PARLAJARAN 35

Cara Mambahen Haputusan na Dear

PADALAN

Ganup ari maningon ibahen hita do haputusan. Anjaha haputusan ai boi do marpangaruh bani goluhta ampa parhasomananta pakon Jahowa. Umpamani, ibahen hita do haputusan pasal ija hita tading, horja aha na sosok, atap pasal marhajabuan. Anggo ibahen hita haputusan na dear, boi ma hita marmalas ni uhur janah pasonangkon Jahowa.

1. Sonaha Bibel mangurupi ham laho mambahen haputusan?

Paima mambahen haputusan, martonggo ma lobei bani Jahowa mangindo pangurupion. Dob ai pareksa ma ayat-ayat ni Bibel laho mambotoh aha na iharosuhkon Jahowa. (Basa Podah 2:3-6.) Bahat do uhum na ibere Jahowa laho mangurupi hita. Anggo iihutkon ham ai, marguna do ai bamu.

Tapi sonaha anggo lang adong uhum na laho siihutkononmu? Sai itogu-togu Jahowa do ham “bani dalan na patut sidalananmu”. (Jesaya 48:17) Sonaha carani? Dong prinsip atap onjolan ni Bibel na boi mangurupi ham. Prinsip ni Bibel, ai ma hasintongan na patuduhkon pingkiran ampa harosuh ni Jahowa. Jadi, sanggah ibasa ham Bibel, gabe ibotoh ham ma aha na iharosuhkon Jahowa, janah boi mambahen haputusan na pamalaskon uhur-Ni.

2. Paima mambahen haputusan, aha do na porlu ipingkirhon ham?

Bibel mangkatahon, “Halak na maruhur ipingkiri do ganup langkahni.” (Podah 14:15) Artini paima mambahen haputusan, anget lobei pingkiri na laho sibahenonmu. Jadi pingkirhon ma sungkun-sungkun on: ‘Prinsip ni Bibel na ija do na sosok bani situasi on? Anggo hubahen sonon, damei do holi pingkiranku? Aha do pengaruhni bani na legan? Na sipontingan, malas do uhur ni Jahowa bani haputusanku on?’—5 Musa 32:29.

Marhak do Jahowa manontuhon na dear atap na salah hubanta. Jadi maningon iparlajari hita do uhum pakon prinsip ni Jahowa. Janah anggo idalankon hita ai, boi ma dear panggora ni uhurta. Panggora ni uhur, ai ma pangahap na dong ibagas uhurta na patugahkon ija na dear atap na salah. (Rom 2:14, 15) Anggo dear marhorja panggora ni uhurta, gabe boi ma hita mambahen haputusan na dear.

PARLAJARI ROH BAHATNI

Ulas hita ma sonaha prinsip ni Bibel pakon panggora ni uhur boi mangurupi hita mambahen haputusan na dear.

3. Ihutkon ma podah ni Bibel

Sonaha prinsip atap onjolan ni Bibel boi mangurupi hita sanggah mambahen haputusan? Tonton ma VIDEO, dob ai balosi ma sungkun-sungkun on.

VIDEO: Ihutkon ma Prinsip ni Bibel (5:54)

Aha do artini habebason mamilih?
Mase ibere Jahowa habebason ai?
Aha ope na ibere Jahowa laho mangurupi hita mambahen haputusan?

Pardiateihon ma sada prinsip ni Bibel. Basa ma Epesus 5:15, 16. Anjaha ulas ma sonaha ham boi dear manggunahon panorang ase boi . . .

mambasa Bibel ganup ari.
gabe suami, istri, namatoras, atap niombah na lambin dear.
roh hu partumpuan.

4. Latih ma panggora ni uhurmu laho mambahen haputusan na dear

Anggo adong uhum na ipatugah bani Bibel, mintor ibotoh hita do aha na laho sibahenonta. Tapi sonaha anggo lang adong? Tonton ma VIDEO, dob ai ulas ma sungkun-sungkun on.

VIDEO: Latih ma Ase Borsih Panggora ni Uhurmu (5:13)

Aha ma na ibahen naboru ai laho manlatih panggora ni uhurni janah mambahen haputusan na pasonangkon Jahowa?

Mase lang boi isuruh hita halak mambahen haputusan banta? Basa ma Heber 5:14, janah ulas ma sungkun-sungkun on:

Memang urahan do anggo halak na patugahkon aha na laho iputuskon hita. Tapi domu bani ayat on, aha do na maningon ibahen hita?
Aha do na ipasirsir organisasi ni Jahowa laho mangurupi hita manlatih panggora ni uhur janah boi mambahen haputusan na dear?

Usih songon peta, panggora ni uhur boi mangurupi hita mamilih dalan na sintong

5. Hargai ma panggora ni uhur ni halak na legan

Legan do haputusan na ibahen ganup halak. Jadi sonaha ham mangkargai panggora ni uhur ni na legan? Pardiateihon ma dua situasi on:

Situasi 1: Sada hasomanta naboru marosuh marbadak na tobal janah mamakei bahat perhiasan. Anjaha pindah ma ia hu sada kuria. Hape bahat do sanina botou ijai lang marosuh mangidah na sisonai.

Basa ma Rom 15:1 pakon 1 Korint 10:23, 24, janah ulas ma sungkun-sungkun on:

Anggo iihutkon hasomanta ai ayat on, ra aha do na ibahen ia? Anggo adong halak na targanggu panggora ni uhurni mangidah ham mangkorjahon sada horja, hape panggora ni uhurmu lang targanggu, aha ma na porlu ibahen ham?

Situasi 2: Adong hasomanta dalahi na lang ra manginum minuman na maralkohol hassi pe ibotoh ia lang ilarang Bibel anggo manginum ai otik. Bani sada ari, iontang ma ia hu acara ramah tamah. Hape ijai ididah ia ma sanina botou manginum na sisonai.

Basa ma Parambilan 7:16 pakon Rom 14:1, 10, janah ulas ma sungkun-sungkun on:

Anggo iihutkon hasomanta ai ayat on, ra aha do na ibahen ia? Anggo adong ididah ham sahalak hasoman na mangkorjahon sada horja na mambahen targanggu panggora ni uhurmu, aha ma na porlu ibahen ham?

Sonaha ham boi mambahen haputusan na dear?

1. Martonggo ma ase iurupi Jahowa ham mambahen haputusan.—Jakobus 1:5.

2. Parlajari ma Bibel ampa publikasi na ipasirsir organisasi ase boi dapotmu prinsip na sosok. Boi do homa ham mangindo podah humbani sanina botou na marpangalaman.