PARLAJARAN 32

Harajaon ni Naibata Domma Mamarentah!

PADALAN

Bani tahun 1914, Harajaon ni Naibata mulai mamarentah i surga. Humbai tahun ai ipungkah ma homa panorang parpudi bani pamarentahan ni jolma. Hunja ibotoh hita ai? Pardiateihon hita ma panjahaion ni Bibel pasal ai. Ulas hita ma homa aha do na masa i tanoh on janah sonaha parlahou ni jolma humbai tahun 1914.

1. Aha ma na dob ihatahon Bibel?

Bani buku Daniel ibotoh hita do anggo Harajaon ni Naibata laho mamarentah bani ujung ni sada periode na isobut “pitu panorang”. (Daniel 4:16, 17) Marratus tahun dobkonsi ai, isobut Jesus do periode ai “panorang na dob itontuhon bani bangsa-bangsa”. Anjaha sanggah Jesus i tanoh on, lape marujung periode ai. (Lukas 21:24) Songon na laho iulas hita bani parlajaran on, pitu panorang ai marujung bani tahun 1914.

2. Aha do na masa i tanoh on janah sonaha parlahou ni jolma humbai tahun 1914?

Isungkun susian ni Jesus ma hu bani, “Aha ma tanda ni parrohmu ampa ujung ni dunia on?” (Mateus 24:3) Ipatugah Jesus ma aha na laho masa dobkonsi ia gabe Raja anjaha mamarentah i surga. Masa ma porang, loheian, ampa gempa. (Basa Mateus 24:7.) Ipatugah Bibel do homa sonaha parlahou ni jolma bani “panorang parpudi” na mambahen goluhta lambin sunsah. (2 Timoteus 3:1-5) Humbai tahun 1914 tangkas do taridah domma masa ganupan ai.

3. Dobkonsi mamarentah Harajaon ni Naibata, mase lambin sambor keadaan i dunia on?

Lang piga dokah dobkonsi Jesus gabe Raja, marporang ma ia manlawan Sibolis pakon begu-beguni. Talu ma Sibolis anjaha songon na ihatahon Bibel ‘idabuhkon ma ia hu tanoh on rap pakon sagala malekat-malekatni’. (Pangungkabon 12:9, 12) Marah tumang ma Sibolis halani mambotoh tongkin nari laho iripaskon ma ia. Ai do na mambahen lambin sambor keadaan i dunia on. Tapi marhitei Harajaon ni Naibata, isasap ma ganup sitaronon i dunia on.

PARLAJARI ROH BAHATNI

Ulas hita ma hunja ibotoh hita anggo Harajaon ni Naibata domma mamarentah humbai tahun 1914. Anjaha ulas hita ma homa aha do pangaruhni ai hubanta.

4. Panjahaion ni Bibel pakon keadaan i dunia on patuduhkon anggo Harajaon ni Naibata domma mamarentah

Tonton ma VIDEO.

VIDEO: Harajaon ni Naibata Mulai Mamarentah Tahun 1914 (5:02)

Ibere Naibata ma nipi hubani Raja Nebukadnesar hun Babel na patugahkon aha na laho masa bani ari na laho roh. Isurat Nabi Daniel do nipi ai ampa artini ibagas Bibel. Anggo ibasa hita ai, gabe iarusi hita ma saud do nipi ai hubani pamarentahan ni si Nebukadnesar pakon hubani Harajaon ni Naibata.—Basa ma Daniel 4:17. a

Basa ma Daniel 4:20-26, anjaha gunahon ma gambar laho mambalosi sungkun-sungkun on:

(A) Aha do na ididah si Nebukadnesar ibagas nipini?—Tonggor ma ayat 20 pakon 21.
(B) Aha do na laho masa bani hayu ai?—Tonggor ma ayat 23.
(C) Aha do na laho masa bani ujung ni “pitu panorang”?—Tonggor ma ayat 26.

Nipi pasal Hayu Dong Kaitanni pakon Harajaon ni Naibata

PANJAHAION (Daniel 4:20-36)

Pamarentahan

(A) Sada hayu na banggal

Pamarentahan soh tongkin

(B) “Roboh ma hayu in” anjaha paturut sadokah “pitu panorang”

Mamarentah use

(C) “Mulak do use harajaon in bamu”

Sanggah parlobei sahali saud panjahaion on . . .

(D) Ise do na igambarhon hayu ai?—Tonggor ma ayat 22.
(E) Sonaha pamarentahan ai soh tongkin?—Basa ma Daniel 4:29-33.
(F) Aha do na masa bani si Nebukadnesar bani ujung ni “pitu panorang” ai?—Basa ma Daniel 4:34-36.

PARLOBEI SAHALI SAUD PANJAHAION ON

Pamarentahan

(D) Raja Nebukadnesar hun Babel

Pamarentahan soh tongkin

(E) Dob 606 SM, si Nebukadnesar gabe rintik janah lang boi mamarentah sadokah pitu tahun

Mamarentah use

(F) Si Nebukadnesar sehat janah mamarentah use

Sanggah paduahalihon saud panjahaion on . . .

(G) Ise do na igambarhon hayu ai?—Basa ma 1 Kronika 29:23.
(H) Sonaha pamarentahan ni sidea soh tongkin? Hunja ibotoh hita anggo pamarentahan ai lape mamarentah sanggah Jesus i tanoh on?—Basa ma Lukas 21:24.
(I) Nantigan janah ija do pamarentahan ai mamarentah use?

PADUAHALIHON SAUD PANJAHAION ON

Pamarentahan

(G) Raja-raja i Israel na mawakili pamarentahan ni Naibata

Pamarentahan soh tongkin

(H) Jerusalem iripaskon, janah lang adong be raja hun ginompar ni Israel sadokah 2.520 tahun

Mamarentah use

(I) Jesus mulai mamarentah i surga gabe Raja ni Harajaon ni Naibata

Piga dokah do pitu panorang ai?

Ase boi iarusi hita sada ayat bani Bibel, maningon ipareksa hita do ayat-ayat na legan. Umpamani buku Pangungkabon mangkatahon dos do tolu satongah panorang pakon 1.260 ari. (Pangungkabon 12:6, 14) Jadi, anggo pitu panorang, dua hali lompitni ma ai, ai ma 2.520 ari. Sipata bani Bibel sadari boi do mangartihon satahun. (Hesekiel 4:6) Jadi, pitu panorang na ihatahon bani buku Daniel dos do ai pakon 2.520 tahun.

5. Humbani tahun 1914 mubah do keadaan ni dunia on

Tonton ma VIDEO.

VIDEO: Humbani Tahun 1914 Mubah do Keadaan ni Dunia On (1:10)

Domma ipatugah Jesus hinan sonaha keadaan i dunia on dob gabe Raja ia. Basa ma Lukas 21:9-11, janah ulas ma sungkun-sungkun on:

Keadaan na ija do na ongga ididah atap pe ibogei ham?

Ipatugah si Paulus do sonaha parlahou ni jolma bani panorang parpudi. Basa ma 2 Timoteus 3:1-5, janah ulas ma sungkun-sungkun on:

Anggo ididah ham, songon na ipatugah bani ayat ai do parlahou ni jolma sonari on?

6. Aha do na maningon ihorjahon hita?

Basa ma Mateus 24:3, 14, janah ulas ma sungkun-sungkun on:

Domu bani ayat on, aha do na patuduhkon anggo Harajaon ni Naibata domma mamarentah?
Sonaha ase boi ham dihut marbarita?

Sonari, domma mamarentah Harajaon ni Naibata, janah tongkin nari mamarentah ma Harajaon ai i sab tanoh on. Basa ma Heber 10:24, 25 janah ulas ma sungkun-sungkun on:

Aha do na maningon ihorjahon hita halani domma “lambin dohor ari in ididah” hita?

Dob ibotoh ham boi do ham mangurupi janah paluahkon halak na legan, aha ma na laho bahenonmu?

ANGGO DONG NA MANUNGKUN: “Mase gati Saksi Jahowa mangulas pasal tahun 1914?”

Sonaha ma ham mambalosi ai?

RIMPUNAN

Panjahaion ni Bibel pakon keadaan ni dunia on patuduhkon anggo Harajaon ni Naibata domma mamarentah. Halani ai, tongtong ma hita martumpu janah mambaritahon pasal Harajaon ai.