Ganup do hita boi mamilih baju aha na laho ipakei ampa sonaha dandananta. Tapi dong do prinsip ni Bibel na boi mangurupi hita ase dear marpakeian janah mangihutkon harosuh ni Naibata. Ulas hita ma piga-piga prinsip ai.

1. Aha do prinsip ni Bibel pasal pakeian ampa dandanan?

Bibel mangojur hita ase “hormat janah sopan ma marpakeian, marhasoman toruh ni uhur ampa hapentaran”, janah maningon taridah do anggo hita “manombah Naibata”. (1 Timoteus 2:9, 10) Dong ompat prinsip humbani ayat ai: (1) Maningon “hormat janah sopan” ma parpakeianta. Marusaha do Saksi Jahowa patuduhkon hormat bani Naibata humbani cara ni sidea marpakeian. Age pe lang sarupa parpakeian ni sidea, tapi rapi janah sopan do pakeian ampa dandanan ni sidea. (2) Maningon ‘martoruh ni uhur’ do hita. Artini lang ra hita patuduh-tuduhkon na dong banta marhitei dandananta, janah lang homa ipakei hita pakeian na lang suman. (3) ‘Pentar’ ma mamilih pakeian. On artini, ulang iahap hita maningon iihutkon hita ganup mode na terbaru. (4) Maningon taridah ma humbani parpakeianta anggo hita “manombah Naibata”.​—1 Korint 10:31.

2. Sanggah hita mamilih pakeian, mase maningon ipingkirhon hita pangahap ni sanina botou?

Age pe bebas hita mamilih aha na laho ipakei, tapi porlu do ipingkirhon hita pengaruhni bani na legan. Ulang ma gabe lang sodap pangahap ni halak mangidah pakeianta. Tapi marusaha ma “mambahen malas uhur ni hasomanta janah mambahen na dear laho patoguhkon sidea”.​—Basa Rom 15:1, 2.

3. Mase maningon rapi pakeianta sanggah martumpu ampa marbarita?

Marusaha ma hita ase rapi parpakeianta sanggah hita martumpu ampa marbarita. Anggo rapi hita marpakeian, boi do gabe marosuh halak bani baritanta. Jadi pakeian ampa dandananta boi mambahen “sangap pangajaran na humbani Naibata”.​—Titus 2:10.

 PARLAJARI ROH BAHATNI

4. Anggo dear parpakeianta, patuduhkon hormat do ai bani Jahowa

Mase porlu ipardiateihon hita caranta marpakeian? Basa ma Psalmen 47:2, janah ulas ma sungkun-sungkun on:

• Halani hita manombah Jahowa, aha do pengaruhni ai bani caranta marpakeian?

• Anggo iahap ham, ai porlu do ipardiateihon hita caranta marpakeian sanggah hita martumpu ampa marbarita? Mase sonai balosmu?

 5. Mambahen haputusan na dear pasal parpakeian ampa dandananta

Tonton ma VIDEO.

Lang porlu mahal pakeianta. Tapi totap ma borsih janah sosok pakon aha na laho ihorjahon hita atap huja pe hita laho. Basa ma 1 Korint 10:24 pakon 1 Timoteus 2:9, 10. Dob ai, ulas hita ma mase lang ra hita mamakei pakeian . . .

• na lang rapi ampa na lang sopan.

• na masompittu atap na mabukattu.

Age pe halak Kristen lang be mangihutkon Titah ni si Musa, tapi dong do dapot hita hunjai prinsip pasal parpakeian. Basa ma 5 Musa 22:5, janah ulas ma sungkun-sungkun on:

• Mase dalahi lang boi marpakeian songon naboru atap pe naboru marpakeian songon dalahi?

Basa ma 1 Korint 10:32, 33 pakon 1 Johannes 2:15, 16, janah ulas ma sungkun-sungkun on:

• Mase porlu ipingkirhon hita pangahap ni sanina botou pakon halak na legan pasal parpakeianta?

• Sonaha do somalni halak marpakeian i hutamu?

• Anggo iahap ham, ai sosok do parpakeian ni sidea ai bani halak Kristen? Mase sonai balosmu?

 RIMPUNAN

Anggo dear parpakeian ampa dandananta, on patuduhkon hormat do hita bani Jahowa janah holong uhurta bani halak na legan.

Na Dob Iparlajari

• Mase marosuh Jahowa ase dear hita marpakeian?

• Aha do prinsip ni Bibel na boi mangurupi hita sanggah mamilih pakeian ampa dandanan?

• Anggo dear parpakeianta, aha do pengaruhni ai bani halak na legan?