PARLAJARAN 59

Boi do Ham Totap Setia Age pe Ianiaya

PADALAN

Halani hita manombah Jahowa, sai adong do na marsogam ni uhur hubanta janah ianiaya do holi hita. Tapi, mase ulang pala mabiar hita?

1. Mase halak Kristen ianiaya?

Bibel mangkatahon, “Ianiaya do holi ganup halak na manombah Naibata janah mangihutkon Kristus Jesus.” (2 Timoteus 3:12) Sanggah i tanoh on Jesus, ianiaya do ia halani lang ra mangihutkon parlahou ni halak i dunia on. Sonai ma homa hita, halani lang iihutkon hita dunia on, gabe ianiaya pamarentah ampa pambobai ugama ma holi hita.—Johannes 15:18, 19.

2. Aha na porlu ibahen hita ase totap setia sanggah ianiaya?

Maningon ipatoguh hita do haporsayaonta. Sonaha carani? Maningon totap ma hita martonggo, mambasa Bibel bai ganup ari, janah roh hu partumpuan. Anggo ibahen hita sonai, gabe boi ma hita totap setia janah barani age pe ianiaya pamarentah atap pe kaluarganta. Apostel Paulus pe gati do ianiaya, tapi nini do, “Jahowa do na mangurupi ahu, lang mabiar ahu.”—Heber 13:6.

Leganni ai, ringgas ma hita marbarita. Ai do na mambahen toguh haporsayaonta bani Jahowa janah lang mabiar bani jolma. (Podah 29:25) Anggo ringgas hita marbarita humbani sonari, holi totap do hita barani marbarita age pe ilarang pamarentah.—1 Tessalonika 2:2.

3. Aha do gunani anggo totap hita setia sanggah ianiaya?

Tontu lang adong hita na marosuh ianiaya. Tapi sanggah ianiaya, iahapkon hita ma sai tongtong do Jahowa mangurupi hita. Halani ai gabe lambin toguh ma haporsayaonta hu Bani. (Basa Jakobus 1:2-4.) Sasintongni lang marosuh Naibata mangidah hita ianiaya. Tapi ‘anggo sabar hita manaron na sunsah halani mambahen na madear, gabe malas ma uhur ni Naibata’. (1 Petrus 2:20) Jadi anggo totap hita setia, ibere Jahowa ma hubanta hagoluhan na sadokah ni dokahni i dunia na baru. Ijai lang adong be munsuh na laho manganiaya hita.—Mateus 24:13.

PARLAJARI ROH BAHATNI

Ulas hita ma mase hita boi totap setia bani Jahowa sanggah ianiaya janah pasu-pasu aha do na laho ibere Jahowa hubanta.

4. Totap setia hassi pe ilarang kaluarga

Domma ipatugah Jesus, ra do dong kaluarganta na marsogam ni uhur hubanta halani hita mangidangi Jahowa. Basa ma Mateus 10:34-36, janah ulas ma sungkun-sungkun on:

Anggo dong sasahalak na sihol manombah Jahowa, aha do ra na ibahen kaluargani?

Laho mangidah contohni, tonton ma VIDEO, dob ai ulas ma sungkun-sungkun on.

VIDEO: Lang Itadingkon Jahowa Hanami (5:13)

Aha do na boi ibahen ham anggo dong kaluarga atap pe hasomanmu na marsogam ni uhur bamu halani ham mangidangi Jahowa?

Basa ma Psalmen 27:10 pakon Markus 10:29, 30. Dob mambasa tiap ayat, ulas ma sungkun-sungkun on:

Anggo dong kaluarga atap pe hasomanmu na manlarang ham mangidangi Naibata, sonaha ayat on boi mangurupi ham ase totap setia?

5. Totap ma manombah Jahowa age pe ilarang pamarentah

Maningon totap do hita barani anggo dong halak na manlarang hita laho manombah Jahowa. Tonton ma VIDEO, dob ai ulas ma sungkun-sungkun on.

VIDEO: Totap Barani Hassi pe Ianiaya (6:27)

Parlajaran aha do na dapot ham humbani video ai?

Basa ma Lahoan 5:27-29 pakon Heber 10:24, 25. Dob mambasa tiap ayat, ulas ma sungkun-sungkun on:

Mase hita maningon totap martumpu ampa marbarita age pe ilarang pamarentah?

6. Iurupi Jahowa do ham ase totap setia

Bahat do Saksi Jahowa i sab dunia on age na maposo pakon na matua na totap setia hassi pe ianiaya. Aha do na mangurupi sidea? Tonton ma VIDEO, dob ai ulas ma sungkun-sungkun on.