PARLAJARAN 15

Ise do Jesus?

PADALAN

Ise do Jesus?

Humbai na hinan, bahat do halak na mambogei pasal Jesus. Tapi lang bahat na mambotoh ise do ia sasintongni. Janah marmasam do pandapot ni halak pasalsi. Aha do sasintongni na iajarhon Bibel pasal Jesus?

1. Ise do Jesus?

Sada malekat na gogoh do ia janah tading i surga. Domma itompa Jahowa ia paima na legan itompa. Halani ai isobut ma ia “na parlobei itompa humbani sagala na tinompa”. (Kolosse 1:15) Isobut do homa ia ‘Anak ni Naibata na sasada in’ halani Jahowa sandiri na manompa ia. (Johannes 3:16) Dob ai, iurupi Jesus do Bapani laho manompa sagala na adong. (Basa Podah 8:30.) Ai do na mambahen dohor tumang ia pakon Jahowa. Tongtong do ia padaskon tonah pakon parentah ni Bapani. Halani ai, isobut ma ia “Hata”.—Johannes 1:14.

2. Mase roh Jesus hu tanoh on?

Hira-hira 2.000 tahun na salpu, marhitei tonduy na pansing ipapindah Jahowa ma hagoluhan ni Jesus hun surga hu rahim ni sada anak boru na margoran si Maria. Sonai ma carani Jesus tubuh gabe jolma. (Basa Lukas 1:34, 35.) Jesus roh hu tanoh on laho gabe Mesias atap Kristus na dob ijanjihon, laho paluahkon jolma humbani dousa ampa hamatean. a Ganup panjahaion ni Bibel pasal Mesias saud bani Jesus. Halani ai, gabe boi ma ibotoh halak Jesus ai do “Kristus, anak ni Naibata na manggoluh in”.—Mateus 16:16.

3. Ija do Jesus sonari?

Dobkonsi ipapuho, mulak ma use Jesus hu surga. Ijai, “ibere Naibata do hu bani ianan na sigijangan lobih humbani iananni na hinan”. (Pilippi 2:9) Sonari, domma gabe malekat na gogoh tumang Jesus, anjaha pitah Jahowa dassa na sibanggalan marimbangkonsi.

PARLAJARI ROH BAHATNI

Parlajari hita ma ise do Jesus ai sasintongni, janah mase porlu ibotoh hita pasalsi.

4. Sedo Naibata Pargogoh na So Tarimbang Jesus ai

Hassi pe Jesus ai sada malekat na gogoh i surga, tapi unduk do ia bani Jahowa, Bapani. Tonton ma VIDEO laho mambotoh aha do na ihatahon Bibel na gabe bukti anggo Jesus ai sedo Naibata Pargogoh na So Tarimbang.

VIDEO: Ai Naibata do Jesus Kristus? (3:22)

Ayat-ayat on boi mangurupi hita laho mambotoh legan do Jahowa pakon Jesus. Basa ma ganup ayatni, dob ai balosi ma sungkun-sungkunni.

Basa ma Lukas 1:30-32.

Aha do na ihatahon malekat ai na patuduhkon anggo Jesus sedo Naibata na “Sitimbulan”?

Basa ma Mateus 3:16, 17.

Sanggah ididi Jesus, dong sora hun langit. Aha ma na ihatahonni?
Anggo iahap ham, sora ni ise ma ai?

Basa ma Johannes 14:28.

Anggo iahap ham, ise do na tuanan janah banggalan kuasani, bapa do atap anak?
Sanggah idilo Jesus Jahowa ai Bapa, aha do maksudni?

Basa ma Johannes 12:49.

Domu bani ayat on, ai adong do ihatahon Jesus anggo ia sarupa pakon Bapani? Aha ma na iparlajari ham hunjai?

5. Bukti-bukti na patuduhkon Jesus do Mesias

Mesias ai ma halak na ipilih Naibata laho paluahkon jolma. Bahat do panjahaion na patugahkon pasal Mesias. Ganup panjahaion ai boi mangurupi halak mananda ise do na gabe Mesias. Tonton ma VIDEO laho mambotoh piga-piga panjahaion na saud bani Jesus.

VIDEO: Jesus do Mesias na Domma Ipatugah Hinan (3:03)

Basa ma ayat na marisi panjahaion pasal Mesias, janah ulas ma sungkun-sungkun on:

Basa ma Mika 5:2 laho mambotoh ija do holi Mesias itubuhkon. b

Ai tongon do Jesus tubuh i Betlehem songon na ipatugah bani ayat ai?—Mateus 2:1.

Basa ma Psalmen 34:20 pakon Sakaria 12:10 na patugahkon pasal parmatei ni Mesias.

Ai saud do ganup panjahaion ai?—Johannes 19:33-37.
Anggo iahap ham, boi do ibahen Jesus ase pas saud bani dirini panjahaion ai?
Jadi, pos do uhurmu anggo Jesus ai Mesias?

6. Bahat do gunani anggo iparlajari hita pasal Jesus

Bibel patugahkon ponting tumang do iparlajari hita pasal Jesus ampa tugas na ibere Naibata hu bani. Basa ma Johannes 14:6 pakon 17:3, janah ulas ma sungkun-sungkun on:

Mase ponting tumang iparlajari hita pasal Jesus?

Jesus do dalan ase boi hita marhasoman pakon Naibata. Iajarhon ia do hasintongan pasal Jahowa, janah marhitei Jesus hita boi mandapot hagoluhan na sadokah ni dokahni

ANGGO DONG NA MANGKATAHON: “Lang porsaya Saksi Jahowa bani Jesus.”