PARLAJARAN 18

Aha do Tanda ni Halak Kristen na Sintong?

PADALAN

Dong marmiliar halak i sab tanoh on na mangaku Kristen, tapi lang sarupa na idalankon pakon na ihaporsayai sidea. Jadi, hunja boi ibotoh hita ise do halak Kristen na sintong?

1. Ise do halak Kristen ai?

Halak Kristen ai ma halak na mangihutkon ajaran ni Jesus Kristus. (Basa Lahoan 11:26.) Sonaha sidea mambuktihon ai? Ihatahon Jesus do, “Anggo totap idalankon hanima hatangku, sintong ma hanima susianku.” (Johannes 8:31) Jadi maningon idalankon sidea do ajaran ni Jesus. Sanggah i tanoh on, Hata ni Naibata do na iajarhon Jesus. Halani ai, haporsayaon ni halak Kristen pe maningon mangihutkon Bibel.—Basa Lukas 24:27.

2. Sonaha halak Kristen na sintong patuduhkon holong?

Ihatahon Jesus do bani susianni, “Marsihaholongan ma hanima songon ahu na mangkaholongi hanima.” (Johannes 15:12) Sonaha Jesus mangkaholongi susianni? Ipasirsir do panorangni laho marbuali pakon sidea. Ipatoguh anjaha iurupi do sidea, janah sirsir do ia matei bani sidea. (1 Johannes 3:16) Sonai ma homa halak Kristen na sintong, ipatuduh do holongni marhitei parsahap pakon parlahou.

3. Aha ma tugas na maningon ihorjahon halak Kristen na sintong?

Ibere Jesus do tugas hubani susianni. “Isuruh ma sidea mambaritahon Harajaon ni Naibata.” (Lukas 9:2) Bani abad na parlobei, huja pe laho do sidea marbarita, lang pitah i rumah panumbahan. (Basa Lahoan 5:42; 17:17.) Sonai ma homa na ibahen halak Kristen na sintong sonari on. Halani mangkaholongi na legan, ringgas do sidea marbarita hubani ganup halak. Ipatugah sidea do janji ini Bibel pasal ari simagira.—Markus 12:31.

PARLAJARI ROH BAHATNI

Ulas hita ma aha do beda ni halak Kristen na sintong pakon halak na so ra mangihutkon ajaran ni Jesus ampa siusihan na ibahenni.

4. Iparlajari sidea do hasintongan ni Bibel

Ringgas do halak Kristen bani abad na parlobei mamparlajari Hata ni Naibata

Bahat halak na mangaku Kristen mangkatahon anggo isi ni Bibel ai lang porlu iparlajari. Tonton ma VIDEO, dob ai balosi ma sungkun-sungkun on.

VIDEO: Mulai ma Adong Halak Kristen na Lang Sintong (5:11)

Aha ma na ibahen gareja ase ulang ibotoh halak ajaran ni Jesus?

Hasintongan ni Bibel do na iajarhon Jesus. Basa ma Johannes 18:37, janah ulas ma sungkun-sungkun on:

Nini Jesus, aha ma na ibahen halak Kristen na “mangihutkon hasintongan”?

5. Ibaritahon sidea do hasintongan ni Bibel

Marbarita do halak Kristen bani abad na parlobei bani na legan

Paima naik hu surga, ibere Jesus do tugas na maningon ihorjahon susianni ronsi sonari. Basa ma Mateus 28:19, 20 pakon Lahoan 1:8, janah ulas ma sungkun-sungkun on:

Ronsi attigan janah das huja do susian ni Jesus marbarita?

6. Idalankon sidea do aha na iajarhon

Aha do na mambahen pos uhur ni si Tom domma jumpahsi hasintongan? Tonton ma VIDEO, dob ai balosi ma sungkun-sungkun on.

VIDEO: Lang Porsaya be Ahu bani Ugama (5:20)

Mase lang porsaya be si Tom bani ugama?
Aha do na mambahen pos uhurni domma jumpahsi hasintongan?

Anggo mangaku sasahalak susian ni Jesus do ia, maningon ipatuduh ma ai marhitei parlahouni. Basa ma Mateus 7:21, janah ulas ma sungkun-sungkun on:

Mase nini Jesus lang sungkup pitah mangaku anggo hita susianni?

7. Marsihaholongan do sidea

Marsihaholongan do halak Kristen bani abad na parlobei

Ai tongon do adong halak Kristen na ra matei bani hasomanni? Tonton ma VIDEO, janah ulas ma sungkun-sungkun on.

VIDEO: Sirsir do Ia Matei bani Hasomanni (2:55)

Mase si Lloyd ra matei bani si Johansson?
Anggo iahap ham, taridah do anggo si Lloyd ai halak Kristen na sintong?

Basa ma Johannes 13:34, 35, janah ulas ma sungkun-sungkun on:

Sonaha pambahenanni susian ni Jesus bani suku atap bangsa na legan?
Halani marsihaholongan, aha ma na ibahen halak Kristen na sintong sanggah masa porang?

ANGGO DONG NA MANGKATAHON: “Huja pe hita margareja, sarupa do ai. Na ponting porsaya bani Jesus.”