PARLAJARAN 46
Mase Maningon Mangondoskon Diri bani Jahowa janah Ididi?
Sanggah ham mangondoskon diri bani Jahowa, on artini marjanji do ham ibagas tonggo pitah Ia dassa na isombah ham, janah mangkorjahon harosuh-Ni do na sipontingan ibagas goluhmu. (Psalmen 40:8) Dob ai gabe boi ma ham ididi. Sanggah ham ididi, on patuduhkon bani buei halak anggo ham domma mangondoskon diri. On ma haputusan na sipontingan ibagas goluhmu. Jadi, aha ma na mangojur uhurmu laho mambahen haputusan ai?
1. Aha do na mangojur sasahalak ase ra mangondoskon diri bani Jahowa?
Holong do na mangojur hita ase mangondoskon diri bani Jahowa. (1 Johannes 4:10, 19) Songon na ihatahon Bibel, “Maningon haholonganmu do Jahowa Naibatamu humbani gok ni uhurmu, humbani gok ni goluhmu, humbani gok ni pingkiranmu ampa humbani gok ni gogohmu.” (Markus 12:30) Jadi lang pitah ihatahon hita holong uhurta bani Jahowa, tapi ipatuduh hita ma ai marhitei pambahenanta. Sarupa ma ai songon halak na marpacaran. Anggo tongon sidea marsihaholongan gabe sihol ma sidea marhajabuan. Sonai homa ma hita, halani holong uhurta bani Jahowa gabe ra ma hita mangondoskon diri bani Jahowa janah ididi.
2. Aha do pasu-pasu na ibere Jahowa bani sidea na ra ididi?
Dobkonsi ididi ham, gabe kaluarga ni Jahowa ma ham. Lambin iahapkon ham ma banggal ni holong ni Jahowa bamu janah lambin dohor ma ham hu Bani. (Basa Maleaki 3:16-18.) Leganni ai, gabe sada kaluarga ma ham pakon sanina botou i sab dunia on janah holong do sidea bamu. (Basa Markus 10:29, 30.) Tapi ase boi ham ididi, maningon iparlajari ham ma pasal Jahowa, mangkaholongi-Si, porsaya bani Jesus janah mangondoskon diri bani Jahowa. Anggo ibahen ham sonai, gabe boi ma dapot ham hagoluhan sadokah ni dokahni. Bibel mangkatahon, “Pandidion in . . . boi paluahkon nasiam.”—1 Petrus 3:21.
PARLAJARI ROH BAHATNI
Ulas hita ma mase ham maningon mangondoskon diri bani Jahowa janah ididi.
3. Pilih ma ise na laho sisombahonmu
Hinan, lang salah iahap halak Israel manombah Jahowa pakon manombah gana-gana. Jadi isuruh ma si Elias laho pasingatkon sidea. Basa ma 1 Raja-raja 18:21, janah ulas ma sungkun-sungkun on:
-
Haputusan aha ma na maningon ibahen halak Israel?
Songon halak Israel, maningon iputuskon hita do ise na maningon isombah hita. Basa ma Lukas 16:13, janah ulas ma sungkun-sungkun on:
-
Ai boi do isombah hita Jahowa lanjar isombah hita na legan? Mase sonai balosmu?
-
Sonaha hita patuduhkon pitah Jahowa dassa na isombah hita?
4. Rimangi ma holong ni Jahowa bamu
Domma bahat tumang na ibere Jahowa hubanta. Jadi aha do na boi ibere hita hu Bani? Tonton ma VIDEO.
Aha ma na domma ibere Jahowa laho patuduhkon holong-Ni bamu? Basa ma Psalmen 104:14, 15 pakon 1 Johannes 4:9, 10, janah ulas ma sungkun-sungkun on:
-
Aha ma sibere-bere ni Jahowa na ihamalaskon ham?
-
Halani sibere-bere ai, sonaha ma pangahapmu hubani Jahowa?
Tontu martarima kasih do hita bani halak na mambere hadiah na iharosuhkon uhurta. Basa ma 5 Musa 16:17, janah ulas ma sungkun-sungkun on:
-
Dob irimangi ham ganup sibere-bere ni Jahowa, aha ma na sihol bereonmu hu Bani?
5. Bahat do pasu-pasuni anggo hita mangondoskon diri bani Jahowa
Bahat halak na marpingkir anggo mandapot horja na jenges, tarsar, janah bahat duitni boi mambahen sidea martuah. Tongon do ai? Tonton ma VIDEO, dob ai ulas ma sungkun-sungkun on.
-
Age pe dalahi bani video ai marosuh bani sepak bola, mase ra ia manadingkon horjani ai?
-
Ipilih ia do mangondoskon diri bani Jahowa janah lang be marsepakbola. Pandapotmu, topat do haputusanni ai? Mase?
Sanggah apostel Paulus lape gabe halak Kristen, marguru do ia bani sada guru Jahudi na tarsar. Sasintongni boi do ia mandapot horja na jenges. Tapi itadingkon ia do ganupan ai ase boi mangihutkon Jesus. Ai isolsoli ia do haputusanni ai? Basa ma Pilippi 3:8, janah ulas ma sungkun-sungkun on:
-
Mase apostel Paulus mangkatahon aha na itadingkonni ai songon “tompoh”?
-
Aha ma na dapotsi dobkonsi gabe halak Kristen?
-
Pandapotmu, ai martuahan do goluhmu anggo mangidangi Jahowa? Mase sonai balosmu?
Bahatan do na idapot si Paulus marimbangkon na itadingkonni dobkonsi ia gabe halak Kristen
ANGGO DONG NA MANGKATAHON: “Hubotoh do on hasintongan. Tapi huahap lape sirsir ahu mangondoskon diri bani Jahowa.”
-
Anggo iahap ham, mase hita maningon mangondoskon diri bani Jahowa?
RIMPUNAN
Anggo holong uhurta bani Jahowa, gabe ra ma hita mangondoskon diri hu Bani janah ididi.
Na Dob Iparlajari
-
Mase maningon isombah hita Jahowa humbani gok ni uhurta?
-
Aha do pasu-pasu na ibere Jahowa bani sidea na ra ididi?
-
Ai ra do ham mangondoskon diri bani Jahowa?
TONGGOR HOMA
Pardiateihon ma mase sahalak pandoding pakon sada atlet ra mangondoskon diri bani Jahowa.
Sungkun-Sungkun na Maposo—Aha na Laho Hupindahi ibagas Goluhku?—Mardingat (6:54)
Pardiateihon ma alasan na legan mase hita maningon mangondoskon diri bani Jahowa.
“Mase Maningon Mangondoskon Diri bani Jahowa?” (Menara Pengawal 15 Januari 2010) (dong bani bahasa Indonesia)
Bani video musik on, idah hita ma sonaha malas ni uhur na iahapkon halak na mangondoskon diri bani Jahowa.
Huondoskon do Diringku Bamu (4:30) (Dong bani bahasa Indonesia)
Bani artikel “Sai Torus do Sungkun-Sungkun ibagas Uhurhu, ‘Aha do Tujuanni Goluhta?’”, pardiateihon ma mase sada naboru gabe mamingkirhon aha na sipontingan ibagas goluhni.
“Bibel Paubah Hagoluhan” (Menara Pengawal 1 November 2012) (dong bani bahasa Indonesia)
