Ganup halak Kristen pasti sihol do totap setia bani Jahowa. Tontu sonai do homa pangahapmu. Lang ipaturut ham atap aha pe mambahen ham lang setia bani Jahowa. Gabe malas ma uhur ni Jahowa halani ai. (Basa 1 Kronika 28:9.) Tapi, aha do tantanganni na boi mambahen hita lang setia? Janah sonaha hita boi mangatasi ai?

1. Ise do na sihol mambahen hita lang be setia bani Jahowa?

Dong halak na sihol mambahen hita ase lang be manombah Jahowa, umpamani halak na murtad. Saksi Jahowa do hinan sidea. Tapi sonari ipasambor-sambor sidea do organisasi ni Jahowa. Tujuanni ase lang be porsaya hita bani Jahowa ampa organisasi-Ni. Leganni ai, dong homa pambobai ni ugama na mambahen hatorangan na lang sintong pasal Saksi Jahowa, ase hita manadingkon hasintongan. Ipasingat Jesus do hita, “Paturut hanima ma sidea, pambobai na pitung do sidea. Anggo na pitung manogu na pitung, gabe rap madabuh do haduasi hu lombang.” (Mateus 15:14) Halani ai, ulang ma ra hita marsahapi pakon halak sisonai, mambasa buku atap tulisanni i internet, mangidah situs webni, atap pe manonton video na ibahen sidea.

Sonaha anggo adong hasoman atap kaluarganta na mamilih kaluar hun organisasi ni Jahowa? Pasti pusok do uhurta, anjaha ra do ipaksa ia hita mangihutkonsi. Age pe sonai, maningon totap do hita setia bani Jahowa. (Mateus 10:37) Halani ai, lang ra hita marsahapi atap pe marhasoman pakon halak sisonai.​—Basa 1 Korint 5:11.

2. Sonaha hita patuduhkon anggo hita totap setia bani Jahowa?

Halani holong uhurta bani Jahowa, tontu lang ra hita mangkorjahon atap aha pe na dong kaitanni pakon ugama palsu. Iparentahkon Jahowa do hita, “Kaluar ma hanima hun [Babel na Banggal] ale juakjuak-Ku.” (Pangungkabon 18:2, 4) Halani ai, ulang ma ipilih hita horja na dong kaitanni pakon ugama palsu atap pe dihut bani organisasi na ibahen sidea.

 PARLAJARI ROH BAHATNI

3. Jaga ma humbani halak na murtad

Aha do na porlu ibahen hita anggo dong na mangkatahon na lang dear pasal organisasi ni Jahowa? Basa ma Podah 14:15, janah ulas ma sungkun-sungkun on:

• Mase ulang mintor porsaya hita bani ganup barita na itangar hita?

Basa ma 2 Johannes 10, janah ulas ma sungkun-sungkun on:

• Anggo dong halak na murtad, aha na lang boi ibahen hita?

• Hassi pe lang langsung halak na murtad ai marsahapi pakon hita, aha do na ibahen sidea ase galek haporsayaonta?

• Pandapotmu, sonaha ma pangahap ni Jahowa anggo marosuh hita manangar barita na lang dear pasal Ia atap pe organisasi-Ni?

4. Totap ma setia bani Jahowa sanggah dong hasoman na mangkorjahon dousa na banggal

Anggo ibotoh hita dong sanina botou na mangkorjahon dousa na banggal, aha do na maningon bahenonta? Ihutkon hita ma prinsip na ibere Naibata. Basa ma 3 Musa 5:1.

Songon na ihatahon bani ayat ai, anggo ibotoh hita dong sanina botou na mangkorjahon dousa na banggal, maningon ipatugah hita do ai bani sintua. Tapi paima ai, dear do anggo iojur hita ase na mangkorjahon dousa ai na manjumpahi sintua laho mangakui dousani. Anggo lang ra ia, hita do na maningon patugahkon bani sintua. Anggo ibahen hita sonai, mase ai patuduhkon setia do hita janah holong uhurta bani . . .

• Jahowa?

• halak na mardousa ai?

• sanina botou i kuria?

 5. Kaluar ma humbani Babel na Banggal

 RIMPUNAN

Ase hita boi totap setia bani Jahowa, ulang ma hita marsaor pakon halak na lang setia hu Bani, janah maningon kaluar do hita hun ugama palsu.

Na Dob Iparlajari

• Mase ulang pala itonton, itangar, atap ibasa hita hatorangan humbani halak na murtad?

• Aha do na porlu bahenonta anggo adong hasoman atap pe kaluarganta na lang ra be gabe Saksi Jahowa?

• Aha do na porlu ibahen hita ase kaluar humbani ugama palsu?