (Pangungkabon 20:10, 14) Tapi sidea na marlajar anjaha na mangidangi Naibata Jahowa, boi mangahapkon malas ni uhur i Paradeiso i tanoh on.

12. Pasal ari simagira, aha do na ihatahon ni Bibel?

¹² Domma bahat na dear tumang na pinasirsir Naibata Jahowa bani sidea na manghaholongiSi! Pardiateihon ma aha na ipatugah Bibel pasal hagoluhan i Paradeiso i tanoh on:

•   Buei do sipanganon: ”Sai junah ma omei [atap, sipanganon] i tanoh in, das bani pakpak ni dolog.”​—Psalmen 72:16.

•   Rumah na jenges: ”Pajongjongon ni sidea do rumah anjaha iiankon.”​—Jesaya 65:21.

•   Horja na pamalaskon uhur: ”Na Hupilih ai, panganon ni sidea do na hinalojahon ni tanganni. Seng soya-soya sidea marhorja.”​—Jesaya 65:22, 23.

•   Seng dong be na boritan: ”Sada pe lang pangisini mangkatahon, ’[Boritan] do ahu’.”​—Jesaya 33:24.

•   Seng dong be halak na martikas: ”Bukaon ma ijai mata ni halak na mapitung, anjaha ungkabon pinggol ni halak na nengel; manlumpat-lumpat do ijai halak na repat songon ursa, anjaha marsurak-surak dilah ni halak na longah.”​—Jesaya 35:5, 6.

•   Seng dong be na marsitaronon: ”ApusanNi ma sagala iluh humbani mata ni sidea, seng dong be hamatean, age pusok ni uhur, age partangisan age halojaon seng dong be, ai domma salpu na parlobei in.”​—Pangungkabon 21:4.

•   Seng dong be porang: ”[Naibata] pasohkon parmunsuhan das hu ujung ni tanoh on.”​—Psalmen 46:10.

•   Hagoluhan sisadokah ni dokahni: ”Teanon ni halak parpintor do tanoh in, anjaha tongtong do sidea marianan ijin.”​—Psalmen 37:29.

13. Ise do na boi mambahen tanoh on gabe Paradeiso? Mase?

¹³ Seng boi manisia pasaudkon ai. Tapi halani dong kuasa bani Jahowa, haganup hinarosuhNi maningon saud. Anjaha seng dong na boi parontihon Ia. Bibel manghatahon, ”Seng dong na so boi bani Naibata.”​—Lukas 1:37.

14. Sonaha do nasiam boi masuk bani horbangan na manogu-nogu hu hagoluhan sisadokah ni dokahni?

¹⁴ Marhitei Saksi-Saksi Jahowa, Naibata mambere panorang bani halak na mabuei ase ’masuk bani horbangan na sompit’ na manogu-nogu hu hagoluhan sisadokah ni dokahni. Andohar nasiam dong i tongah-tongah ni sidea na marmalas ni uhur na manjalo ontangan ai. Andohar nasiam mandalankon ugama na sintong anjaha mangahapkon pasu-pasuNi sadokah ni dokahni!​—Mateus 7:13, 14.