Anggo parholong do Naibata, mase bahat parugama na mangaku manombah Naibata hape mangkorjahon na jahat? Halani palsu do ugama ni sidea ai, janah ajaran pakon parlahou ni sidea mambahen sambor goran ni Naibata. Sonaha carani? Sonaha pangahap ni Naibata mangidah ai? Janah aha ma na laho bahenon ni Naibata bani sidea?

1. Sonaha ajaran ni ugama palsu pasamborhon goran ni Naibata?

Ugama palsu domma “manggantih hasintongan pasal Naibata gabe ajaran na salah”. (Rom 1:25) Umpamani, bahat do ugama lang mangajarhon pasal goran ni Naibata. Hape, Bibel mangajarhon maningon igunahon do goran ni Naibata. (Rom 10:13, 14) Leganni ai, sanggah masa sitaronon bahat pambobai ugama na mangajarhon humbani Naibata do ai, hape lang ongga Naibata mambahen hita marsitaronon. (Basa Jakobus 1:13.) Halani ajaran na salah ai, bahat halak gabe mandaoh humbani Naibata.

2. Sonaha parlahou ni ugama palsu pasamborhon goran ni Naibata?

Lang dos parlahou ni ugama palsu pakon Jahowa. Bibel mangkatahon “domma marjunjun dousani das hu langit”. (Pangungkabon 18:5) Humbani na hinan ronsi sonari bahat do ugama dihut marpolitik, mangojur halak marporang, anjaha bahat tumang do halak na ibunuh halani parentah ni sidea. Bahat do pambobai ugama na bayak tumang, hape na ipaksa sidea do anggotani mambere sumbangan. Ganupan ai patuduhkon anggo ugama palsu lang mananda Naibata. Jadi, lang sosok sidea gabe wakil ni Naibata.​—Basa 1 Johannes 4:8.

3. Sonaha pangahap ni Naibata hubani ugama palsu?

Magigi do ra ham dob mambotoh pambahenan ni ugama palsu ai. Sonai ma homa pangahap ni Jahowa. Age pe parholong Naibata ai, tapi magigi do Ia mangidah parlahou ni pambobai ugama na pasamborhon goran-Ni. Marah do Ia mangidah parlahou ni sidea na jahat bani anggotani. Jadi ripaskonon-Ni do holi ugama palsu anjaha “lang idahon be ai”. (Pangungkabon 18:21) Lang piga dokah nari saud ma ai.​—Pangungkabon 18:8.

 PARLAJARI ROH BAHATNI

4. Lang ijalo Naibata ganup ugama

Buei halak na mangkatahon anggo ugama ai usih songon bahat dalan tapi sarupa tujuanni, ai ma hubani Naibata. Tongon do ai? Basa ma Mateus 7:13, 14, janah ulas ma sungkun-sungkun on:

• Bani ayat on, dalan na sonaha do na hu hagoluhan?

Tonton ma VIDEO, dob ai balosi ma sungkun-sungkun on.

• Ai adong do ihatahon bani Bibel anggo ganup ugama boi pasonangkon Naibata?

 6. Naibata sihol paluahkon halak hun ugama palsu

Basa ma Pangungkabon 18:4, a janah ulas ma sungkun-sungkun on:

• Sonaha pangahapmu dob mambotoh anggo Naibata sihol paluahkon halak hun ugama palsu, anjaha aha do na porlu ibahen ham?

7. Torus ma marlajar pasal Naibata na sintong

Halani sambor pambahenan ni ugama palsu, ai gabe kecewa do ham hubani Naibata? Bayangkon ma sada niombah na lang ra manangihon bapani. Kaluar ma ia hun rumah janah ujungni sambor ma goluhni. Lang marosuh bapani ai mangidah aha na ibahen niombahni ai. Jadi, ai sosok do anggo bapani na isalahkon halani sambor goluhni anakni ai?

• Ai sosok do isalahkon hita Jahowa halani hajahaton ni ugama palsu, janah lang ra be hita marlajar pasal Naibata?

 RIMPUNAN

Ugama palsu domma pasamborhon goran ni Naibata marhitei ajaran pakon pambahenan ni sidea. Lang piga dokah nari ripaskonon ni Naibata do ganup ugama palsu.

Na Dob Iparlajari

• Sonaha pangahapmu dob mambotoh ajaran pakon parlahou ni ugama palsu?

• Sonaha pangahap ni Jahowa hubani ugama palsu?

• Aha do na laho bahenon ni Naibata bani ganup ugama palsu?