Hata ”parintis” gati do mangartihon halak na laho hu ianan na baru anjaha mambuha dalan bani na legan. Jesus boi do isobut parintis halani ia isuruh roh hu tanoh on laho mangidangi ampa mambuha dalan haluahon. (Mateus 20:28) Sonari on, haganup pangihutni maniru Jesus, mambere bahat panorangni na mambahen buei ni jolma ”na gabe susian”. (Mateus 28:19, 20) Anjaha, piga-piga humbani sidea boi dihut mangidangi na isobut hanami dinas parintis.

Parintis aima parambilan na mambere gok panorang. Haganup Saksi Jahowa aima parambilan na madear. Tapi, adong homa do na mambahen sonaha ase boi mangidangi gabe parintis biasa, na mambere panorangni 70 jam siap bulan laho marambilan. Halani ai do sidea mambagi panorangni laho marhorja pakon mangidangi. Na legan isuruh mangidangi gabe parintis istimewa hu sada ianan ase mambere panorangni mambaritahon pasal Harajaon. Sidea mambere panorangni 130 jam atap lobih ibagas parambilanon siap bulan. Haganup parintis sonang bai goluh na lang marlobihan, anjaha porsaya Jahowa mambere haporluan ni sidea. (Mateus 6:31-33; 1 Timoteus 6:6-8) Sidea na lang boi mambere gok panorangni boi do mangidangi gabe parintis ekstra anggo sosok bai panorangni sidea, marhitei mambere 30 atap 50 jam siap bulan laho marambilan.

Parintis tarojur halani holong hubani Naibata pakon hasoman. Songon Jesus, hanami mangidah buei jolma sonari on na mamorluhon panondangion pasal partonduyon. (Markus 6:34) Anjaha dong do pambotoh nami na boi mangurupi sidea mambere pangarapan sonari on ampa i ari magira. Holong hubani hasoman na mangojur sahalak parintis ase mambere gok panorangni ampa gogohni ase mangurupi halak na legan pasal partonduyon. (Mateus 22:39; 1 Tessalonika 2:8) Na gabe hasilni, haporsayaon lambin gogoh, parhasomanan pakon Naibata lambin orot, anjaha sidea marmalas ni uhur.​—Lahoan ni Apostel 20:35.

• Patorang ma, aha do artini parintis.

• Aha do na mangojur piga-piga halak mambere gok panorangni?