Jesus mangkatahon anggo susianni “seng hun dunia on”. (Johannes 15:19) On artini maningon netral do hita atap lang boi hita happit na ija pe ibagas politik ampa parporangan i dunia on. Sipata lang urah mangkorjahon ai, halani dong do holi na mangejek hita halani haputusanta ai. Jadi, sonaha ma hita boi netral janah totap setia bani Jahowa?

1. Aha do na ihatahon Bibel pasal pamarentahan ni jolma?

Iparentahkon Jesus do susianni, “Bere ma bani Kesar na humbani Kesar.” Jadi maningon unduk do hita bani aturan ni pamarentah, umpamani ibayar hita ma pajak. (Markus 12:17) Bibel mangajarhon maningon hormat do hita bani sidea halani ipaturut Jahowa ope sidea mamarentah i tanoh on. (Rom 13:1) Tapi tarbatas do kuasa ni sidea. Halani ai, porsaya do hita pitah Harajaon ni Naibata dassa na boi pasaloseihon ganup masalah i dunia on.

2. Sonaha hita boi totap netral?

Totap do Jesus netral janah lang ra dihut bani politik i dunia on. Umpamani, sanggah dong na sihol mambahen Jesus gabe raja halani mangidah mukzijat na ibahenni, lang ra Jesus. (Johannes 6:15) Halani nini Jesus do, “Harajaonku seng na hun dunia on.” (Johannes 18:36) Jadi maningon totap do hita netral songon Jesus. Sonaha carani? Ulang ma dihut hita marporang. (Basa Mika 4:3.) Ihargai hita do lambang-lambang negara umpamani bendera. Tapi lang manghormat bendera hita halani dos do ai songon na manombah bendera ai. (1 Johannes 5:21) Leganni ai, lang ra hita marpihak bani politik na ija pe na i dunia on. Anggo ibahen hita sonai, on artini setia do hita bani Harajaon ni Naibata.

 PARLAJARI ROH BAHATNI

3. Halak Kristen maningon netral

Dong sitiruon na boi idapot hita humbani Jesus pakon susianni. Basa ma Rom 13:1, 5-7 pakon 1 Petrus 2:13, 14. Tonton ma VIDEO, dob ai ulas ma sungkun-sungkun on.

• Mase hita maningon unduk bani pamarentah?

• Sonaha carani hita unduk bani sidea?

Sanggah dong na marporang, dong piga-piga negara na mangkatahon netral do sidea. Tapi iurupi sidea do negara-negara na marporang ai. Jadi aha do sasintongni artini netral ai? Basa ma Johannes 17:16. Tonton ma VIDEO, dob ai ulas ma sungkun-sungkun on.

• Aha do artini netral?

Aha do na porlu ibahen hita anggo adong aturan ni pamarentah na marlawanan pakon aturan ni Naibata? Basa ma Lahoan 5:28, 29. Tonton ma VIDEO, dob ai ulas ma sungkun-sungkun on.

• Songon apostel ni Jesus, aturanni ise do na iihutkon hita sanggah dong aturan ni pamarentah na marlawanan pakon aturan ni Naibata?

• Anggo iahap ham, bani situasi aha do halak Kristen maningon unduk bani Naibata marimbangkon bani pamarentah?

 4. Totap ma netral ibagas uhur ampa pambahenan

Basa ma 1 Johannes 5:21. Tonton ma VIDEO, dob ai ulas ma sungkun-sungkun on.

• Mase lang ra si Ayenge dihut bani partai politik, dapot bagian sanggah upacara, ampa manghormat bendera?

• Pandapotmu, ai dear do haputusanni ai?

Bani situasi aha ope hita maningon netral? Tonton ma VIDEO, dob ai ulas ma sungkun-sungkun on.

• Sonaha hita boi totap netral sanggah mangidah pertandingan olahraga antar negara?

• Sipata haputusan na ibahen pamarentah boi do mambahen na dear hubanta atap pe gabe manrugihon hita. Anggo sonai, sonaha hita boi totap netral?

• Gabe sonaha do ujungni anggo mabahattu hita manonton barita ampa marhasoman pakon halak na rosuh bani politik?

 RIMPUNAN

Maningon marusaha do hita manjaga uhur, parsahap, ampa pambahenanta ase totap netral.

Na Dob Iparlajari

• Sonaha carani hita unduk bani pamarentah?

• Mase hita maningon totap netral?

• Bani situasi aha do hita maningon totap netral ibagas uhur ampa pambahenanta?