Jesus do kopala ni kuria Kristen. (Epesus 5:23) Age pe ia i surga, totap do ia mambobahon susianni i tanoh on marhitei “juakjuak na bujur anjaha na maruhur”. (Basa Mateus 24:45.) Sidea do na ipilih Jesus laho mambahen haputusan bani kuria Kristen. Age pe sonai, totap do sidea unduk bani Jesus janah mangurupi sanina ni Jesus na legan na laho manggoluh i surga. Jadi, ise do juakjuak na bujur anjaha na maruhur sonari on? Sonaha sidea mambobahon hita?

1. Ise do “juakjuak na bujur anjaha na maruhur”?

Humbai na hinan, ipilih Jahowa do piga-piga dalahi laho mambere tugah-tugah bani juakjuak-Ni. (Maleaki 2:7; Heber 1:1) Dobkonsi matei Jesus, ipilih ia ma apostelni ampa piga-piga sintua i Jerusalem laho mambobahon halak Kristen. (Lahoan 15:2) Sonari on pe, ipilih Jesus do homa piga-piga sintua laho mambere pangajaran ampa mangatur horja mambaritahon ambilan na madear. Sidea ai gabe Pangurus Pusat ni Saksi Jahowa. Sidea on do “juakjuak na bujur anjaha na maruhur” na ipilih Jesus. (Mateus 24:45a) Ganup do Pangurus Pusat ai, halak Kristen na ipilih Naibata na marpangarapan laho mamarentah rap pakon Jesus i surga.

2. Sonaha juakjuak na bujur mambere hita mangan?

Songon na ihatahon Jesus, juakjuak na bujur ai do na “mambere mangan [susianni] bani panorangni”. (Mateus 24:45b) Maningon mangan do hita ase boi margogoh janah sehat. Songon sipanganon ai, pangajaran na ibere juakjuak na bujur boi mangurupi hita ase totap setia bani Jahowa janah margogoh mangkorjahon tugas na ibere Jesus. (1 Timoteus 4:6) Pangajaran ai boi dapot hita marhitei partumpuan, kebaktian, buku, ampa video. Halani ai, gabe iarusi hita ma aha do na iharosuhkon Jahowa janah sonaha carani hita boi patoguhkon parhasomananta pakon-Si.

 PARLAJARI ROH BAHATNI

3. Maningon dear do iatur juakjuak ni Naibata

Hinan, dong piga-piga apostel pakon sintua na gabe pangurus pusat laho mambobahon halak Kristen bani abad na parlobei. Sonari on pe, ipilih Jesus do Pangurus Pusat laho mambobahon Saksi-Saksi Jahowa i sab dunia on. Tonton ma VIDEO.

Basa ma 1 Korint 14:33, 40, janah ulas ma sungkun-sungkun on:

• Aha do tujuanni ipilih Jahowa Pangurus Pusat?

4. Iatur Pangurus Pusat do horja laho marbarita

Ponting tumang do marbarita bani halak Kristen abad na parlobei. Basa ma Lahoan 8:14, 25, janah ulas ma sungkun-sungkun on:

• Ise do na mangatur horja laho marbarita bani abad na parlobei?

• Aha do na ibahen si Petrus pakon si Johannes dob ijalo sidea tugah-tugah humbani apostel na legan?

Sonai homa sonari on, ponting tumang do marbarita bani halak Kristen. Halani ai, ibere Pangurus Pusat do tugah-tugah sonaha mangkorjahon ai. Tonton ma VIDEO.

 Ponting tumang do marbarita ampa mangidangi bani Jesus. Basa ma Markus 13:10, janah ulas ma sungkun-sungkun on:

• Mase ponting tumang bani Pangurus Pusat marbarita ai?

• Mase porlu iatur Pangurus Pusat horjanta laho marbarita?

5. Ibere Pangurus Pusat do tugah-tugah humbani Bibel

Sonari on, ibere Pangurus Pusat do homa tugah-tugah hubani Saksi-Saksi Jahowa i sab dunia on. Sonaha sidea boi mambere tugah-tugah ampa haputusan na dear? Pardiateihon ma na ibahen pangurus pusat bani abad na parlobei. Basa ma Lahoan 15:1, 2, janah ulas ma sungkun-sungkun on:

• Parsalisihan pasal aha do na masa i kuria bani abad na parlobei?

• Hubani ise ma si Paulus pakon si Barnabas mangindo tugah-tugah pasal parsalisihan ai?

Basa ma Lahoan 15:12-18, 23-29, janah ulas ma sungkun-sungkun on:

• Aha do na ibahen pangurus pusat ai ase boi mambahen haputusan na dear?​—Tonggor ma ayat 12, 15, pakon 28.

Basa ma Lahoan 15:30, 31 pakon 16:4, 5, janah ulas ma sungkun-sungkun on:

• Sonaha do pangahap ni halak Kristen bani abad na parlobei dobkonsi manangar haputusan na ibahen pangurus pusat?

• Aha do pasu-pasu na ibere Jahowa bani sidea?

Basa ma 2 Timoteus 3:16 pakon Jakobus 1:5, janah ulas ma sungkun-sungkun on:

• Sonaha Pangurus Pusat sonari on mambahen haputusan na sosok pakon harosuh ni Jahowa?

 RIMPUNAN

Pangurus Pusat do “juakjuak na bujur anjaha na maruhur” na ipilih Jesus. Ibere sidea do tugah-tugah ampa pangajaran humbani Bibel bani Saksi-Saksi Jahowa i sab dunia on.

Na Dob Iparlajari

• Ise do “juakjuak na bujur anjaha na maruhur” ai?

• Aha do na ibahen Pangurus Pusat laho mangurupi hita?

• Ai porsaya do ham anggo Pangurus Pusat ai “juakjuak na bujur anjaha na maruhur”?