PARLAJARAN 31
Aha do Harajaon ni Naibata Ai?
Barita na sipontingan na isaritahon ibagas Bibel ai ma pasal Harajaon ni Naibata. Marhitei Harajaon ai, saud ma holi sura-sura ni Naibata bani tanoh on. Jadi aha do Harajaon ni Naibata ai? Hunja ibotoh hita anggo Harajaon ni Naibata domma mamarentah? Aha ma na dob ibahen Harajaon ai? Aha ma na laho bahenonni bani ari simagira? Bani parlajaran on ampa parlajaran na mangihut iulas hita ma balosni ai.
1. Aha do Harajaon ni Naibata ai, janah ise do Rajani?
Harajaon ni Naibata ai ma sada pamarentahan na ipajongjong Naibata Jahowa. Jesus Kristus do Rajani, janah mamarentah hun surga do ia. (Mateus 4:17; Johannes 18:36) Bibel mangkatahon, “Ia do na gabe Raja . . . sadokah ni dokahni.” (Lukas 1:32, 33) Anjaha mamarentah ma ia bani ganup jolma i tanoh on.
2. Ise do na mamarentah pakon Jesus?
Lang pitah Jesus holi na mamarentah. Dong do halak na ipilih humbani “ganup marga, suku, bahasa, pakon bangsa . . . laho mamarentah gabe raja hu sab tanoh on”. (Pangungkabon 5:9, 10) Sadia bahat ma bilangan ni sidea? Sanggah roh Jesus hu tanoh on, bahat do halak na mangihutkon Jesus. Tapi pitah 144.000 halak do na ipilih hu surga laho mamarentah rap pakon Jesus. (Basa Pangungkabon 14:1-4.) Gabe rakyat ni Harajaon ai ma ganup halak Kristen na tading i tanoh on.—Psalmen 37:29.
3. Mase dearan Harajaon ni Naibata humbani pamarentahan ni jolma?
Age pe adong pamarentahan ni jolma na sihol mambahen na madear bani rakyatni, tapi lang margogoh sidea mangkorjahon ai. Dob ai, igantihon halak ma sidea anjaha na manggantihon ai pe pitah mamingkiri dirini sandiri do, janah lang parduli bani rakyatni. Tapi anggo Jesus lang dong holi na manggantihonsi. Bibel mangkatahon, “Pajongjongon ni Naibata na i surga ai ma sada Harajaon na so tarpatunduk.” (Daniel 2:44) Pitah Jesus ma holi na mamarentah i tanoh on, janah lang sididah bohi ia. Parholong do ia, bujur, janah adil hubani ganup rakyatni. Iajari do rakyatni ase sonai homa marparlahou bani na legan.—Basa Jesaya 11:9.
PARLAJARI ROH BAHATNI
Ulas hita ma mase dearan pamarentahan ni Naibata humbani pamarentahan ni jolma.
4. Mamarentah ma holi Harajaon ni Naibata i sab tanoh on
Daoh do gogohan kuasa ni Jesus marimbangkon pamarentahan ni jolma. Basa ma Mateus 28:18, janah ulas ma sungkun-sungkun on:
-
Mase gogohan kuasa ni Jesus marimbangkon pamarentahan ni jolma?
Torus do margantih anggo pamarentahan ni jolma, janah pitah i sada wilayah dassa mamarentah. Sonaha anggo Harajaon ni Naibata? Basa ma Daniel 7:14, janah ulas ma sungkun-sungkun on:
-
Pandapotmu, aha ma gunani hubanta halani Harajaon ni Naibata totap adong sadokah ni dokahni?
-
Pandapotmu, aha ma gunani hubanta halani Harajaon ni Naibata mamarentah i sab tanoh on?
5. Maningon igantih do pamarentahan ni jolma
Mase maningon igantihon Harajaon ni Naibata pamarentahan ni jolma? Tonton ma VIDEO, dob ai balosi ma sungkun-sungkun on.
-
Aha do na masa halani jolma na mamarentah?
Basa ma Parambilan 8:9, janah ulas ma sungkun-sungkun on:
-
Anggo iahap ham maningon igantihon Harajaon ni Naibata do pamarentahan ni jolma? Mase sonai balosmu?
6. Iarusi Jesus pakon 144.000 na mamarentah ai do pangahapta
Halani ongga Jesus gabe manisia, boi do ia, “mangahap hagalekonta”. (Heber 4:15) Sonai homa na 144.000 na rap mamarentah pakon Jesus. Mase? Halani humbani “ganup marga, suku, bahasa, pakon bangsa do sidea ipilih Jahowa”.—Pangungkabon 5:9.
-
Sonaha pandapotmu dob mambotoh anggo Jesus pakon na 144.000 halak ai ongga gabe manisia?
Ipilih Jahowa do dalahi pakon naboru humbani marmasam bangsa laho mamarentah rap pakon Jesus
7. Dearan do uhum na ibahen Harajaon ni Naibata
Ibahen pamarentah do uhum laho manlinggomi rakyatni. Dong homa uhum ni Harajaon Naibata na maningon idalankon rakyatni. Basa ma 1 Korint 6:9-11, janah ulas ma sungkun-sungkun on:
-
Anggo iahap ham sonaha ma holi keadaan i dunia on anggo ganup halak mandalankon uhum ni Naibata? a
-
Masuk akal do anggo ipindo Jahowa ganup rakyatni unduk bani uhum-Ni?
-
Aha do na patuduhkon anggo halak na so mangihutkon uhum ni Naibata boi mubah?—Tonggor ma ayat 11.
Ibahen pamarentah do uhum laho manlinggomi rakyatni, tapi daoh do dearan uhum na ibahen Harajaon ni Naibata
ANGGO DONG NA MANGKATAHON: “Ibagas uhur do Harajaon ni Naibata ai.”
-
Sonaha ma ham mambalosi ai?
RIMPUNAN
Harajaon ni Naibata ai ma sada pamarentahan na ipajongjong i surga janah laho mamarentah hu sab tanoh on.
Na Dob Iparlajari
-
Ise ma deba na laho mamarentah i Harajaon ni Naibata?
-
Mase dearan Harajaon ni Naibata marimbangkon pamarentahan ni jolma?
-
Aha do na ipindo Jahowa humbani rakyatni?
TONGGOR HOMA
Ija do Harajaon ni Naibata ai nini Jesus?
“Tongon do Ibagas Uhurta Harajaon ni Naibata Ai?” (Artikel web) (dong bani bahasa Indonesia)
Mase Saksi Jahowa mamilih setia bani Harajaon ni Naibata marimbangkon pamarentahan ni jolma?
Setia hubani Harajaon ni Naibata (1:43) (Dong bani bahasa Indonesia)
Aha ma na ihatahon Bibel pasal 144.000 halak na laho mamarentah pakon Jesus i surga.
“Ise do na Laho hu Surga?” (Artikel web) (dong bani bahasa Indonesia)
Mase sahalak naboru na i penjara porsaya pitah Naibata do na boi parohkon hadameion i sab tanoh on?
“Ujungni Hubotoh ma Ise na Boi Parohkon Hadameion” (Sedarlah! November 2011) (dong bani bahasa Indonesia)
