Bani usaha padaskon ”ambilan na madear” hubani ”haganup bangsa, marga, hata pakon suku”, hanami mambahen buku-buku bani hira-hira 750 bahasa. (Pangungkabon 14:6) Sonaha do hanami boi manghorjahon horja na borat on? Marhitei pangurupion ni bagian panuratan na dong bani bahat nagori ampa penerjemah na dob ipilih, haganupan ai Saksi-Saksi Jahowa.

Teks na parlobei ibahen bani sahap Inggris. Pangurus Pusat mangawasi parhorjaan Departemen Panuratan i kantur pusat sadunia. Departemen on mangatur horja ni panurat na marhorja i kantur pusat pakon i kantur Saksi-Saksi Jahowa i sada-sada nagori. Halani adong bagian panuratan na marragam, hanami boi mangulas parlajaran marragam adat-adat na somal, na mambahen buku-buku nami iharosuhkon bani bahat ni bangsa.

Teks ai itongos hubani ganup panerjemah. Dob iatur pakon iharosuhkon, teks ai itongos marhitei komputer hubani bagian panerjemah i sab dunia on. Dob ai si panerjemah mamareksa topat atap lang hata-hata na ipilih, pakon sonaha aturan bahasani. Sidea marusaha mamindahi ”hata-hata hasintongan na sangkan” na boi padaskon haganup artini humbai teks sahap Inggris hu bagas sahap ni sidea.​—Parambilan 12:10.

Komputer papodaskon horja. Komputer lang boi manggantihon horja panurat pakon panerjemah. Hassi pe sonai, horja ni sidea boi lambin podas anggo mamakei kamus, program, pakon bahan parlajaran na adong i komputer. Saksi-Saksi Jahowa mambahen Sistem Penerbitan Elektronik Multibahasa (MEPS), sada program na boi pasadahon teks bani marratus sahap pakon gambar na adong, janah mangatur aturan letakni ase boi isetak.

Mase hanami marusaha bai horja on, hassi pe sahap na iterjemahkon ai pitah piga-piga ribu halak do mamakei? Halani Jahowa mangharosuhkon ase ”haganup jolma maluah anjaha das mananda hasintongan in”.​—1 Timoteus 2:3, 4.

• Sonaha do sara horja ni panuratan buku-buku nami on?

• Mase hanami manerjemahkon buku-buku bani bahat ni sahap?