PARLAJARAN 34

Sonaha Hita Boi Patuduhkon Holong bani Jahowa?

PADALAN

Dobkonsi marlajar Bibel, lambin holong do ham bani Jahowa? Ai sihol do uhurmu patoguhkon holongmu hu Bani? Anggo lambin bagas holongmu bani Jahowa, lambin holong ma uhur-Ni bamu janah iurupi Ia ma ham. Sonaha ham patuduhkon anggo ham mangkaholongi-Si?

1. Sonaha hita patuduhkon holongta bani Jahowa?

Taridah do holongta bani Jahowa anggo ra hita mandalankon parentah-Ni. (Basa 1 Johannes 5:3.) Tapi lang ipaksa Jahowa hita mangkorjahon ai. Hita do na mamilih ra do hita manangihon-Si atap lang. Mase? Jahowa sihol ase hita “unduk humbani gok ni uhurta”. (Rom 6:17) On artini marosuh do uhur-Ni ase hita manangihon-Si halani holongta, sedo halani na tarpaksa. Bani Bagian 3 pakon 4 i buku on, iurupi do hita sonaha hita patuduhkon holongta hu Bani. Ibuktihon hita do ai anggo ihorjahon hita harosuh ni uhur-Ni janah padaohkon diri humbani aha na lang iharosuhkon-Si.

2. Mase sipata lang urah laho patuduhkon holongta bani Jahowa?

Bibel mangkatahon, “Buei do sitaronon ni halak parpintor.” (Psalmen 34:19) Halani lang sempurna hita, ra do sipata urahan mangkorjahon na lepak. Leganni ai, halani dong masalahta gabe lang urah hita mangkorjahon harosuh ni Jahowa. Umpamani masalah parduitan, ketidakadilan, atap na leganni. Tapi anggo marusaha hita mandalankon harosuh-Ni, taridah ma holongan do uhurta hu Bani marimbangkon aha pe. Janah boi ma ibuktihon hita anggo hita setia hu Bani. Tontu Jahowa pe setia do hubanta janah lang ongga itadingkon Ia hita.—Basa Psalmen 4:3.

PARLAJARI ROH BAHATNI

Ulas hita ma mase malas uhur ni Jahowa anggo unduk hita hu Bani, janah ulas hita ma homa sonaha hita boi totap setia hu Bani.

3. Isangsihon Sibolis do ham

Bani buku Job, ihatahon Sibolis do na lang tongon pasal si Job. Tapi lang pitah bani si Job ihatahon Sibolis sonai, dihut do homa ganup halak na sihol mangidangi Jahowa. Basa ma Job 1:1, 6–2:10, janah ulas ma sungkun-sungkun on:

Anggo pandapot ni Sibolis, mase si Job unduk bani Jahowa?— Tonggor ma Job 1:9-11.
Aha ma na ituduh Sibolis hubani ganup jolma, tarmasuk ma ham?— Tonggor ma Job 2:4.

Basa ma Job 27:5b, janah ulas ma sungkun-sungkun on:

Sonaha si Job patuduhkon tongon do holong uhurni bani Jahowa?

Taridah ma holong do uhur ni si Job bani Jahowa halani tongtong ia setia hu Bani

Taridah ma holong do uhurta bani Jahowa anggo tongtong hita setia hu Bani

4. Bahen ma malas uhur ni Jahowa

Basa ma Podah 27:11, janah ulas ma sungkun-sungkun on:

Sonaha pangahap ni Jahowa anggo maruhur hita janah unduk hu Bani? Mase sonai pangahap-Ni?

5. Boi do ham totap setia bani Jahowa

Anggo ihaholongi hita Jahowa, tarojur ma hita mansaritahon pasal-Si bani na legan. Anjaha torus do hita mangkorjahon ai hassi pe lang urah. Tonton ma VIDEO, dob ai ulas ma sungkun-sungkun on.

VIDEO: Sirsir ma Patorangkon Haporsayaonmu (5:09)

Ongga do iahap ham lang urah mansaritahon pasal Jahowa bani na legan?
Bani video ai, aha do na mangurupi si Grayson ase lang be mabiar?

Lambin urah do hita setia bani Jahowa anggo iharosuhkon hita na iharosuhkon-Si, janah ihagigihon hita na ihagigihon-Si. Basa ma Psalmen 97:10, janah ulas ma sungkun-sungkun on:

Humbai na dob iparlajari ham sadokah on, aha ma na iharosuhkon Jahowa? Janah aha ma na ihagigihon-Si?
Aha do na mangurupi ham ase marosuh bani na madear janah magigi bani na masambor?

6. Martuah do goluhta anggo itangihon hita Jahowa

Tongtong do marguna anggo itangihon hita Jahowa. Basa ma Jesaya 48:17, 18, janah ulas ma sungkun-sungkun on:

Porsaya do ham anggo Jahowa mambotoh na sidearan banta? Mase sonai ihatahon ham?
Aha do gunani bamu dobkonsi iparlajari ham Bibel janah mananda Jahowa?

ANGGO DONG NA MANGKATAHON: “Lang mungkin boi ahu pamalaskon uhur ni Naibata.”