PARLAJARAN 01

Aha ma Guna ni Bibel Hubanta?

PADALAN

Sihol do hita mambotoh pasal hagoluhan, hamatean, atap pasal ari magira. Sihol do homa hita mambotoh mase dong sitaronon. Ipingkirhon hita do homa sonaha mansarihon goluh siganup ari, atap sonaha ase martuah kaluarganta. Sasintongni, dong do balosni sungkun-sungkun ai ibagas Bibel. Anjaha dong do podah na marguna bani goluhta. Ai tongon do Bibel boi mangurupi hita?

1. Sungkun-sungkun aha do na dong balosni bani Bibel?

Bani Bibel dong do balos ni sungkun-sungkun sonon: Mase hita itompa? Mase bahat sitaronon? Aha do na masa bani halak na matei? Mase bahat parporangan? Aha do na laho masa i tanoh on bani ari magira? Anggo ra nasiam mandarami balosni ai, dapot nasiam ma holi balosni songon na domma iahapkon buei halak.

2. Sonaha Bibel boi mangurupi ase lambin dear goluhta?

Bahat podah na jenges dong ibagas Bibel. Umpamani, iajari do hita ase martuah kaluarganta. Dong homa podah na boi mangurupi sanggah sunsah pingkiranta, atap sonaha ase ringgas hita marhorja. Ganupan ai boi iparlajari ham humbani Bibel. Anjaha bahat nari ope na boi iulas hita. Holi iahapkon ham ma marguna do sagala na isurat ibagas Bibel.—2 Timoteus 3:16.

Bani buku on dong isurat ayat-ayat ni Bibel. Jadi dear do anggo ipareksa ham ganupan ayatni ase boi ibandingkon pakon aha na iparlajari ham.

PARLAJARI ROH BAHATNI

Pardiateihon ma sonaha Bibel boi mangurupi buei halak, sonaha ase rosuh hita mambasa Bibel, anjaha mase hita porlu iurupi laho mangarusi isini.

3. Bibel boi manogu-nogu hita

Bibel boi ipausih songon senter. Bibel boi mangurupi hita mambahen haputusan na dear. Janah iurupi do homa hita mambotoh aha na sihol masa bani ari na laho roh.

Basa ma Psalmen 119:105, janah ulas ma sungkun-sungkun on:

Pandapot ni panurat ni Psalmen, ipausih songon aha do Bibel ai?
Aha do pandapotmu pasal Bibel?

4. Bibel boi mambalosi sungkun-sungkunta

Dong sada naboru na bahat sungkun-sungkunni, janah domma martahun-tahun ipingkiri ia ai. Ujungni dapotsi ma balosni humbani Bibel. Tonton ma VIDEO, janah ulas ma sungkun-sungkun on:

VIDEO: Torus ma Darami Hasintongan! (1:48)

Sungkun-sungkun aha do na ipingkiri naboru ai?
Aha do gunani bani naboru ai dobkonsi ia marlajar Bibel?

Bibel mangojur ase hita mandarami balosni sungkun-sungkunta. Basa ma Mateus 7:7, janah ulas ma sungkun-sungkun on:

Sungkun-sungkun aha do na ongga ipingkirhon ham tarsingat hagoluhan on?

5. Ase rosuh mambasa Bibel

Buei halak rosuh mambasa Bibel janah bahat do gunani ai bani sidea. Tonton ma VIDEO, janah balosi ma sungkun-sungkun on:

VIDEO: Mambasa Bibel (2:05)

Mase na maposo bani video ai lang marosuh mambasa?
Aha do na mambahen sidea gabe rosuh mambasa Bibel?

Anggo ibasa hita Bibel, gabe tarapoh ma uhurta janah dong ma pangarapanta. Basa ma Rom 15:4, anjaha ulas ma sungkun-sungkun on:

Ai sihol do ham mambotoh sonaha janji na isurat bani Bibel boi mangapoh hita?

6. Ham boi iurupi na legan ase mangarusi isi ni Bibel

Bahat do halak lambin mangarusi isi ni Bibel halani iurupi halak na legan. Basa ma Lahoan 8:26-31, janah ulas ma sungkun-sungkun on:

Sonaha ase hita boi mangarusi isi ni Bibel?—Tonggor ma ayat 30 pakon 31.

Ase boi mangarusi na tarsurat in, porlu do halak Etiopia ai iurupi. Sonai homa sonari on, bahat do halak boi mangarusi isi ni Bibel halani iurupi halak na legan

ANGGO DONG NA MANGKATAHON: “Pabois-boiskon panorang do na marlajar Bibel ai.”