PARLAJARAN 17

Sonaha do Sifat ni Jesus?

PADALAN

Anggo ibasa hita pasal na ihatahon ampa na iajarhon Jesus sanggah ia i tanoh on, lambin itanda hita ma sifat-sifatni. Gabe sihol ma hita dohor hu bani, sonai homa hubani Jahowa. Aha do sifat-sifat ni Jesus? Janah sonaha hita maniru sifatni ai?

1. Mase ihatahon Jesus ai sarupa pakon Bapani?

Paima roh hu tanoh on, domma marmiliar tahun Jesus tading i surga rap pakon Jahowa, Bapani. Sadokah ai, ipardiateihon ia ma sifat-sifat ni Bapani. Hasilni gabe dos ma sifat, pangahap, ampa pambahenanni songon Bapani. (Basa Johannes 5:19.) Halani ai ihatahon Jesus ma, “Barang ise na mangidah ahu, domma mangidah Bapa in.” (Johannes 14:9) Jadi anggo ibotoh ham sifat-sifat ni Jesus, lambin itanda ham ma homa sifat-sifat ni Jahowa. Contohni, sanggah ipatuduh Jesus holongni hubani halak, gabe ibotoh ham ma holong do uhur ni Jahowa bamu.

2. Sonaha Jesus patuduhkon holong ni uhurni bani Jahowa?

Jesus mangkatahon, “Huhorjahon do aha pe na iparentahkon Bapa in, ase ibotoh dunia on na holong do uhurhu bani Bapa in.” (Johannes 14:31) Sanggah i tanoh on, tongtong do unduk Jesus hubani Bapani hassi pe lang urah mangkorjahon ai. Leganni ai, marosuh do ia mansaritahon pasal Bapani janah iurupi do halak ase boi marhasoman pakon Bapani.—Johannes 14:23.

3. Sonaha Jesus patuduhkon holong ni uhurni bani jolma?

Bibel mangkatahon ‘holong tumang do uhur ni Jesus hubani manisia’. (Podah 8:31) Ipatoguh anjaha iurupi ia do sidea. Halani idop ni uhurni, ibahen Jesus do mukjizat. (Markus 1:40-42) Bujur do homa ia bai ganup halak janah lang sitonggor jumbak atap pilih kasih. Tarapoh do halak na lamlam maruhur dob manangar ajaranni. Ra do homa ia matei laho mangkopkop ganup jolma. Hunjon taridah ma holong tumang do uhur ni Jesus bani jolma. Tapi, holongan do ia hubani halak na ra mandalankon titahni.—Basa Johannes 15:13, 14.

PARLAJARI ROH BAHATNI

Ulas hita ma lambin bahat pasal sifat ni Jesus. Anjaha ulas hita homa sonaha hita boi maniru holong ampa habujuronni.

4. Holong do uhur ni Jesus bani Bapani

Humbani siusihan na ibahen Jesus, gabe ibotoh hita ma sonaha mangkaholongi Naibata. Basa ma Lukas 6:12 pakon Johannes 15:10; 17:26. Dobkonsi ibasa, ulas ma sungkun-sungkun on:

Songon na ibahen Jesus, sonaha hita boi mangkaholongi Jahowa?

Holong do uhur ni Jesus bani Bapani janah gati do ia marsahap pakon-Si ibagas tonggo

5. Parduli do Jesus bani halak

Ipalobei Jesus do haporluan ni halak marimbangkon haporluanni. Age pe domma loja, tapi ra do ia mangurupi na legan. Basa ma Markus 6:30-44, janah ulas ma sungkun-sungkun on:

Hunja ibotoh hita anggo Jesus parduli hubani na legan?—Tonggor ma ayat 31, 34, 41, pakon 42.
Mase ra Jesus mangurupi halak?—Tonggor ma ayat 34.
Humbani pambahenan ni Jesus ai, aha ma na ibotoh ham pasal Jahowa?
Songon Jesus, sonaha hita patuduhkon anggo hita parduli bani na legan?

6. Pardear layak do Jesus

Age pe lang bahat artani, tapi pardear layak do Jesus janah iojur do homa hita ase sonai. Basa ma Lahoan 20:35, janah ulas ma sungkun-sungkun on:

Nini Jesus, aha ma na mambahen hita martuah?

Tonton ma VIDEO, janah ulas ma sungkun-sungkun on:

VIDEO: “Martuahan do Halak na Mambere”—Cuplikan (4:00)

Anggo lang bahat duitta, sonaha carani ase boi hita marsibere-bere?

Ai ibotoh ham do?

Bibel mangajarhon ase hita martonggo marhitei goran ni Jesus. (Basa Johannes 16:23, 24.) Anggo ibahen hita sonai, on patuduhkon ihargai hita do aha na dob ibahen Jesus laho padohorhon hita hubani Jahowa.

ANGGO DONG NA MANGKATAHON: “Sanggah marsitaronon, na iuji Naibata do hita ijai.”

Sonaha pambahenan ni Jesus patuduhkon sedo Naibata na mambahen hita marsitaronon?

RIMPUNAN

Ihaholongi Jesus do Jahowa, janah ihaholongi ia do homa jolma. Itiru Jesus do Bapani. Jadi lambin bahat na ibotoh ham pasal Jesus, lambin itanda ham ma homa Jahowa.