Lang marosuh Jahowa bani na geor. (1 Korint 14:33) Jadi sihol do Ia ase taratur juakjuak-Ni. Anggo sonai, sonaha do kuria Kristen iatur? Aha ma na maningon ibahen hita ase boi mardalan dear ganupan?

1. Ise do na gabe kopala ni kuria?

“Kristus do kopala ni kuria.” (Epesus 5:23) Ipardiateihon ia do hun surga ganup juakjuak ni Jahowa i sab tanoh on. Ipilih Jesus do “juakjuak na bujur anjaha na maruhur”, ai ma sakalompok sintua na marpangalaman. Isobut do sidea Pangurus Pusat. (Basa Mateus 24:45-47.) Songon na ibahen apostel bani abad na parlobei, ibere sidea ma tugah-tugah bani ganup kuria. (Lahoan 15:2) Tapi sedo sidea na mamimpin organisasinami. Ipareksa sidea do Bibel ase boi mangihutkon harosuh ni Jahowa pakon Jesus.

2. Aha do tugas ni sintua?

Sintua ai ma dalahi-dalahi na setia mangidangi Jahowa. Sidea do na mangajari i kuria, janah Bibel do na iihutkon. Ipatoguh anjaha iurupi sidea do sanina botou. Lang igaji sidea mangkorjahon ai. Humbani ‘malas ni uhur do sidea mangidangi i lobei ni Naibata; sedo laho mambuat untung, tapi halani hinsah ni uhur do’. (1 Petrus 5:1, 2) Adong do homa siparugas na mangurupi sintua i kuria. Anggo domma memenuhi syarat, boi do holi sidea ilantik gabe sintua.

Bahat do sintua na ilantik Pangurus Pusat gabe sintua kaliling. Tugas ni sintua kaliling ai ma mambere tugah-tugah ampa patoguhkon sanina botou i kuria. Anggo adong dalahi-dalahi na memenuhi syarat ni Bibel, ilantik sintua kaliling ma sidea gabe siparugas atap sintua.​—1 Timoteus 3:1-10, 12; Titus 1:5-9.

3. Aha do tugas ni ganup Saksi Jahowa?

Ganup halak i kuria boi ‘mamuji goran ni Jahowa’ sanggah i partumpuan. Anjaha maningon marbarita do ganup Saksi domu humbani tuk ni gogohni.​—Basa Psalmen 148:12, 13.

 PARLAJARI ROH BAHATNI

4. Sahalak pamimpin na bujur do Jesus ai

Iarahkon Jesus do ase roh hita hu bani. Basa ma Mateus 11:28-30, janah ulas ma sungkun-sungkun on:

• Pamimpin na sonaha do Jesus ai, janah aha ma na sihol bahenonni hubanta?

5. Ipatuduh sintua do siusihan na dear

1. Marusaha do sintua ase ia pakon kaluargani lambin dohor bani Jahowa

2. Parduli do sintua bani ganup halak i kuria

3.   Ringgas do sintua marbarita

4. Hata ni Naibata do na iajarhon sintua, janah ra do homa sidea mangkorjahon tugas na legan

6. Rap marhorja ma hita pakon sintua

Ipatugah do bani Bibel mase porlu hita rap marhorja pakon sintua. Basa ma Heber 13:17, janah ulas ma sungkun-sungkun on:

• Mase Bibel mangojur hita ase unduk hubani sintua? Sonaha pandapotmu pasal ai?

Basa ma Lukas 16:10, janah ulas ma sungkun-sungkun on:

• Mase ponting idalankon hita ganup tugah-tugah na ibere sintua?

 RIMPUNAN

Jesus do kopala ni kuria. Itiru sintua do Jesus, bujur do sidea janah ipatoguh do hita. Halani ai malas do uhurta rap marhorja pakon sidea.

Na Dob Iparlajari

• Ise do kopala ni kuria?

• Sonaha sintua mangurupi ganup halak i kuria?

• Aha do tugas ni ganup Saksi Jahowa?