Pasti pusok do uhurta anggo matei na hinaholonganta. Halani ai ma ihatahon Bibel munsuh do hamatean ai. (1 Korint 15:26) Domma iulas hita i Parlajaran 27 isalpuhon Jahowa do holi munsuh ai. Tapi sonaha ma halak na dob matei? Bani parlajaran on iulas hita ma janji ni Jahowa na mambahen malas uhurta. Papuhoon-Ni do holi marmiliar halak na matei, janah manggoluh sadokah ni dokahni! Tongon do saud ai? Ija do sidea ipapuho, i surga atap i tanoh on?

1. Aha do na laho bahenon ni Jahowa bani halak na dob matei?

Sihol do Jahowa papuhohon ganup halak na matei. Porsaya do si Job bani janji ai. Hassi pe domma matei, tapi lang ilupahon Naibata ia. Nini do bani Naibata, “Sanggah idilo Ham ahu, mintor balosanku do Ham [humbai kuburan].”​—Basa ma Job 14:13-15.

2. Hunja ibotoh hita boi do mulak manggoluh halak na matei?

Sanggah Jesus i tanoh on, ibere Jahowa do kuasa hu bani laho papuhohon halak na dob matei. Ipapuho ia do dakdanak na marumur 12 tahun ampa anak ni sada inang na mabalu. (Markus 5:41, 42; Lukas 7:12-15) Ipapuho do homa si Lasarus hasomanni, hape domma ompat ari ia ikubur. Dob martonggo Jesus, nini ma, “Lasarus, kaluar ma ho!” Dob ai “kaluar ma na matei ai” janah manggoluh use! (Johannes 11:43, 44) Tontu malas ma uhur ni kaluarga ni si Lasarus pakon ganup hasomanni.

3. Aha do pangarapan bani kaluarga atap hasomanta na dob matei?

Bibel mangkatahon ipapuho do holi halak na dob matei. (Lahoan 24:15) Hinan, sedo i surga na matei ai sangah ipapuho Jesus sidea. (Johannes 3:13) Tontu malas do uhur ni sidea halani ipapuho use janah manggoluh i tanoh on. Sonai ma homa, papuhoon ni Jesus do holi marmiliar halak na matei janah manggoluh sadokah ni dokahni i Paradeiso i tanoh on. Ia mangkatahon ipapuho do holi “[ganup] halak na i kuburan”.​—Johannes 5:28, 29.

 PARLAJARI ROH BAHATNI

4. Jesus boi papuhohon halak na matei

Pardiateihon hita ma aha na dob ibahen Jesus hubani si Lasarus. Basa ma Johannes 11:14, 38-44, janah ulas ma sungkun-sungkun on:

• Hunja ibotoh hita tongon do domma matei si Lasarus?​—Tonggor ma ayat 39.

• Anggo tongon do hu surga si Lasarus dobkonsi matei, ai mungkin do iahap ham ipapuho Jesus ia hu tanoh on?

Tonton ma VIDEO.

5. Bahat do holi halak laho ipapuho!

Basa ma Psalmen 37:29, janah ulas ma sungkun-sungkun on:

• Sanggah ipapuho holi marmiliar halak, laho manggoluh ija do sidea?

Bani ari na laho roh lang pitah na manombah Jahowa na ipapuho Jesus. Basa ma Lahoan 24:15, janah ulas ma sungkun-sungkun on:

• Sanggah ipapuho holi halak na matei, pakon ise ma ham sihol pajumpah?

• Sonaha pangarapan parpuhoon boi patoguhkon na matoras ni si Phelicity?

 RIMPUNAN

Bibel mangkatahon, ipapuho do holi marmiliar halak na dob matei. Sihol do Jahowa ase sidea manggoluh use, janah ibere do kuasa bani Jesus laho papuhohon halak na dob matei.

Na Dob Iparlajari

• Hunja ibotoh hita sihol do Jahowa pakon Jesus laho papuhohon halak na dob matei?

• Ija do holi na matei ai ipapuho, i surga atap i tanoh on? Mase ihatahon ham sonai?

• Mase pos uhurmu ipapuho do holi kaluarga atap hasomanmu na dob matei?