PARLAJARAN 21
Sonaha Ambilan na Madear Ibaritahon?
Lang piga dokah nari, isasap Naibata ma ganup sitarononta marhitei Harajaon-Ni. Tontu porlu do buei halak manangar barita on! Iparentahkon Jesus do homa bani susianni ase mambaritahon ambilan na madear ai bani ganup halak. (Mateus 28:19, 20) Jadi, sonaha Saksi Jahowa mandalankon parentah on?
1. Sonaha Mateus 24:14 domma saud sonari on?
Jesus mangkatahon, “Ibaritahon do ambilan na madear pasal Harajaon in i sab dunia on.” (Mateus 24:14) Malas do uhur ni Saksi Jahowa mangkorjahon tugas na ponting on. Ibaritahon hanami do barita ai lobih hun 1.000 bahasa! Ase boi dear ganup, porlu do iatur horja on janah bahat do na maningon ihorjahon. Ganup horja on boi marhasil halani pangurupion ni Jahowa.
2. Aha do na ibahen hanami ase boi marbarita bani ganup halak?
Marbarita do hanami bai ganup halak ija pe sidea boi ijumpahi. Songon halak Kristen bani abad na parlobei, marbarita do hanami “hun rumah hu rumah”. (Lahoan 5:42) Marhitei cara on, gabe boi ma ijumpahi hanami marjuta halak ganup tahun. Halani bahat homa halak na lang i rumah, marbarita ma hanami i tempat umum songon i taman, i tiga, atap i terminal. Marusaha do hanami patugahkon pasal Jahowa ampa harosuh-Ni bani ganup halak.
3. Ise do na maningon patugahkon barita na madear?
Ganup susian ni Jesus maningon marbarita hubani ganup halak. Tugas na ponting do on bannami. Marusaha do hanami humbani gok ni uhurnami mangkorjahon ai halani barita on boi paluahkon jolma. (Basa 1 Timoteus 4:16.) Lang igaji hanami sanggah mangkorjahon ai, halani Bibel mangkatahon, “Ijalo hanima ai lang mambayar, bere hanima ma ai lang mambayar.” (Mateus 10:7, 8) Hassi pe lang ganup ra manangar, tongtong do hanami marbarita halani unduk do hanami bani Jahowa janah sihol pamalaskon uhur-Ni.
PARLAJARI ROH BAHATNI
Parlajari ma aha na ibahen Saksi Jahowa laho marbarita hu sab dunia on, janah sonaha Jahowa mangurupi hanami.
Mangambilankon barita na madear i sab dunia on: (A) Kosta Rika, (B) Amerika Serikat, (C) Benin, (D) Thailand, (E) Yap, (F) Swedia
4. Marusaha do hanami manjumpahi ganup halak
Marusaha do Saksi Jahowa marbarita bani ganup halak ija pe sidea boi ijumpahi. Tonton ma VIDEO, dob ai balosi ma sungkun-sungkun on.
-
Humbani video ai, aha do na paling berkesan itonggor ham na ibahen Saksi Jahowa?
Basa ma Mateus 22:39 pakon Rom 10:13-15, janah ulas ma sungkun-sungkun on:
-
Sonaha horja parambilanonnami patuduhkon anggo hanami mangkaholongi halak na legan?
-
Sonaha pangahap ni Jahowa mangidah halak na mambaritahon ambilan na madear?—Tonggor ma ayat 15.
5. Hasoman sahorja ni Naibata do hanami
Bahat pangalaman patuduhkon Jahowa do na mangurupi horja parambilanonnami. Pardiateihon ma pangalaman ni si Paul na tading i Selandia Baru. Sanggah marbarita hun rumah hu rumah, pajumpah ma ia pakon sada naboru. Hape bani sogod ni ari ai, domma martonggo naboru ai bani Jahowa. Ipindo ia ma ase dong halak na manjumpahisi. “Tolu jam dobkonsi ai, das ma ahu hu rumahni”, nini si Paul.
Basa ma 1 Korint 3:9, janah ulas ma sungkun-sungkun on:
-
Sonaha pangalaman na i Selandia Baru ai patuduhkon Jahowa do na mangurupi horja parambilanonnami?
Basa ma Lahoan 1:8, janah ulas ma sungkun-sungkun on:
-
Mase maningon iurupi Jahowa hanami sanggah marbarita?
Ai ibotoh ham do?
Adong do partumpuan tongah minggu. Ijai ilatih do hanami ase lambin pandei marbarita. Anggo domma ididah ham ai i partumpuannami, sonaha pandapotmu pasal ai?
6. Idalankon hanami do parentah ni Naibata
Bani abad na parlobei, ilarang do susian ni Jesus marbarita. Tapi ipakei sidea do ‘hukum laho mampartahankon hak-ni ase boi totap marbarita’. (Pilippi 1:7) Sonai ma homa na ibahen Saksi Jahowa sonari on. a
Basa ma Lahoan 5:27-42, janah ulas ma sungkun-sungkun on:
-
Hassi pe ilarang, mase hanami totap marbarita?—Tonggor ma ayat 29, 38, pakon 39.
ANGGO DONG NA MANUNGKUN: “Mase roh Saksi Jahowa hun rumah hu rumah?”
-
Sonaha ma ham mambalosi ai?
RIMPUNAN
Iparentahkon Jesus do susianni laho marbarita hubani ganup halak. Ipargogohi anjaha iurupi Jahowa do juakjuak-Ni laho mandalankon parentah ai.
Na Dob Iparlajari
-
Sonaha ambilan na madear ibaritahon i sab dunia on?
-
Sonaha horja parambilanonnami patuduhkon anggo hanami mangkaholongi halak na legan?
-
Pandapotmu, gabe marmalas ni uhur do hita anggo marbarita? Mase sonai balosmu?
TONGGOR HOMA
Pardiateihon ma sonaha Saksi Jahowa marbarita i kota-kota na bahat pendudukni.
Program Khusus Marbarita hu Daerah Metropolitan i Paris (5:11) (Dong bani bahasa Indonesia)
Sonaha Saksi Jahowa marbarita hubani pengungsi?
Patoguhkon Halak na i Pengungsian (5:59) (Dong bani bahasa Indonesia)
Tonton ma pangalaman ni sada naboru na marmalas ni uhur halani dihut bani dinas sepenuh waktu.
Lang Manosal Ahu Dihut bani Dinas Sepenuh Waktu (6:29) (Dong bani bahasa Indonesia)
Basa ma piga-piga contoh keputusan pengadilan na mambahen hanami boi totap marbarita.
“Parbarita Harajaon Mamboan Parkara ni Sidea hu Pengadilan” (Kerajaan Allah Memerintah!, pasal 13) (dong bani bahasa Indonesia)
a Naibata do na marsuruh hanami marbarita. Halani ai, lang maningon adong ijin humbani pamarentah ase boi Saksi-Saksi Jahowa marbarita.
