Sanggah itompa Jahowa jolma, ibahen do sidea boi marsahap. Sibere-bere na maharga humbani Jahowa do on. Halani ai sihol do Ia ase dear parsahapta. (Basa Jakobus 1:26.) Jadi sonaha ase na ihatahon hita boi pamalaskon uhur-Ni?

1. Aha na porlu ibahen hita ase parsahapta boi pamalaskon uhur ni Jahowa?

Iojur Bibel do hita, “Marsiurupan ma nasiam janah patoguh ma na legan.” (1 Tessalonika 5:11) Anggo iahap ham, ise ma na itanda ham na porlu ipatoguh uhurni? Anjaha sonaha ham boi mangurupi sidea? Patuduh ma anggo ham parduli hu bani. Boi do ipuji ham na dear na ibahenni. Boi do homa ipatuduh ham ayat hun Bibel na boi patoguhkon uhurni. Marusaha ma ase totap lamlam janah bujur bani sidea, halani dong do pengaruhni bani sidea sonaha caranta marsahap.​—Podah 15:1.

2. Parsahap na sonaha do na lang boi igunahon hita?

Bibel mangkatahon, “Ulang ma kaluar hata na lang dear humbani pamangan nasiam.” (Basa Epesus 4:29.) On artini ulang ma kasar parsahapta atap pe mambahen borit uhur ni halak na legan. Leganni ai, ulang ma ra hita manggosip ampa mamfitnah halak na legan.​—Basa Podah 16:28.

3. Sonaha ase parsahapta boi patoguhkon halak na legan?

Humbani parsahapta taridah do aha na ibagas uhur ampa pingkiranta. (Lukas 6:45) Halani ai, marusaha ma hita mamingkirhon sagala na sintong, na ponting, ampa na patut sipujion. (Pilippi 4:8) Ase boi ibahen hita sonai, maningon dear ma ipilih hita hasoman ampa hiburan. (Podah 13:20) Anjaha paima marsahap, ipingkirhon hita ma lobei aha na laho hatahononta. Bibel mangkatahon, “Dos songon paniham ni podang do ganup hata na lang ipingkirhon, tapi pamalumhon do hata ni halak na maruhur.”​—Podah 12:18.

 PARLAJARI ROH BAHATNI

4. Jaga ma parsahapmu ase totap dear

Somalni, halani lepak parsahapta gabe manosal ma hita. (Jakobus 3:2) Basa ma Galatia 5:22, 23, janah ulas ma sungkun-sungkun on:

• Ase boi dear parsahapta, maningon iurupi Jahowa do hita ase boi patuduhkon sifat-sifat ai. Sifat na ija do na sihol ipatuduh ham? Mase ipilih ham ai?

Basa ma 1 Korint 15:33, janah ulas ma sungkun-sungkun on:

• Aha do pengaruh ni hiburan ampa hasoman hubani caranta marsahap?

Basa ma Parambilan 3:1, 7, janah ulas ma sungkun-sungkun on:

• Sipata dear do anggo sip hita atap pe ipaima hita panorang na topat laho marsahap. Pandapotmu, sadihari ma porlu ibahen hita sonai?

 5. Hatahon ma na dear pasal halak na legan

6. Bujur janah lamlam ma ham marsahap pakon kaluargamu

 RIMPUNAN

Aha na ihatahon hita adong do pengaruhni bani halak na legan. Halani ai, maningon ipingkirhon hita do aha na laho hatahononta, sadihari hita mangkatahon ai, janah sonaha cara na dear laho mangkatahon ai.

Na Dob Iparlajari

• Aha do na boi ibahen ham ase parsahapmu boi patoguhkon halak na legan?

• Parsahap na sonaha do na lang boi igunahon hita?

• Sonaha carani ase boi totap dear parsahapta?