PARLAJARAN 06
Sonaha do Asal Mula ni Hagoluhan On?
Bibel mangkatahon, “[Naibata] do na manompa hagoluhan.” (Psalmen 36:9) Sonaha pandapotmu anggo adong na mangkatahon hagoluhan on sompong tarjadi janah lang adong na manompa? Ai setuju do ham? Tapi, anggo tongon do Naibata na manompa hagoluhan, tontu adong do tujuanni kan? a Pardiateihon hita ma na ihatahon Bibel pasal asal mula ni hagoluhan on, janah mase boi ihaporsayai hita ai.
1. Ise do na manompa langit pakon tanoh on?
Bibel mangkatahon, “Bani mula ni mulani itompa Naibata ma langit pakon tanoh.” (1 Musa 1:1) Bahat do ilmuwan na setuju anggo langit pakon tanoh on dong do mungkahni. Sonaha Naibata manjadihon ai? Igunahon Ia do hagogohan-Ni atap tonduy na pansing laho manompa haganup, tarmasuk ma galaksi, bintang, pakon planet.—1 Musa 1:2.
2. Aha do tujuan ni Naibata manompa tanoh on?
‘Sedo na laho soya-soya itompa Jahowa tanoh on, tapi itompa do ai ase boi iiankon.’ (Jesaya 45:18) Jenges tumang do tanoh on itompa. Ibahen Ia do tanoh on boi manggoki haporluan ni jolma. (Basa Jesaya 40:28; 42:5.) Ilmuwan pe mangkatahon legan do tanoh on pakon planet na legan halani pitah i tanoh on dassa manisia boi manggoluh.
3. Aha do na mambahen manisia legan pakon pinahan?
Dobkonsi itompa Jahowa tanoh on, itompa Ia ma suan-suanan pakon binatang. Dob ai, “itompa Naibata ma jolma songon rupa-Ni”. (Basa 1 Musa 1:27.) Aha do na mambahen manisia istimewa? Halani itompa songon rupa ni Naibata, gabe boi ma hita maniru sifat-sifat-Ni. Umpamani, ibotoh hita ma patuduhkon holong janah mambahen na adil. Boi homa hita marlajar piga-piga bahasa, malas uhurta mangidah na jenges ampa mambogei musik. Na sipontingan, sihol do hita manombah Naibata na manompa hita.
PARLAJARI ROH BAHATNI
Pardiateihon ma bukti-bukti na patuduhkon anggo hagoluhan on adong na manompa janah aha na ihatahon Bibel pasal ai boi ihaporsayai. Ulas hita homa aha na boi iparlajari hita pasal Naibata humbani sifat-sifat ni jolma.
4. Adong do na manompa hagoluhan on
Ipuji do ilmuwan halani maniru aha na itompa. Tapi sasintongni, ise do na maningon ipuji? Tonton ma VIDEO, janah ulas ma sungkun-sungkun on.
-
Penemuan aha do na ibahen ilmuwan na maniru tompaon?
Pasti adong do na pajongjongkon ganup rumah. Tapi ise ma na mambahen langit pakon tanoh ampa isini? Basa ma Heber 3:4, janah ulas ma sungkun-sungkun on:
-
Na ija do tompaon ni Naibata na berkesan bamu?
-
Masuk akal do anggo hita porsaya adong na manompa haganup na i langit pakon tanoh on? Mase?
Ai ibotoh ham do?
Bahat do video ampa artikel pasal topik on dong bani jw.org bagian “Apakah Ini Dirancang?” pakon “Pendapat tentang Asal Mula Kehidupan”.
“Tontu adong do na pajongjongkon ganup rumah, tapi Naibata do na manompa sagala na adong”
5. Masuk akal do na ihatahon Bibel pasal tompaon
Bani 1 Musa bindu 1, Bibel patugahkon sonaha Naibata manompa tanoh on ampa isini. Tongon do ai, atap pitah turi-turian? Tonton ma VIDEO, janah ulas ma sungkun-sungkun on.
-
Bibel mangkatahon sadokah onom ari Naibata manompa tanoh on ampa isini. Onom hali 24 jam do maksudni ijai?
-
Anggo iahap ham, masuk akal do na ihatahon Bibel pasal tompaon? Mase sonai balosmu?
Basa ma 1 Musa 1:1, anjaha ulas ma sungkun-sungkun on:
-
Ilmuwan mangkatahon dong do asal mula ni langit pakon tanoh on. Sonaha pandapot ni sidea ai sosok pakon ayat on?
Adong na mangkatahon igunahon Naibata do evolusi laho manompa sagala na manggoluh. Nini sidea pitah sada sel do mungkahni na itompa Naibata. Dob ai berevolusi ma ai gabe marragam jenis. Basa ma 1 Musa 1:21, 25, 27, janah ulas ma sungkun-sungkun on:
-
Ai dong do ihatahon i Bibel igunahon Naibata evolusi laho manompa sagala na manggoluh, umpamani ganup binatang ampa manisia? Atap marsiboan masamni bei do ai itompa?
6. Istimewa do jolma itompa Naibata
Itompa Naibata do manisia pakon binatang. Tapi adong do na mambahen jolma istimewa. Basa ma 1 Musa 1:26, janah ulas ma sungkun-sungkun on:
-
Domu bani ayat on, mase ma hita boi patuduhkon holong ampa idop ni uhur?
ANGGO DONG NA MANGKATAHON: “Turi-turian dassa na ihatahon Bibel pasal tompaon.”
-
Sonaha pandapotmu? Mase sonai balosmu?
RIMPUNAN
Jahowa do na manompa sagala na adong.
Na Dob Iparlajari
-
Aha do na ihatahon Bibel pasal asal mula ni hagoluhan?
-
Ai tongon do igunahon Naibata evolusi laho manompa haganup, atap humbani mungkahni domma marmasam ai itompa?
-
Aha do na mambahen manisia istimewa?
TONGGOR HOMA
Basa ma piga-piga contoh humbani tompaon na patuduhkon adong do Panompa.
“Aha do na Iparlajari Hita humbani Tompaon?” (Sedarlah! September 2006) (dong bani bahasa Indonesia)
Pardiateihon ma sonaha sada bapa patorangkon humbani Bibel pasal tompaon hubani anakni.
Ai sosok do ajaran evolusi pakon ajaran ni Bibel?
“Ai Tongon do Igunahon Naibata Evolusi Laho Manompa Sagala na Manggoluh?” (Artikel web) (dong bani bahasa Indonesia)
Aha do na ibuktihon humbani penemuan fosil atap percobaan ilmiah? Itompa do hagoluhan on atap sompong do adong ai?
Asal Mula Hagoluhan—Lima Sungkun-Sungkun na Porlu Irimangi (brosur) (dong bani bahasa Indonesia)
a Holi bani Parlajaran 25 iulas hita ma aha do tujuan ni Naibata manompa jolma.
