PARLAJARAN 49

Sonaha Carani Ase Martuah Kaluargamu?—Bagian 1

PADALAN

Bahat halak na marhajabuan sihol ase tongtong martuah kaluargani. Sasintongni boi do ai. Bahat do halak na marhajabuan domma mangahapkon ai halani idalankon sidea podah ni Bibel ibagas kaluargani.

1. Aha ma podah ni Bibel bani suami?

Suami do na itotapkon Jahowa gabe kopala kaluarga. (Basa Epesus 5:23.) Sihol do Jahowa ase ibahen suami haputusan na dear bani kaluargani. Bibel mangkatahon, “Tongtong ma haholongi istri nasiam.” (Epesus 5:25) On artini maningon bujur do ia bani istrini sanggah i lobei ni buei halak, sonai homa sanggah sidea padua-dua. Ijaga ia do istrini, ibere do haporluanni, janah ibahen ia do istrini marmalas ni uhur. (1 Timoteus 5:8) Na sipontingan, maningon iurupi ia do istrini ase totap dohor bani Jahowa. (Mateus 4:4) Umpamani, rup martonggo ma sidea janah mambasa Bibel. Anggo ibahen suami sonai, gabe malas ma uhur ni Jahowa hu bani.—Basa 1 Petrus 3:7.

2. Aha ma podah ni Bibel bani istri?

Bibel mangkatahon, “Maningon hormat do istri bani suamini.” (Epesus 5:33) Sonaha ma carani? Idingat ia ma sifat na dear bani suamini janah sonaha suamini mambere haporluan ni sidea. Leganni ai, idalankon ia ma haputusan na ibahen suamini. Dear do parsahapni hubani suamini, janah lang ra ia pasambor-samborhon suamini age pe suamini ai lang manombah Jahowa.

3. Sonaha ase suami istri boi totap kompak?

Bibel mangkatahon “gabe sadaging” do halak na dob marhajabuan. (Mateus 19:5) On artini maningon kompak do sidea. Halani ai, porlu do ibahen sidea panorang ase rup pakon pasanganni. Isaritahon sidea do aha na ibagas uhurni bani pasanganni. Maningon setia do homa sidea. Anjaha maningon ibahen sidea do Jahowa na sipontingan ibagas goluhni.

PARLAJARI ROH BAHATNI

Ulas hita ma prinsip ni Bibel na boi mangurupi ham ase lambin kompak pakon pasanganmu.

4. Maningon ihaholongi janah isarihon suami do istrini

Bibel mangkatahon, “Maningon haholongan ni suami do istrini songon mangkaholongi dirini sandiri.” (Epesus 5:28, 29) Aha do artini ai? Tonton ma VIDEO, dob ai ulas ma sungkun-sungkun on.

VIDEO: Haholongi ma Istrimu Songon Dirimu Sandiri (9:53)

Sonaha ma suami boi patuduhkon anggo ia mangkaholongi istrini?

Basa ma Kolosse 3:12, janah ulas ma sungkun-sungkun on:

Sonaha suami boi patuduhkon sifat-sifat ai ibagas kaluargani?

5. Maningon ihaholongi istri do suamini janah unduk hubani

Bibel mangkatahon maningon hormat do istri bani suamini age pe lang manombah Jahowa suamini. Basa ma 1 Petrus 3:1, 2, janah ulas ma sungkun-sungkun on:

Anggo suamimu lang manombah Jahowa, tontu sihol do ham ase ia pe dihut manombah Jahowa. Pandapotmu, na ija do na sidearan, sai lalab ham marbarita hu bani atap ipatuduh ham parlahou na dear janah hormat hu bani? Mase sonai balosmu?

Dear do anggo suami pakon istri manriah sanggah laho mambahen haputusan. Tapi sipata lang sapandapot istri hubani suamini. Anggo sonai, lamlam ma istri patugahkon pandapotni hubani suamini. Anjaha porlu do idingat ia, suami do na itotapkon Jahowa laho mambahen haputusan bani kaluargani. Halani ai, maningon iurupi ia ma suamini mandalankon haputusan ai. Anggo ibahen ia sonai, gabe damei ma kaluargani. Basa ma 1 Petrus 3:3-5, janah ulas ma sungkun-sungkun on:

Sonaha ma pangahap ni Jahowa anggo unduk istri bani suamini?

6. Nasiam boi do mangatasi masalah ibagas parhajabuanmu

Sai adong do masalah ibagas kaluarga, halani ai maningon marsiurupan do suami pakon istri mangatasi ai. Tonton ma VIDEO, dob ai ulas ma sungkun-sungkun on.

VIDEO: Sonaha Ase Suami Istri Boi Totap Kompak (5:44)

Hunja do ibotoh hita anggo pasangan ai lang be kompak?
Aha do na ibahen sidea ase kompak use?

Basa ma 1 Korint 10:24 pakon Kolosse 3:13. Dob mambasa tiap ayat, ulas ma sungkun-sungkun on:

Anggo idalankon nasiam ayat on, ai gabe kompak do nasiam? Mase sonai balosmu?

Bibel mangkatahon maningon hita do na parlobei patuduhkon hormat bani na legan. On artini maningon bujur do hita janah ihargai hita ma sidea. Basa ma Rom 12:10, janah ulas ma sungkun-sungkun on: