Jesus mangajarhon maningon ididi do hita ase boi gabe halak Kristen. (Basa Mateus 28:19, 20.) Jadi sonaha do pandidion ai ibahen? Anjaha aha do na maningon ibahen sasahalak ase boi ididi?

1. Sonaha pandidion ai ibahen?

Hata “ididi” ibuat humbani sahap Junani na artini “isornophon” hubagas bah. Sanggah ididi Jesus, isornophon do ia hubagas Bah Jordan, dob ai mandarat ma ia “hun bah ai”. (Markus 1:9, 10) Sonai homa halak Kristen na sintong, maningon isornophon do sidea sanggah ididi.

2. Anggo ididi sasahalak, pataridahkon aha do ai bani Jahowa?

Sanggah sasahalak ididi, ia patuduhkon i lobei ni buei halak anggo ia domma mangondoskon dirini bani Jahowa. Paima ididi, martonggo do ia bani Jahowa patugahkon anggo ia sihol mangidangi Jahowa sadokah ni dokahni. Marjanji do ia ibagas tonggoni ai pitah manombah Jahowa, anjaha mangkorjahon harosuh-Ni do na gabe sipontingan ibagas goluhni. Maningon “iparnalang ma dirini anjaha . . . mangihutkon” ajaran ampa sitiruon na ibahen Jesus. (Mateus 16:24) Jadi anggo domma iondoskon dirini janah ididi, lambin toguh ma parhasomananni pakon Naibata ampa juakjuak-Ni na legan.

3. Aha do na maningon ibahen sasahalak ase boi ia ididi?

Ase boi ididi, porlu do ham marlajar pasal Jahowa janah patoguhkon haporsayaonmu hu Bani. (Basa Heber 11:6.) Anggo lambin itanda ham Ia, lambin toguh ma haporsayaonmu janah lambin holong ma uhurmu Bani. Dob ai gabe rosuh ma ham patugahkon pasal-Si janah mangkorjahon parentah-Ni. (2 Timoteus 4:2; 1 Johannes 5:3) Jadi anggo sasahalak domma “marparlahou domu bani harosuh ni Jahowa”, boi ma ia mangondoskon diri janah ididi.​—Kolosse 1:9, 10. a

 PARLAJARI ROH BAHATNI

4. Aha do na boi iparlajari hita humbani pandidion ni Jesus?

Basa ma Mateus 3:13-17 laho mambotoh pasal pandidion ni Jesus, janah ulas ma sungkun-sungkun on:

• Ai poso-poso ope Jesus sanggah ididi?

• Sonaha carani Jesus ididi? Ai pitah ipispishon dassa bah hu bani?

Dobkonsi ididi, idalankon Jesus ma tugas na ponting na ibere Naibata hu bani. Basa ma Lukas 3:21-23 pakon Johannes 6:38, janah ulas ma sungkun-sungkun on:

• Dobkonsi ididi Jesus, aha do tugas na sipontingan ibagas goluhni?

5. Boi do ham ididi

Ra do mungkahni mabiar ham laho mangondoskon diri bani Jahowa janah ididi. Tapi anggo torus ham marlajar pasal Jahowa janah lambin mananda Ia, gabe pos ma uhurmu mambahen haputusan ai. Idah ma pangalaman ni piga-piga halak na mangkorjahon ai. Tonton ma VIDEO.

Basa ma Johannes 17:3 pakon Jakobus 1:5, janah ulas ma sungkun-sungkun on:

• Aha do na maningon ibahen sasahalak ase pos uhurni laho ididi?

1. Hita mangondoskon diri bani Jahowa marhitei tonggo janah marjanji mangkorjahon harosuh-Ni sadokah ni dokahni

2. Sanggah ididi, hita patuduhkon bani na legan anggo hita domma mangondoskon diri bani Jahowa

 6. Gabe bagian kaluarga ni Jahowa do hita anggo ididi

Dobkonsi ididi, gabe kaluarga na marsada ma hita i sab tanoh on. Jadi hassi pe hita hun ianan atap hasomalan na marlegan, tapi sarupa do aturan pakon haporsayaonta. Basa ma Psalmen 25:14 pakon 1 Petrus 2:17, janah ulas ma sungkun-sungkun on:

• Dobkonsi ididi, aha ma pengaruhni ai bani parhasomananta pakon Jahowa ampa hasoman sahaporsayaon?

 RIMPUNAN

Jesus mangkatahon maningon ididi do sasahalak ase boi gabe halak Kristen. Ase boi ididi, maningon marhaporsayaon na toguh do ia bani Jahowa, mangkorjahon parentah-Ni, janah mangondoskon dirini bani Jahowa.

Na Dob Iparlajari

• Sonaha do pandidion ai ibahen, janah mase ponting pandidion ai?

• Anggo ididi sasahalak, pataridahkon aha do ai bani Jahowa?

• Aha do na porlu ibahen sasahalak ase boi mangondoskon diri bani Jahowa janah ididi?