PARLAJARAN 22

Sonaha Ase Boi Ham Marbarita?

PADALAN

Dob ibotoh ham hasintongan ni Bibel, ra do adong ibagas uhurmu, ‘Maningon ibotoh halak do homa on!’ Tongon do ai! Tapi ra do mabiar ham mansaritahon ai bani na legan. Ulas hita ma sonaha ase lang mabiar ham, janah sonaha carani ase rosuh ham mansaritahon barita na madear on.

1. Sonaha ham boi mansaritahon na dob iparlajari hubani na legan?

Ihatahon susian ni Jesus do, “Ai seng tarbahen hanami lang mangkatahon na dob ididah ampa ibogei hanami.” (Lahoan 4:20) Rosuh tumang sidea bani ajaran ni Jesus. Halani ai malas uhur ni sidea mansaritahon ai bani na legan. Sonai do homa ham? Anggo sonai, saritahon ma ai hubani kaluarga pakon hasomanmu. Tapi dear ma bahen carani.—Basa Kolosse 4:6.

Piga-piga cara na boi ibahen ham

Sanggah marbuali pakon kaluarga, patugah ma topik hun Bibel. Hatahon ma sonon, “Adong dabah na menarik na huparlajari minggu on.”
Anggo adong hasoman na boritan atap holsohan, patugah ma ayat na boi patoguhkon uhurni.
Anggo adong hasoman na manungkun pasal kegiatanmu, saritahon ma na iparlajari ham hun Bibel atap i partumpuan.
Patuduh ma situs jw.org hubani hasomanmu.
Arahkon ma hasomanmu ase rup marlajar Bibel pakon ham, atap ajari ma ia mangisi formulir i jw.org laho mangindo parlajaran Bibel.

2. Mase porlu hita marbarita rap pakon hasoman i kuria?

Hinan, susian ni Jesus marbarita lang pitah hubani halak na itanda. ‘Isuruh Jesus do sidea mardua-dua hu ganup huta’ laho marbarita. (Lukas 10:1) Halani pengaturan ai lambin bahat ma halak na manangar barita na madear. Gabe marmalas ni uhur ma susianni ai. (Lukas 10:17) Sihol do homa ham dihut marbarita pakon hasoman i kuria?

PARLAJARI ROH BAHATNI

Ulas hita ma sonaha ase ulang mabiar ham sanggah marbarita, janah sonaha ase boi ham mangahapkon malas ni uhur sanggah mangkorjahon ai.

3. Sai ihasomani Jahowa do ham

Adong do halak na lang pag marbarita halani lang ibotoh aha na laho sihatahononni, atap mabiar lang marosuh halak bani baritani.

Ra do ham mansaritahon aha na dob iparlajari ham? Mase sonai balosmu?

Tonton ma VIDEO, dob ai balosi ma sungkun-sungkun on.

VIDEO: Martonggo do Ahu bani Jahowa Ase Barani (4:05)

Aha ma na ibahen na maposo bani video ai ase barani?

Basa ma Jesaya 41:10, janah ulas ma sungkun-sungkun on:

Sanggah mabiar ham laho marbarita, mase maningon martonggo ham?

Ai ibotoh ham do?

Bahat do Saksi Jahowa na mungkahni lang pag patugahkon aha na dob iparlajari hubani na legan. Sonai ma na iahapkon hasomanta si Sergey. Parmaila tumang do ia janah urah-urah mandolei. Tapi dob ai marlajar Bibel ma ia. Nini ma, “Hassi pe mabiar, marusaha do ahu patugahkon aha na dob huparlajari bani na legan. Lang husangka dob huhorjahon ai, lambin percaya diri ma ahu. Anjaha gabe ipatoguh do homa haporsayaonku.”

4. Basar janah lamlam ma

Paima marbarita, pingkirhon ma aha na laho ihatahon janah sonaha padaskon ai. Basa ma 2 Timoteus 2:24 pakon 1 Petrus 3:15, janah ulas ma sungkun-sungkun on:

Sonaha ayat ai boi mangurupi ham sanggah patugahkon hasintongan ni Bibel?
Aha ma na ibahen ham sanggah dong kaluarga atap hasomanmu na lang marosuh manangar baritamu? Tapi aha na lang boi ibahen ham?
Mase dearan ibahen hita sungkun-sungkun laho mangulas sada topik marimbangkon mangambilani sidea?

5. Gabe marmalas ni uhur do hita sanggah marbarita

Isuruh Jahowa do Jesus laho mambaritahon ambilan na madear. Sonaha pangahap ni Jesus bani tugasni ai? Basa ma Johannes 4:34, janah ulas ma sungkun-sungkun on:

Anggo ipangan hita sipanganon na margizi, gabe sehat ma hita janah malas ma uhurta. Songon sipanganon do bani Jesus mangkorjahon harosuh ni Naibata, tarmasuk marbarita. Mase ihatahon ia sonai?
Anggo iahap ham, mase gabe malas uhurta anggo hita marbarita?

Coba ham ma on

I partumpuan tongah minggu, pardiateihon ma sonaha hasomanta mamungkah parsahapan bani pertunjukan.
Patugah ma bani Saksi na mangajari ham anggo ham sihol gabe Siswa i partumpuan tongah minggu. Holi gabe iurupi ma ham ase lambin dear marbarita.
Gunahon ma bagian “Anggo Dong na Mangkatahon” atap “Anggo Dong na Manungkun” bani buku on laho marlatih sonaha mambalosi pandapot atap pe sungkun-sungkun ni halak.

ANGGO DONG NA MANUNGKUN: “Sonaha kabarmu?”

Sonaha ham boi manggunahon panorang sisonai laho patugahkon aha na dob iparlajari ham hun Bibel?

RIMPUNAN

Gabe malas do uhurta anggo hita marbarita, anjaha sasintongni lang pala payah mangkorjahon ai.

Na Dob Iparlajari

Mase porlu hita marbarita?
Sonaha carani ase lamlam janah basar ham sanggah marbarita?
Sonaha carani ase lang mabiar ham laho marbarita?

Salosei iparlajari tanggal:

Na Laho Ibahen

Pingkirhon ma hira-hira hubani ise ma ham boi marbarita. Pingkirhon ma homa aha na laho ihatahon, sonaha padaskon ai, janah attigan panorang na sosok.

Na laho ibahen use:

Your other goal