PARLAJARAN 50

Sonaha Carani Ase Martuah Kaluargamu?—Bagian 2

PADALAN

Sibere-bere humbani Jahowa do niombah ai. Tontu maningon dear do ipagodang namatoras niombahni. Halani ai, ibere Jahowa ma podah bani namatoras ase boi sidea mangkorjahon ai. Dong homa podah bani niombah ase sidea boi dihut mambahen kaluargani marmalas ni uhur.

1. Aha do podah ni Jahowa bani namatoras?

Sihol do Jahowa ase ihaholongi namatoras niombahni janah igunahon sidea panorangni ase boi rup pakon niombahni. Maningon ijaga sidea do homa niombahni humbani parjahat, janah mangajarhon podah ni Bibel bani sidea. (Podah 1:8) Bibel mangkatahon, “Pagodang-godang nasiam ma [niombahmu] marhitei . . . podah ni Jahowa.” (Basa Epesus 6:4.) Jadi marosuh do Jahowa ase idalankon sidea tanggung jawab ai, janah lang boi ai ibere hubani halak na legan.

2. Aha do podah ni Jahowa hubani dakdanak?

Iparentahkon Jahowa do hubani dakdanak, “Balosi nasiam ma namatoras nasiam.” (Basa Kolosse 3:20.) Anggo ibahen sidea sonai, gabe marmalas ni uhur ma Jahowa, sonai homa namatorasni. (Podah 23:22-25) Boi do dakdanak marlajar humbani Jesus. Age pe namatorasni lang sempurna, tapi totap do Jesus unduk hubani sidea.—Lukas 2:51, 52.

3. Sonaha ase kaluargamu boi lambin dohor bani Jahowa?

Tontu sihol do namatoras ase niombahni mangkaholongi Jahowa. Sonaha ma namatoras boi mangurupi sidea? Bibel mangkatahon, ‘Maningon isuankon nasiam do [hata ni Jahowa] hubagas uhur ni anak ni nasiam. Ajarhon nasiam ma ai sanggah rup hundul i rumah ampa sanggah i pardalanan.’ (5 Musa 6:7) Hata “isuan” humbani ayat ai artini maningon marulak-ulak do namatoras mangajari dakdanakni. Maningon sonai do ibahen ase idingat dakdanak ai na iajarhon hubani sidea. Leganni ai, maningon taratur do homa sidea mangajarhon pasal Jahowa hubani dakdanakni. Umpamani, ibahen sidea ma parlajaran Bibel kaluarga tiap minggu. Hassi pe lape dong niombah ni nasiam, totap ma bahen nasiam parlajaran ai.

PARLAJARI ROH BAHATNI

Ulas hita ma aha do na porlu ibahen kaluarga ase totap martuah janah damei pangahap ni sidea.

4. Patuduh ma holong sanggah mangajari dakdanak

Tontu lang urah mangajari dakdanak. Sonaha ma podah ni Bibel boi mangurupi nasiam? Basa ma Jakobus 1:19, 20, janah ulas ma sungkun-sungkun on:

Sonaha namatoras boi patuduhkon holong bani niombahni sanggah marbuali sidea?
Mase namatoras ulang maminsang anakni sanggah marah ope ia? a

5. Jaga ma niombahmu humbani parjahat

Laho manjaga dakdanak humbani pelecehan seksual, maningon iajarhon namatoras do pasal seks hubani ganup niombahni. Tapi ra do lang urah iahap ham mangajarhon ai. Tonton ma VIDEO, dob ai ulas ma sungkun-sungkun on.

VIDEO: Jaga ma Niombahmu humbani Parjahat (2:58)

Mase sipata lang urah iahap namatoras laho mangajarhon pasal seks bani niombahni?
Sonaha namatoras boi mangajarhon pasal seks hubani niombahni?

Songon na ipatugah bani Bibel, lambin jahat do halak sonari on. Basa ma 2 Timoteus 3:1, 13, janah ulas ma sungkun-sungkun on:

Sonari on bahat do halak na mambahen pelecehan seksual. Halani ai, mase namatoras maningon mangajarhon pasal seks hubani niombahni ampa carani padaohkon diri humbani halak sisonai?

Ai ibotoh ham do?

Bahat do publikasi na ipasirsir Saksi Jahowa ase namatoras boi mangajarhon pasal seks hubani niombahni, ampa carani padaohkon diri humbani pelecehan seksual. Umpamani, idah ma:

Lindungi Anak Kalian (video)
Belajarlah dari sang Guru Agung, pasal 10 pakon 32
“Mengajar Anak tentang Seks” (Sadarlah! No. 5 2016)

6. Hormat ma bani namatorasmu

Sonaha carani niombah patuduhkon anggo sidea hormat bani namatorasni? Sada carani, dear ma sidea marsahap hubani namatorasni. Tonton ma VIDEO, dob ai ulas ma sungkun-sungkun on.

VIDEO: Sonaha Cara na Dear Marsahapi pakon Namatorasku? (2:19)

Aha do gunani anggo dear na maposo marsahap hubani namatorasni?
Sonaha cara na dear sidea boi marsahap hubani namatorasni?

Basa ma Podah 1:8, janah ulas ma sungkun-sungkun on:

Aha do na porlu ibahen na maposo anggo ipodahi namatorasni ia?

7. Mambahen parlajaran Bibel kaluarga

Ibahen Saksi-Saksi Jahowa do parlajaran Bibel kaluarga tiap minggu. Sonaha do parlajaran ai ibahen? Tonton ma VIDEO, dob ai ulas ma sungkun-sungkun on.

VIDEO: Totap Mambahen Parlajaran Bibel Kaluarga Hassi pe Dong Tantanganni (8:04)

Aha do na boi ibahen kaluarga ase taratur parlajaran Bibel kaluarga ni sidea?
Aha do na boi ibahen namatoras ase marosuh anak ni sidea bani parlajaran Bibel kaluarga?—Tonggor ma gambar bani mungkahni parlajaran on.
Aha do ra tantangan na iahapkon ham laho mambahen parlajaran Bibel kaluarga?

Hinan, iparentahkon Jahowa do halak Israel ase taratur mangulas Hata ni Naibata ibagas kaluarga ni sidea. Basa ma 5 Musa 6:6, 7, janah ulas ma sungkun-sungkun on:

Sonaha ham boi mandalankon parentah ai?

Sanggah parlajaran Bibel kaluarga:

Boi do nasiam mambahen persiapan na laho iulas i partumpuan.
Mambasa ampa mangulas sarita na dong i Bibel na iharosuhkon kaluargamu.
Anggo etek ope dakdanakmu, boi do idownload atap isetak ham parlajaran bani dakdanak na dong i jw.org.
Mangulas sada artikel bani na maposo na dong i jw.org.
Bahen ma drama humbani sarita na dong i Bibel.
Tonton ampa ulas ma video na dong i jw.org.

ANGGO DONG NA MANGKATAHON: “Bahat tumang do horjangku. Lang sompat ahu mangajari anakku marlajar Bibel.”

Sonaha ma ham mambalosi ai?

RIMPUNAN

Sihol do Jahowa ase namatoras mangkaholongi, mangajari, ampa manjaga niombahni. Sihol do homa Jahowa ase hormat dakdanak hubani namatorasni, anjaha maningon taratur do namatoras mambahen parlajaran Bibel kaluarga.