Lang piga dokah sanggah lape ia matei, Jesus manghatahon, ”Ambilankonon do ambilan na madear pasal harajaon in i sab dunia on, laho manaksihon bani haganup bangsa, dob ai pe ase roh ujungni.” (Mateus 24:14) Sonaha do horja ambilan na madear ihorjahon i sab tanoh on? Marhitei mangirikkon sitiruon na itotapkon Jesus sanggah ia i tanoh on.​—Lukas 8:1.

Hanami marusaha manjumpahi halak i rumah ni sidea. Jesus mangajar susianni ase mangambilankon barita na madear hu rumah-rumah. (Mateus 10:11-13; Lahoan ni Apostel 5:42; 20:20) Parambilan na madear i abad na parlobei iparentahkon ase marbarita bani sada-sada ianan. (Mateus 10:5, 6; 2 Korint 10:13) Sonari on, horja parambilanon nami pe jenges do iarahkon, pakon haganup kuria ibere sada-sada ianan na laho ihorjahon. Marhitei ai, hanami boi mandalankon parentah Jesus na laho ”mangambilankon anjaha manaksihon bani halak na mabuei”.​—Lahoan ni Apostel 10:42.

Hanami marusaha manjumpahi halak ija pe sidea marianan. Jesus pe mambere sonto marambilan bani ianan halak na mabuei, sontoni sanggah i topi tao atap dohor ni parigi. (Markus 4:1; Johannes 4:5-15) Hanami pe patugahkon hubani halak pasal Bibel atap ija pe​—i dalan, i pokan, i taman, atap humbani talepon. Ambah ni ai, hanami mambere hasaksian hubani simbalog rumah, saparhorjaan, saparsikolahan, pakon hu kaluarga nami bani panorang na sosok. Haganup horja na tararah on mambere panorang hubani buei ni jolma i sab dunia on laho manangar ”hatuahon-Ni”.​—Psalmen 96:2.

Sihol do Nasiam patugahkon barita na madear pasal Harajaon ni Naibata pakon gunani hubanta i ari na magira? Pangarapan on lang pitah hubani diri sandiri. Patugah ma barita on hubani haganup jolma sonari on, ulang i padokah-dokah!

• ”Barita na madear” aha do na maningon i baritahon?

• Sonaha do Saksi-Saksi Jahowa maniru Jesus marambilan?