Sihol do Jahowa ase lambin itandai ham Ia. Mase? Halani anggo ibotoh ham sifat-sifat-Ni, ganup dalan-Ni, pakon harosuh-Ni, gabe sihol ma ham lambin orot parhasomananmu pakon-Si. (Basa Psalmen 25:14.) Tapi tongon do hita boi marhasoman pakon Naibata? Sonaha carani? Bani Bibel dong do balosni sungkun-sungkun ai. Ipatugah do homa parhasomanan pakon Jahowa do na sipontingan ibagas goluhta.

1. Aha do na iharosuhkon Jahowa hun bamu?

“Padohor ma dirimu bani Naibata anjaha padohoron-Ni ma diri-Ni bani nasiam.” (Jakobus 4:8) Aha do artini ayat on? Sihol do Jahowa ase ham gabe hasoman-Ni. Dong halak na mangahap anggo ia lang boi marhasoman pakon Naibata halani lang boi ididahni Naibata. Tapi marhitei Bibel ipatugah Jahowa do sonaha sifat-sifat-Ni ase ra hita dohor hu Bani. Jadi anggo ibasa hita Bibel, lambin orot ma parhasomananta pakon-Si age pe lang boi ididah hita Ia.

2. Mase boi ihatahon Jahowa ai Hasoman na sidearan?

Banggal tumang do holong ni Jahowa hubanta janah lang dong halak na sonai banggal ni holongni hubanta. Sihol do Ia ase martuah hita. Marosuh do Ia ase hita mangindo pangurupion-Ni. Bibel mangkatahon, “Ompaskon ma ganup holsoh ni uhurmu hu Bani, ai isarihon do nasiam.” (1 Petrus 5:7) Sirsir do Jahowa mangurupi, mangapoh, janah manangihon tonggonta.​—Basa Psalmen 94:18, 19.

3. Aha do na iarapkon Jahowa humbani ganup hasoman-Ni?

Holong do Jahowa bani ganup halak, tapi “pitah pakon halak na pintor maruhur do Ia marhasoman”. (Podah 3:32) Sihol do Jahowa ase hasoman-Ni mangkorjahon na madear janah padaohkon diri humbani na masambor. Dong halak na mangkatahon lang tarhorjahon sidea ganup na ipindo Jahowa. Tapi maidop do uhur ni Jahowa. Ihaholongi Ia do ise pe na marusaha mangkorjahon rosuh ni uhur-Ni.​—Psalmen 147:11; Lahoan 10:34, 35.

 PARLAJARI ROH BAHATNI

4. Jahowa marhasoman pakon si Abraham

Humbani sarita pasal si Abraham (atap si Abram) ibotoh hita ma aha do na porlu ibahen hita ase boi gabe hasoman ni Naibata, janah pasu-pasu aha do na laho ibere Naibata hubani hasoman-Ni. Basa ma sarita pasal si Abraham bani 1 Musa 12:1-4, janah ulas ma sungkun-sungkun on:

• Aha do na iparentahkon Jahowa hubani si Abraham?

• Aha do na ijanjihon Jahowa hu bani?

• Aha do na ibahen si Abraham dobkonsi manangar parentah ni Jahowa?

5. Na iarapkon Jahowa humbani ganup hasoman-Ni

Somalni dong do na iarapkon hita humbani ganup hasomanta.

• Aha ma na iarapkon ham ase ibahen hasomanmu bamu?

Basa ma 1 Johannes 5:3, janah ulas ma sungkun-sungkun on:

• Aha do na iarapkon Jahowa humbani ganup hasoman-Ni?

Ase boi idalankon hita parentah ni Jahowa, maningon iubah hita ma pingkiran ampa parlahounta. Basa ma Jesaya 48:17, 18, janah ulas ma sungkun-sungkun on:

• Mase ipindo Jahowa hasoman-Ni mambahen hamubahon?

 6. Jahowa sirsir mangurupi hasoman-Ni

 RIMPUNAN

Sihol do Jahowa gabe hasomanmu janah iurupi Ia do ham ase boi dohor hu Bani.

Na Dob Iparlajari

• Sonaha Jahowa mangurupi hasoman-Ni?

• Mase ipindo Jahowa hasoman-Ni mambahen hamubahon?

• Anggo iahap ham, ai borat do mandalankon parentah ni Jahowa? Mase sonai balosmu?